AKP សៀមរាប ថ្ងៃទី១១ ខែសីហា ឆ្នាំ២០២៥-- ឯកឧត្តម ប៊ុន ថាឬទ្ធិ សមាជិកគណៈកម្មការទី១រដ្ឋសភានៃព្រះរាជាណាចក្រកម្ពុជា និងព្រះមន្ត្រីសង្ឃខេត្តសៀមរាប នាថ្ងៃទី១១ ខែសីហា ឆ្នាំ២០២៥ បាននិមន្ត និងអញ្ជើញនាំយកអំណោយជាគ្រឿងឧបភោគបរិភោគរបស់សមាគមសង្រ្គោះជីវិតនៃប្រទេសសិង្ហបុរីដែលផ្តល់តាមរយៈព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក និងពុទ្ធិកសមាគមកម្ពុជារដ្ឋ ដើម្បីមកចែកជូនដល់គ្រួសារកងទ័ព ប្រជាពលរដ្ឋភៀសសឹក ចាស់ជរាចំនួន៥០០គ្រួសារ ស្ថិតនៅឃុំស្រយ៉ង ស្រុកគូលែន ខេត្តព្រះវិហារ ។

លោក Goh Tung Heng ប្រធានសមាគមសង្រ្គោះជីវិតនៃប្រទេសសិង្ហបូរី បានថ្លែងថា សង្គ្រាមពិតជាបានបង្កផលប៉ះពាល់ជាខ្លាំងដល់ប្រជាពលរដ្ឋ ជាក់ស្តែងប្រជាពលរដ្ឋជាច្រើននៅតាមបបណ្តាខេត្ត នៅតាមព្រំដែន បានសៀសសឹកនិងត្រូវការស្បៀងអាហារហូនចុក និងបានលើកឡើងអំពីគោលបំណងរបស់ក្រុមសមាគមសង្រ្គោះជីវិត គឺជាសមាគមមួយដែលមិនបម្រើនឲ្យយោបាយណាមួយឡើយ គឺបម្រើតែចលនាមនុស្សធម៌នៅលើកពិភពលោកនេះ។ លោកបន្តថា នេះជាអំណោយតិចតូចក្នុងការចូលរួមដោះស្រាយ និងជួយសម្រាលនូវការខ្វះខាតរបស់បងប្អូនចំពោះមុខបានមួយរយៈហើយសមាគមរបស់លោកនឹងបន្តជួយដល់ប្រជាពលរដ្ឋកម្ពុជា ជួបការខ្វះខាតនៅតំបន់មូលដ្ឋានផ្សេងៗទៀតផងដែរ។

ឯកឧត្តម ប៊ុន ថាឬទ្ធិ បានថ្លែងថា ទុក្ខលំបាករបស់ប្រជាពលរដ្ឋគឺជាសេចក្តីកង្វល់ របស់រាជរដ្ឋាភិបាល ក៍ដូចជាអាជ្ញាធរគ្រប់លំដាប់ថ្នាក់ ដោយមិនអាចយកភ្នែកឈរមើលបានឡើយ ប្រជាជនមានសេចក្ដីសុខ រដ្ឋាភិបាលក៏សប្បាយចិត្តជាមួយប្រជាជន ហើយប្រជាជនមានទុក្ខលំបាក រាជរដ្ឋាភិបាល នឹងមិនទៅណាចោលប្រជាជនទេ និងយកចិត្តទុកដាក់ រស់នៅជាមួយប្រជាជនជានិច្ច។ កម្ពុជាគឺជាប្រទេសរងគ្រោះដោយសារការឈ្លានរបស់កងទ័ពថៃដែលជារឿងអកុសកលហើយសកម្មភាពឈ្លានពានរបស់ថៃលើដែនអធិបតេយ្យភាពរបស់កម្ពុជា គឺជាការរំលោភបំពានច្បាប់អន្តរជាតិធ្ងន់ធ្ងរ។

ឯកឧត្តមក៏បានធ្វើការថ្លែងអំណរគុណដល់សមាគមសង្រ្គោះជីវិតនៃប្រទេសសិង្ហបូរី ដែលមានចិត្តសប្បុរសធម៌ ចំពោះប្រជាជនកម្ពុជា ក្នុងការចូលរួមដោះស្រាយទុក្ខលំបាក ជាមួយរាជរដ្ឋាភិបាលកម្ពុជា ហើយ ម៉្យាងទៀត កាយវិការសប្បុរសធម៌នេះនឹងធ្វើឱ្យក្លាយជាកាលានុវត្តភាព ក្នុងការរឹតចំណងសាមគ្គីភាព និងការពង្រឹងកិច្ចទំនាក់ទំនង សហប្រតិបត្តិការល្អ រវាងប្រទេសជាតិ និងប្រជាជនទាំងពីរ កាន់តែមានភាពរឹងមាំទ្វេឡើង៕

ដោយ ឃុត សៅ