AKP កំពង់ធំ ថ្ងៃទី១១ ខែសីហា ឆ្នាំ២០២៥-- លោក ជា វ៉ាន់ចាន់ ខេត្តកំពង់ធំ នាព្រឹកថ្ងៃទី១១ សីហា ឆ្នាំ២០២៥ បានអញ្ជើញដឹកនាំកិច្ចប្រជុំស្ដីពីការរៀបចំត្រៀមប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅរយៈពេល២ថ្ងៃ នៅថ្ងៃទី២៨-២៩ ខែសីហា ឆ្នាំ២០២៥ ខាងមុខនេះ ដោយមានការចូលរួមពីរដ្ឋបាលក្រុង-ស្រុក កងកម្លាំងទាំង៣ និងមន្ទីរអង្គភាពពាក់ព័ន្ធទាំងអស់។

លោក ជា វ៉ាន់ចាន់ បានបញ្ជាក់ថាការប្រឡងសញ្ញបត្រមធ្យមសិក្សាទុតិយភូមិឆ្នាំសិក្សា២០២៤-២០២៥នេះ ខេត្តកំពង់ធំ មានសិស្សចូលប្រឡងចំនួន៥៧៩១នាក់ (ស្រី៣៣២០នាក់) ក្នុងនោះ មានមណ្ឌលប្រឡងចំនួន១១ រួមមាន៖ មណ្ឌលអនុវិទ្យាល័យថ្នល់បែក, មណ្ឌលបឋមអនុវត្តហ៊ុនសែនអាចារ្យលាក់, មណ្ឌលសាលាគរុកោសល្យ និងវិក្រឹតការហ៊ុនសែនកំពង់ធំ, មណ្ឌលអនុវិទ្យាល័យតេជោមាស, មណ្ឌលអនុវិទ្យាល័យកំពង់រទេះ, មណ្ឌលវិទ្យាល័យហ៊ុនសែនបល្ល័ង្ក (ជើង), មណ្ឌលវិទ្យាល័យហ៊ុនសែនបល្ល័ង្ក (ត្បូង), មណ្ឌលបឋមសិស្សាហ៊ុនសែនបល្ល័ង្ក, មណ្ឌលបឋមសិស្សាហ៊ុនសែនត្រពាំងវែង, មណ្ឌលវិទ្យាល័យស្ទឹងសែន,និងមណ្ឌលអនុវិទ្យាល័យបញ្ញាជី។

លោកអភិបាលរងខេត្តបានសំណូមពរដល់សមត្ថកិច្ចជំនាញអាជ្ញាធរមូលដ្ឋាន កងកម្លាំងមានសមត្ថកិច្ច ត្រូវសហការគ្នាជួយតាមដាន ត្រួតពិនិត្យការពារសណ្ដាប់ធ្នាប់ និងអនុវត្តទៅតាមច្បាប់ដែលពាក់ព័ន្ធជាធរមាន។

សូមបញ្ជាក់ថា ក្រសួងអប់រំ យុវជន និងកីឡានាពេលថ្មីៗកន្លងទៅនេះបានសម្រេចពន្យារពេលនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ ដែលគ្រោងរៀបចំនៅថ្ងៃទី១៨-១៩ ខែសីហា ឆ្នាំ២០២៥ លើកទៅថ្ងៃទី២៨-២៩ ខែសីហា ឆ្នាំ២០២៥ វិញ៕

ដោយ ស៊ុម វណ្ណា