AKP បន្ទាយមានជ័យ ថ្ងៃទី១១ ខែសីហា ឆ្នាំ២០២៥-- ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានថ្លែងនូវការអរគុណយ៉ាងជ្រាលជ្រៅចំពោះស្មារតីសាមគ្គីភាព និងការយកចិត្តទុកដាក់ខ្ពស់របស់សប្បុរជននានាចំពោះសុខទុក្ខរបស់ប្រជាពលរដ្ឋភៀសសឹក និងកងកម្លាំងការពារជាតិ ដែលជាកម្លាំងស្នូលក្នុងការថែរក្សាសន្តិភាព និងបូរណភាពទឹកដីពីការឈ្លានពានរបស់ឈ្លានពានសត្រូវនោះ។

ការថ្លែងយ៉ាងដូច្នេះក្នុងឱកាសឯកឧត្តមអញ្ជើញទទួលអំណោយពីលោកឧកញ៉ា ឡាច ប៊ុនលីម និងលោកជំទាវ ខា លីនដា បានបង្ហាញទឹកចិត្តសប្បុរសធម៌ដ៏ប្រពៃ ដោយបានបរិច្ចាគថវិកាចំនួន ៥,០០០,០០០ (ប្រាំលាន) រៀល ទឹកបរិសុទ្ធចំនួន១០០កេស និងសាច់ក្រកចំនួន១០០ គីឡូក្រាម ជូនដល់រដ្ឋបាលខេត្តបន្ទាយមានជ័យ នាព្រឹកថ្ងៃទី១១ ខែសីហា ឆ្នាំ២០២៥ នៅសាលាខេត្ត។ អំណោយទាំងអស់នេះនឹងត្រូវយកទៅចែកជូនដល់បងប្អូនប្រជាពលរដ្ឋដែលបានជម្លៀសខ្លួនចេញពីលំនៅឋាន និងចែកជូនដល់កងកម្លាំងប្រចាំការឈរជើងតាមខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តបន្ទាយមានជ័យ។

ក្នុងពិធីទទួលអំណោយនោះ ឯកឧត្តម អ៊ុ រាត្រី បានសម្តែងការកោតសរសើរ និងថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសរបស់លោកឧកញ៉ា ឡាច ប៊ុនលីម និងលោកជំទាវ ខា លីនដា។ ឯកឧត្តមបានគូសបញ្ជាក់ថា "ការចូលរួមឧបត្ថម្ភរបស់លោកឧកញ៉ា និងលោកជំទាវ គឺជាការលើកទឹកចិត្ត និងឆ្លុះបញ្ចាំងឲ្យឃើញពីការចូលរួមចំណែកសម្រាលការលំបាករបស់កងកម្លាំង ដែលបានលះបង់កម្លាំងកាយចិត្តការពារបូរណភាពទឹកដី ស្របតាមអនុសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានចាត់ទុកកងកម្លាំងប្រដាប់អាវុធជាសមរភូមិមុខ និងសមរភូមិក្រោយ ក្នុងការរួមគ្នាការពារជាតិមាតុភូមិពីសំណាក់សត្រូវឈ្លានពាន"។

ក្នុងឱកាសដ៏សំខាន់នេះដែរ ឯកឧត្តមអភិបាលខេត្តបានបួងសួងដល់វត្ថុស័ក្តិសិទ្ធិក្នុងលោក ទេវតាឆ្នាំថ្មី សូមជួយប្រោះព្រំប្រសិទ្ធិពរជ័យ សិរីសួស្តី វិបុលសុខគ្រប់ប្រការជូនដល់លោកឧកញ៉ា ឡាច ប៊ុនលីម លោកជំទាវ ខា លីនដា ព្រមទាំងក្រុមគ្រួសារ និងប្រជាពលរដ្ឋទាំងអស់។ ឯកឧត្តមក៏បានបួងសួងសុំឱ្យសង្គ្រាមឈ្លានពានលើទឹកដីខ្មែរឆាប់ផុតរលត់ និងសុំឱ្យពួកចោរឈ្លានពានវិនាសអន្តរាយអស់ទៅផងដែរ។ អំណោយដ៏ថ្លៃថ្លានេះមិនត្រឹមតែជាការជួយឧបត្ថម្ភជាសម្ភារប៉ុណ្ណោះទេ ប៉ុន្តែក៏ជាការបង្ហាញពីស្មារតីសាមគ្គីភាព និងការយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋ និងកងកម្លាំងការពារជាតិ ដែលជាកម្លាំងស្នូលក្នុងការថែរក្សាសន្តិភាព និងបូរណភាពទឹកដី៕

ដោយ ឈុន សារ៉ាត