AKP ភ្នំពេញ ថ្ងៃទី១១ ខែសីហា ឆ្នាំ២០២៥-- ឯកឧត្ដមបណ្ឌិត លី ធុជ បានជំរុញឱ្យវិនិយោគិនចិន ពិចារណាសិក្សាពីលទ្ធភាពក្នុងការវិនិយោគបន្ថែមនៅកម្ពុជា ស្របតាមទស្សនវិស័យរបស់សម្តេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា។

ឯកឧត្តមបណ្ឌិត លី ធុជ ទេសរដ្ឋមន្រ្តី និងជាប្រធានគណៈកម្មាធិការជាតិសេដ្ឋកិច្ច សង្គម សម្រាប់តំបន់អាស៊ី និងអាស៊ីប៉ាស៊ីហ្វិក (អេស្កាប់) បានជំរុញបែបនេះ ខណៈឯកឧត្ដមចូលរួមក្នុងពិធីបង្ហាញវិស័យនយោបាយសេដ្ឋកិច្ច វេទិកាកាលានុវត្តភាពនៃការវិនិយោគកម្ពុជា-ចិន ជូនចំពោះវិនិយោគិនចិន និងម្ចាស់ក្រុមហ៊ុនម៉ាកយីហោល្បីៗនៅចិន ដែលរៀបចំដោយគណៈកម្មការរៀបចំមហោស្រពម៉ាយីហោចិន លើកទី១៩ ឆ្នាំ២០២៥ នៅទីក្រុងស៊ិនជិន ប្រទេសចិន កាលពីរាត្រីថ្ងៃទី០៩ ខែសីហា ឆ្នាំ២០២៥។

ឯកឧត្តមបណ្ឌិត លី ធុជ បានបញ្ជាក់ថា រយៈពេល៦៧ឆ្នាំនៃចំណងការទូតជាផ្លូវការចាប់ពីឆ្នាំ១៩៥៨ កម្ពុជា-ចិនបានពង្រឹង និងពង្រីកនូវចំណងមិត្តភាពឱ្យកាន់តែស៊ីជម្រៅ កាន់តែជិតស្និទ្ធ កាន់តែរឹងមាំ ជាមិត្តដែកថែប ដើម្បីបម្រើឱ្យផលប្រយោជន៍នៃប្រជាជន និងប្រជាជាតិទាំងពីរ ជាពិសេស ក្នុងដំណើរទស្សនកិច្ចជាច្រើនលើករបស់ប្រមុខរាជរដ្ឋាភិបាលកម្ពុជា ចាប់តាំងពីឆ្នាំ១៩៩៩ បានធ្វើឱ្យទំនាក់ទំនងកម្ពុជា និងចិន ឈានដល់ការបង្កើតភាពជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយកម្ពុជា-ចិន។ កម្ពុជា និងចិន គឺជាបងប្អូនល្អ និងមិត្តភក្តិពិតប្រាកដ ហេតុដូចច្នេះ កម្ពុជាស័ក្តិសមជាដៃគូវិនិយោគដ៏ល្អរបស់វិនិយោគិនចិន។

កម្ពុជាមានលក្ខណៈសម្បត្តិគ្រប់គ្រាន់ និងមានហេដ្ឋរចនាសម្ព័ន្ធប្រកបដោយគុណភាព រួមទាំងផ្លូវថ្នល់ ផ្លូវដែក កំពង់ផែ ព្រលានយន្តហោះ ប្រព័ន្ធគមនាគមន៍ អគ្គិសនី បណ្តាញចែកចាយទឹកស្អាត និងកម្លាំងពលកម្មវ័យក្មេង និងសកម្ម ព្រមទាំងមានច្បាប់វិនិយោគលើកទឹកចិត្តវិនិយោគិន ដែលផ្តល់អំណោយផលយ៉ាងខ្លាំងដល់ការវិនិយោគលើគ្រប់វិស័យនៅកម្ពុជា ជាពិសេស កម្ពុជាក៏មានកិច្ចព្រមព្រៀងពាណិជ្ជកម្មសេរីជាមួយប្រទេសចិនផងដែរ។ រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនវិស័យរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានប្តេជ្ញាយ៉ាងម៉ឺងម៉ាត់ជូនចំពោះវិនិយោគិនទាំងអស់ ទទួលបាននូវកិច្ចការពារ ឱកាសវិនិយោគយ៉ាងច្រើនសន្ធឹកសន្ធាប់ និងជំនឿទុកចិត្តសម្រាប់ការវិនិយោគនៅកម្ពុជា ដើម្បីឱ្យការធ្វើអាជីវកម្មរបស់វិនិយោគិនមានការរីកចម្រើនប្រកបដោយសុចរិតភាព។

រាជរដ្ឋាភិបាលកម្ពុជាសូមស្វាគមន៍ និងលើកទឹកចិត្តដល់វិនិយោគិនទាំងអស់ឱ្យពិចារណាសិក្សាពីលទ្ធភាពក្នុងការវិនិយោគបន្ថែមនៅកម្ពុជា ស្របតាមទស្សនវិស័យដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដើម្បីជំរុញការវិនិយោគដោយផ្ទាល់នៅកម្ពុជា ជាពិសេសរួមចំណែកក្នុងការអនុវត្ត គំនិតផ្តួចផ្តើមខ្សែក្រវាត់ និងផ្លូវ របស់រដ្ឋាភិបាលចិន និង កិច្ចសហប្រតិបត្តិការត្បូងពេជ្រកម្ពុជា-ចិន។  កន្លងមក រាជរដ្ឋាភិបាលកម្ពុជាអរគុណដល់វិនិយោគិនទាំងអស់ ដែលតែងតែផ្តល់នូវទំនុកចិត្ត និងជឿជាក់លើការដឹកនាំរបស់រាជរដ្ឋាភិបាលកម្ពុជា ជាពិសេសចូលរួមក្នុងការបង្កើតឱកាសការងារយ៉ាងច្រើនសន្ធឹកសន្ធាប់ជូនប្រជាពលរដ្ឋកម្ពុជា និងលើកស្ទួយដល់ការរីកចម្រើនរបស់ប្រទេសកម្ពុជា៕

ដោយ សួស សំរិត