AKP កំពង់ធំ ថ្ងៃទី១១ ខែសីហា ឆ្នាំ២០២៥-- ឧត្តមសេនីយ៍ទោ ហេង សុផល ស្នងការនគរបាលខេត្ត និងជាអនុប្រធានគណៈកម្មការគ្រប់គ្រងគ្រោះមហន្តរាយ ខេត្តកំពង់ធំ បានមានប្រសាសន៍ថា ទីណាមានការលំបាកទីនោះតែងតែមានវត្តមានថ្នាក់ដឹកនាំ និងកងកម្លាំងជួយអន្តរាគមន៍ទាន់ពេលវេលា ក្នុងឱកាសដឹកនាំកងកម្លាំងចុះសាកសួរសុខទុក្ខប្រជាពលរដ្ឋដែលជួបឧបទ្ទវហេតុដោយសារខ្យល់កន្ទ្រាក់នៅភូមិកែរ៉ងឃុំឈើទាល ស្រុកសណ្តាន់ ខេត្តកំពង់ធំកាលពីថ្ងៃទី១០ ខែសីហា ឆ្នាំ២០២៥។

ឧត្តមសេនីយ៍ទោ ហេង សុផល បានបញ្ជាក់ថា បន្ទាប់ពីទទួលបានព័ត៌មានបន្ទាន់ និងដោយមានការចង្អុលបង្ហាញពីឯកឧត្តម នួន ផារ័ត្ន អភិបាលខេត្ត និងជាប្រធានគណៈកម្មការគ្រប់គ្រងគ្រោះមហន្តរាយខេត្ត លោកបានដឹកនាំកងកម្លាំង ចុះជួយអន្តរាគមន៍ដល់គេហដ្ឋានបងប្អូននាឱកាសនេះ។ 

ក្នុងឱកាសនោះ ឧត្តមសេនីយ៍ទោស្នងការនគរបាលខេត្តកំពង់ធំបានពាំនាំប្រសាសន៍ផ្ដាំផ្ញើពីសំណាក់ថ្នាក់ដឹកនាំក្រសួងមហាផ្ទៃ ឯកឧត្តមនាយឧត្តមសេនីយ៍ អគ្គស្នងការនគរបាលជាតិ ឯកឧត្តមអភិបាលខេត្តនិងជាប្រធានគណៈបញ្ជាការឯកភាពរដ្ឋបាលខេត្តថ្នាក់ដឹកនាំតែងតែយកចិត្តទុកដាក់គិតគូរអំពីសុខទុក្ខសុខុមាលភាព ការប្រកបមុខរបរចិញ្ចឹមជីវិតរបស់បងប្អូនជាប្រចាំថ្ងៃ។ 

ឧត្តមសេនីយ៍ទោ ហេង សុផល បានសម្ដែងនូវការចូលរួមសោកស្តាយយ៉ាងក្រៃលែង ចំពោះការខូចខាតទីជម្រកកន្លែងស្នាក់នៅ និងទ្រព្យសម្បត្តិមួយចំនួន របស់បងប្អូនដោយសារបាតុភូតធម្មជាតិខ្យល់កន្ត្រាក់។បាតុភូតខ្យល់កន្ត្រាក់បានកើតឡើងកាលពីរសៀលថ្ងៃទី០៩ ខែសីហា ឆ្នាំ២០២៥ បណ្ដាលឱ្យរលំផ្ទះប្រជាពលរដ្ឋ០១ខ្នង និងរបើកដំបូលចំនួន០៥ខ្នងតែមិនប៉ះពាល់ដល់អាយុជីវិតមនុស្សនោះទេ។

ឧត្តមសេនីយ៍ទោ ហេង សុផល បានលើកទឹកចិត្តដល់បងប្អូនប្រជាពលរដ្ឋ បើជួបការលំបាក ឬបញ្ហាប្រឈម ដោយប្រការណាមួយ សូមបងប្អូនទំនាក់ទំនងមកអង្គភាព ស្នងការដ្ឋាននគរបាលខេត្ត អធិការដ្ឋាននគរបាលស្រុកឬប៉ុស្តិ៍នគរបាលរដ្ឋបាល ដើម្បីមានមូលដ្ឋានជួយអន្តរាគមន៍ ដោះស្រាយជូនបងប្អូន បានទាន់ពេលវេលា។

សូមបញ្ជាក់ថា ក្នុងឱកាសនោះ ឧត្តមសេនីយ៍ទោ ហេង សុផល បានឧបត្ថម្ភជូនដល់ប្រជាពលរដ្ឋ ដែលរង់គ្រោះដោយសារខ្យល់កន្ត្រាក់រួមមាន៖ ១- ផ្ទះរលំ១គ្រួសារទទួលបានថវិកា២០ម៉ឺនរៀល អង្ករ៥០គីឡូក្រាម ឃីត០១កញ្ចប់។ ២- ផ្ទះរបើកដំបូលចំនួន០៥គ្រួសារ ក្នុង០១គ្រួសារទទួលបានថវិកា១០ម៉ឺនរៀល អង្ករ៥០គីឡូក្រាម ឃីត០១កញ្ចប់ផងដែរ៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)