AKP កំពង់ស្ពឺថ្ងៃទី១ ខែសីហា ឆ្នាំ២០២៥--ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ អញ្ជើញជាអធិបតីភាពក្នុងពិធីជំនួបសំណេះសំណាលជាមួយគណ:គ្រប់គ្រង បុគ្គលិក សាស្ត្រាចារ្យនិងនិស្សិតនៃសាកលវិទ្យាល័យអង្គរខេមរា ខេត្តកំពង់ស្ពឺ នៅសាលប្រជុំធំអគាររដ្ឋបាលខេត្តកំពង់ស្ពឺកាលពីរសៀលថ្ងៃទី១០ ខែសីហា ឆ្នាំ២០២៥។

ក្នុងឱកាសនោះឯកឧត្តមអភិបាលខេត្តកំពង់ស្ពឺ បាន​លើកឡើងថា ប្រមុខរាជរដ្ឋាភិបាលនៃកម្ពុជាគឺសម្តេចមហាបវរធិបតី ហ៊ុន ម៉ាណែត បាន​ផ្តល់​ឱកាស​ឱ្យវិស័យ​ឯកជន​ចូលរួម​វិនិយោគ​លើវិស័យអប់រំ ដោយចាប់ផ្តើមពីថ្នាក់បឋម រហូត​ដល់​ឧត្តមសិក្សា នេះជាឱកាសល្អបំផុតសម្រាប់សិស្សនិស្សិតយើងផងដែរ។

ទន្ទឹមនេះឯកឧត្តមបណ្ឌិត ជាម ច័ន្ទសោភ័ណ ក៏បានថ្លែងនូវការកោតសរសើរ​ផងដែរទៅ​ដល់និស្សិត យុវជន យុវនារី​នៃខេត្តកំពង់ស្ពឺ ដែល​ស្រវាស្រទេញចំពោះការសិក្សា ចង់ចេះ ចង់ដឹង និងដើរឱ្យទាន់សម័យកាលសកលភាវូបនីយកម្ម និងបច្ចេកវិទ្យាវិទ្យាសាស្ត្រ។ជាមួយនោះដែរ សាស្ត្រាចារ្យត្រូវប្រកាន់ភ្ជាប់នូវគោលការណ៍បណ្តុះបណ្តាលនិងស្រាវជ្រាវតាមបែបវិទ្យាសាស្រ្តនេះជានិច្ច ដោយសារគោលការណ៍សិក្សាស្រាវជ្រាវតាមបែបវិទ្យាសាស្រ្តនេះនិងជួយឱ្យនិស្សិតមានចំណេះជំនាញពិតប្រាកដ ដើម្បីប្រកួតប្រជែងគុណភាពធនធានមនុស្សជាមួយបណ្តាប្រទេសអភិវឌ្ឍន៍នានា។បច្ចុប្បន្នការបណ្តុះបណ្តាលនៅតាមសកលវិទ្យាល័យក្នុងប្រទេសឱ្យមានគុណភាព វាមិនខុសពីការបណ្តុះបណ្តាលនៅតាមបណ្តាប្រទេសអភិវឌ្ឍន៍នោះទេ ដូចនេះនិស្សិតទាំងអស់ត្រូវតែគោរពវិន័យ និងខិតខំប្រឹងប្រែងសិក្សាស្រាវជ្រាវក្រេបយកចំណេះវិជ្ជាពីសាស្រ្តាចារ្យជំនាញរៀងៗខ្លួន ស្របតាមគោលការណ៍បណ្តុះបណ្តាលនិងស្រាវជ្រាវតាមបែបវិទ្យាសាស្ត្ររបស់សកលវិទ្យាល័យឱ្យបានត្រឹមត្រូវ។ហើយក្រោយបញ្ចប់បងប្អូន ក្មួយៗនិស្សិតនិងមានឱកាសចូលរួមលើកស្ទួយប្រទេសជាតិយើងឱ្យមានការអភិវឌ្ឍន៍រីកចម្រើន។

លើកឡើងនៅក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ ក៏បានលើកទឹកចិត្តបន្ថែមដល់និស្សិតទាំងអស់កុំអស់សង្ឃឹម ហើយបោះបង់ការសិក្សានៅពាក់កណ្តាលទីឱ្យសោះ  ហើយប្រសិនជាមានការលំបាកខ្លាំងឬមានឧបសគ្គអ្វីមួយសូមទំនាក់ទំនងមករដ្ឋបាលខេត្ត ឬអភិបាលខេត្តផ្ទាល់ដើម្បីឱ្យរដ្ឋបាលខេត្តក៏ដូចអភិបាលខេត្តអាចជួយទំនុកបំរុងបន្ថែមដើម្បីមានលទ្ធភាពអាចបញ្ចប់ការសិក្សា។ក្នុងនោះអភិបាលខេត្តក៏បានប្រកាសជួយជ្រោមជ្រែងដល់សិស្សក្រីក្រចំនួន២២នាក់និងសិស្សដែលមានពិការ២នាក់ឱ្យមានលទ្ធភាពអាចសិក្សារហូតដល់បញ្ចប់ថ្នាក់បរិញ្ញាបត្រនៅសកលវិទ្យាល័យអង្គរខេមរានាខេត្តកំពង់ស្ពឺនេះ៕

ដោយ៖ លឹម សាន្ត