AKP កំពង់ស្ពឺ ថ្ងៃទី១១ ខែសីហា ឆ្នាំ២០២៥-- លោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បាន និងកំពុងជួយអន្តរាគមន៍បូមទឹកបញ្ចូលទៅប្រឡាយមេ និងប្រឡាយជើងក្អែប ដើម្បីឱ្យប្រជាពលរដ្ឋអាចបូមបន្តបញ្ចូលទៅក្នុងស្រែរបស់ខ្លួនដែលកំពុងរងផលប៉ះពាល់ ក្រោយមិនមានភ្លៀងធ្លាក់នៅកូនរដូវប្រាំងនេះ។ ការជួយអន្តរាគមន៍នេះធ្វើឡើងនៅថ្ងៃទី១០ ខែសីហា ឆ្នាំ២០២៥។

លោក យឹម ណន បានលើកឡើងថា នៅដើមខែសីហានេះ ខេត្តកំពង់ស្ពឺបានរងគ្រោះដោយភាពរាំងស្ងួតធ្វើឱ្យផលដំណាំមួយចំនួនរបស់ពលរដ្ឋស្រុកសំរោងទងរងការខូចខាត។ បច្ចុប្បន្នភូមិចំនួន៥ក្នុងឃុំវល្លិ៍សរ ស្រុកសំរោងទង មានផ្ទៃដីស្រែប្រមាណជាង២០០ហិកតា កំពុងទាមទារឲ្យមានការជួយសង្គ្រោះ។

លោកប្រធានមន្ទីរបានបន្ថែមថា មន្ទីរធនធានទឹក និងឧតុនិយមខេត្ត ក្រោមការដឹកនាំផ្ទាល់របស់លោក ញ៉ាញ់ ជាបហ៊ង បានដាក់ម៉ាស៊ីនខ្នាតធំ ដើម្បីបូមទឹកចេញពីប្រឡាយមេទម្លាក់ទៅក្នុងប្រឡាយជើងក្អែប ដោយការបូមធ្វើឡើងពីរដំណាក់កាល។ ក្នុងនោះពលរដ្ឋម្ចាស់ស្រែបានដាក់ម៉ាស៊ីនដើម្បីបូមទម្លាក់ទៅក្នុងស្រែរៀងៗខ្លួន។

ជាមួយការដឹកនាំអន្តរាគមន៍បូមទឹកសង្គ្រោះនេះ លោកប្រធានមន្ទីរបានរំពឹងថានឹងអាចសង្គ្រោះស្រូវចេញពីការខូចខាតបានក្នុងរយៈដ៏ខ្លីខាងមុខ ព្រោះខេត្តមានអាងទំនប់ស្តុកទឹកច្រើនកន្លែង ដែលមានសមត្ថភាពក្នុងការបង្ហូរទឹកទៅដល់ចំណុចរងគ្រោះ។ ជាមួយនោះក៏ទាមទារឱ្យម្ចាស់ស្រែដែលរងផលប៉ះពាល់ទាំងអស់ ជួយរាយការណ៍មកអាជ្ញាធរមូលដ្ឋាននៅជិត ដើម្បីឱ្យជំនាញមានលទ្ធភាពក្នុងការជួយសង្គ្រោះបានទាន់ពេលវេលា៕

ដោយ លឹម សាន្ត