AKP ភ្នំពេញ ថ្ងៃទី១០ ខែសីហា ឆ្នាំ២០២៥ -- សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា មានប្រសាសន៍ថា តាមការសង្កេតនៅពេលសម្ដេចបង្ហោះសារម្តងៗ មានប្រជាជនថៃលើស៥ភាគរយចូលមើល និងខ្ពស់បំផុតពេលសម្ដេចបង្ហោះសារទាក់ទងដល់ការប្រើប្រាស់ជំពាមកៅស៊ូជាអាវុធក្នុងចំណោមអ្នកចូលមើលមានប្រជាជនថៃចំនួន១៧.១%ចូលមើលផងដែរ។

នៅលើបណ្ដាញទំនាក់ទំនងសង្គម នាព្រលប់ថ្ងៃទី ១០ ខែសីហា ឆ្នាំ២០២៥ សម្ដេចតេជោបានសរសេរថា ព្រឹកម៉ិញខ្ញុំបានបង្ហោះសកម្មភាពវាយកូនគោលរបស់ខ្ញុំ។ ខ្ញុំមិននឹកស្មានថាមានកាសែតថៃមួយយកទៅចុះផ្សាយនោះទេ ដែលនេះបង្ហាញឱ្យឃើញថាប្រជាជនថៃមួយចំនួនបានតាមដានសកម្មភាពខ្ញុំជាប្រចាំ។ សម្ដេចតេជោបន្តថា តាមការសង្កេតនៅពេលខ្ញុំបង្ហោះសារម្តងៗ មានប្រជាជនថៃលើស៥ភាគរយចូលមើល និងខ្ពស់បំផុតពេលខ្ញុំបង្ហោះសារទាក់ទងដល់ការប្រើប្រាស់ជំពាមកៅស៊ូជាអាវុធ ក្នុងចំណោមអ្នកចូលមើលមានប្រជាជនថៃចំនួន១៧.១%ចូលមើលផងដែរ។ 

សម្ដេចតេជោបានបញ្ជាក់ទៀតថា  រៀងរាល់ការបង្ហោះរបស់ខ្ញុំ តែងមានជនជាតិថៃដែលអាក្រក់មួយចំនួនចូលមករំខានដោយការខមិន (comments) ជាភាសាថៃ ឬអង់គ្លេសក្នុងន័យអាក្រក់ដល់កម្ពុជា។ ខ្ញុំមិនឱ្យបិទចោលនោះទេតែពេលខ្លះ ខ្ញុំឆ្លើយតបខ្លីថា(Don’t Thai to me)៕

ដោយ៖ ជឹម ណារី