AKP ភ្នំពេញ ថ្ងៃទី១០ ខែសីហា ឆ្នាំ២០២៥ -- ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានអះអាងថា បេះដូងស្រឡាញ់សន្តិភាពរបស់ថ្នាក់ដឹកនាំកម្ពុជានិងប្រជាពលរដ្ឋខ្មែរដែលស្របស្របទៅនឹងស្មារតីរបស់សហគមន៍អន្តរជាតិ គឺជាចន្ទល់ដ៏រឹងមាំក្នុងការទ្រង់ទ្រង់កិច្ចព្រមព្រៀងឈប់បាញ់ឱ្យមានប្រសិទ្ធភាព។

ក្នុងឱកាសនៃការធ្វើសេចក្តីសង្ខេបព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាសៀលថ្ងៃទី១០ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានថ្លែងថា កិច្ចព្រមព្រៀងឈប់បាញ់នេះកំពុងត្រូវបានអនុវត្តក្រោមក្រសែភ្នែកតាមដានរបស់បណ្ដាប្រទេសដែលស្រឡាញ់សន្តិភាព ក្នុងនោះមានក្រុមអ្នកសង្កេតការណ៍អន្តរកាល បណ្ដាអង្គទូត អនុព័ន្ធយោធាបរទេស ជាពិសេសក្រោមក្រសែភ្នែកយកចិត្តទុកដាក់របស់ប្រទេសទាំងបីដែលដើរតួនាទីស្នូលក្នុងការបង្កើតនូវកិច្ចព្រមព្រៀងនេះឱ្យចេញជារូបរាងគឺ៖ សហរដ្ឋអាមរិក ម៉ាឡេស៊ី និង ចិន។ 

ទន្ទឹមនេះ ដំណើរធម្មយាត្រារបស់ព្រះសង្ឃចំនួន២៥៦៩អង្គ នៅក្នុងរាជធានីភ្នំពេញ នារសៀលថ្ងៃនេះគឺជាសក្ខីភាពមួយថ្មីទៀតដែលបញ្ជាក់ពីស្មារតីស្រឡាញ់សន្តិភាពរបស់កម្ពុជា។ កម្ពុជាសូមបញ្ជាក់ជាថ្មីម្ដងទៀត នូវការប្ដេជ្ញាចិត្តយ៉ាងមុតមាំក្នុងការគោរពកិច្ចព្រមព្រៀងឈប់បាញ់នេះ និងសូមទទូចឱ្យភាគីថៃគោរពឱ្យបានពេញលេញនូវកិច្ចព្រមព្រៀងឈប់បាញ់ដែលភាគីទាំងពីរបានព្រមព្រៀងគ្នារក្សាកម្លាំងយោធារបស់ខ្លួននៅទីតាំងបច្ចុប្បន្នដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងក្នុងពេលកិច្ចព្រមព្រៀងឈប់បាញ់បានចូលជាធរមានកាលពីវេលាម៉ោង១២អធ្រាត្រថ្ងៃទី២៨ខែកក្កដា ឆ្នាំ២០២៥នោះឡើយ។ ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការចល័តកងទ័ពទៅកាន់ទីតាំងរបស់ភាគីម្ខាងទៀតឡើយ។ 

ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាលកម្ពុជា ក៏បានសំណូមពរឱ្យបងប្អូនប្រជាពលរដ្ឋខ្មែរទាំងក្នុងនិងក្រៅប្រទេសរក្សាភាពនឹងនរ កុំជ្រួលច្របល់ចាញ់កល់ព័ត៌មានក្លែងក្លាយឬព័ត៌មានចាស់ៗដែលត្រូវបានគេបង្ហោះដើម្បីបន្លំភ្នែកសាធារណៈមតិ ជាពិសេសបន្លំភ្នែកប្រជាជនថៃ ប៉ុន្តែប្រជាពលរដ្ឋខ្មែរទាំងក្នុងនិងក្រៅប្រទេសមានស្មារតីសាមគ្គីភាពយ៉ាងរឹងមាំ និងមានទំនុកចិត្តលើរាជរដ្ឋាភិបាល លើថ្នាក់ដឹកនាំ និងលើក្រសួងការពារជាតិ ក៏ដូចជា លើវីរកងទ័ព វីរកងកម្លាំងប្រដាប់អាវុធគ្រប់ប្រភេទក្នុងការការពារបូរណភាពទឹកដីរបស់ខ្លួន៕

ដោយ៖ គង់ សិរីរ័ត្ន