AKP ភ្នំពេញ ថ្ងៃទី០៩ ខែសីហា ឆ្នាំ២០២៥ -- ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានធ្វើបច្ចុប្បន្នភាពស្តីពីប្រតិកម្មរបស់ពិភពលោកចំពោះលទ្ធផលនៃកិច្ចប្រជុំរបស់គណៈកម្មាធិការកិច្ចការព្រំដែនទូទៅ (GBC) នៅប្រទេសម៉ាឡេស៊ី កាលពីថ្ងៃទី០៧ ខែសីហា ឆ្នាំ២០២៥ ដែលធ្វើ ឱ្យសម្រេចបាននូវកិច្ចព្រមព្រៀងចំនួន១៣ចំណុចរវាងកម្ពុជា-ថៃ ដោយទទួលបាននូវការអបអរសាទរពី សហគមន៍អន្តរជាតិ។ ការលើកឡើងរបស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាយ៉ាងដូច្នេះ ក្នុងឱកាសនៃការធ្វើសេចក្តីសង្ខេបព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នារសៀលថ្ងៃទី០៩ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ឯកឧត្តម ជុំ សុន្ទរី មានប្រសាសន៍ថា បណ្តាប្រទេសដែលជាដៃគូរបស់អាស៊ាន និងតួអង្គចូលរួមជាគន្លឹះ បានស្វាគមន៍ចំពោះកិច្ចព្រមព្រៀងខាងលើ ដោយបានចាត់ទុកវាថាជាជំហានដ៏សំខាន់មួយឆ្ពោះទៅរកការបន្ធូរបន្ថយភាពតានតឹង និងការកសាងស្ថិរភាពនៅតាមបណ្តោយព្រំដែនកម្ពុជា-ថៃ ខណៈដែលប្រទេសម៉ាឡេស៊ី ដែលជាប្រធានប្តូរវេនរបស់អាស៊ានកំពុងតែសម្របសម្រួលក្រុមអ្នកសង្កេតការណ៍ អន្តរកាល ដែលជាផ្នែកមួយនៃកិច្ចខិតខំប្រឹងប្រែងរបស់អាស៊ានក្នុងការត្រួតពិនិត្យបទឈប់បាញ់។ ដោយឡែកឥណ្ឌូណេស៊ី និងសឹង្ហបូរីបានសម្តែងការគាំទ្រចំពោះកិច្ចព្រមព្រៀង ថែមទាំងបានសង្កត់ធ្ងន់ទៅលើសារៈសំខាន់នៃការអនុវត្តកិច្ចព្រមព្រៀងនេះដោយសុទ្ធចិត្ត។ ជាមួយគ្នានេះសហរដ្ឋអាមេរិកបាន ស្វាគមន៍ចំពោះលទ្ធផលនៃកិច្ចប្រជុំរបស់គណៈកម្មាធិការកិច្ចការព្រំដែនទូទៅ (GBC) ដោយបានចាត់ ទុកវាថាជាជំហានស្ថាបនាដ៏សំខាន់មួយឆ្ពោះទៅរកការពង្រឹងបទឈប់បាញ់ និងការកសាងស្ថិរភាពនៅ ក្នុងតំបន់ ដោយរដ្ឋមន្ត្រីក្រសួងការបរទេសសហរដ្ឋអាមេរិកបានរំពឹងទុកថា ភាគីទាំងពីរកម្ពុជា-ថៃ នឹង គោរពបានយ៉ាងពេញលេញ និងប្រកបដោយការតាំងចិត្តចំពោះកិច្ចព្រមព្រៀងនេះ ហើយសហរដ្ឋអាមេ រិកក៏បានអះអាងជាថ្មីម្តងទៀតនូវការគាំទ្ររបស់ខ្លួនចំពោះយន្តការដឹកនាំដោយអាស៊ាន និងបានគូស បញ្ជាក់ពីការបន្តនូវការចូលរួមរបស់ខ្លួនតទៅទៀត។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានថ្លែងបន្ថែមថា ដោយឡែកប្រទេសចិនក៏បានស្វាគមន៍ចំពោះយន្តការដែលបានបង្កើតឡើងដើម្បីទ្រទ្រង់បទឈប់បាញ់ និងបានអះអាងថា ចិននៅតែបន្តគាំទ្រនូវកិច្ចសន្ទនា និងការរកដំណោះស្រាយតាមផ្លូវការទូតដែលដឹកនាំដោយអាស៊ាន ដោយចិនបានសន្យាថានឹងចូលរួមប្រកបដោយការស្ថាបនា ក្នុងការជួយដល់ប្រទេសទាំងពីរកម្ពុជា-ថៃ ក្នុងការដោះស្រាយជម្លោះព្រំដែន ខណៈដែលប្រទេសជប៉ុនបានស្វាគមន៍យ៉ាងកក់ក្តៅចំពោះកិច្ចព្រម ព្រៀងលើបទឈប់បាញ់ ដោយរដ្ឋមន្ត្រីក្រសួងការបរទេសជប៉ុនបានសង្កត់ធ្ងន់ថា ទំនាក់ទំនងប្រកប ដោយស្ថិរភាពរវាងកម្ពុជា-ថៃ គឺជាកត្តាសំខាន់សម្រាប់សន្តិសុខ និងកិច្ចអភិវឌ្ឍន៍នៅក្នុងតំបន់ ព្រមទាំង បានលើកឡើងជាថ្មីម្តងទៀតចំពោះការតាំងចិត្តរបស់ប្រទេសជប៉ុន ក្នុងការគាំទ្រដល់ការអនុវត្តនូវឈប់ បាញ់ ហើយក្រៅពីនេះក៏នៅមានប្រទេសជាច្រើនទៀតបានស្វាគមន៍ចំពោះកិច្ចព្រមព្រៀងនៃបទឈប់ បាញ់នេះផងដែរ៕

ដោយ៖ ចាន់ សុភឿន