AKP កំពង់ធំ ថ្ងៃទី០៩ ខែសីហា ឆ្នាំ២០២៥ -- កាលពីព្រឹកថ្ងៃសុក្រ ទី០៨ ខែសីហា ឆ្នាំ២០២៥ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អមដំណើរដោយថ្នាក់ដឹកនាំ ភរិយាថ្នាក់ដឹកនាំ និងសប្បុរសជនជាច្រើនរូប បានអញ្ជើញចុះសំណេះសំណាល សួរសុខទុក្ខ និងផ្តល់អំណោយមនុស្សធម៌ជូនប្រជាជនភៀសសឹកចំនួន ២.៣៨៤គ្រួសារ ស្មើនឹង ៦.៣៣០នាក់ ដែលមកស្នាក់នៅបណ្តោះអាសន្នពីបណ្តាក្រុង/ស្រុកទាំង៩ ក្នុងខេត្តកំពង់ធំ ហើយក្នុងនោះជនភៀសសឹកមកពីខេត្តព្រះវិហារមានចំនួន ៨១៨គ្រួសារ មកពីខេត្តឧត្តរមានជ័យមានចំនួន ១.៤០២គ្រួសារ និងចំនួន ១៦៤គ្រួសារទៀតមកពីខេត្តបន្ទាយមានជ័យ បាត់ដំបង ប៉ៃលិន និងខេត្តកោះកុង ដោយពិធីនេះបានប្រព្រឹត្តទៅនៅពហុកីឡដ្ឋាន ស្ថិតក្នុងភូមិរូង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។

ឯកឧត្តម នួន ផារ័ត្ន អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាសាខាខេត្តកំពង់ធំ បានឡើងថ្លែងមតិស្វាគមន៍ដោយបានគូសបញ្ជាក់ថា «ឆ្លើយតបទៅនឹងការលំបាករបស់ប្រជាពលរដ្ឋភៀសសឹកនេះ កាកបាទក្រហមកម្ពុជា ដែលជាស្ថាប័នមនុស្សធម៌គ្មានព្រំដែន ដឹកនាំដោយ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលប្រជាជនប្រសិទ្ធនាមថាជា មាតាមនុស្សធម៌ បានធ្វើសកម្មភាពយ៉ាងសស្រាក់សស្រាំជាមួយរាជរដ្ឋាភិបាល និងអាជ្ញាធរពាក់ព័ន្ធ ដើម្បីចែកជូននូវស្បៀងអាហារ និងសម្ភារៈប្រើប្រាស់ផ្សេងៗ ជាបន្តបន្ទាប់ ដើម្បីចូលរួមរំលែកទុក្ខលំបាករបស់ប្រជាពលរដ្ឋ។ ជាក់ស្តែង កម្មវិធីចែកអំណោយនៅថ្ងៃនេះ ពិតណាស់នឹងអាចចូលរួមចំណែកយ៉ាងសំខាន់ក្នុងការសម្រាលការលំបាករបស់បងប្អូនប្រជាពលរដ្ឋដែលកំពុងភៀសខ្លួនចេញពីតំបន់ដែលកំពុងប្រឈមនឹងភាពតានតឹង»។

ក្នុងឱកាសជួបសំណេះសំណាលសួរសុខទុក្ខជាមួយប្រជាជនភៀសសឹកទាំងអស់នោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មានក្តីក្តុកក្តួលរំជួលចិត្ត អាណិតអាសូរយ៉ាងក្រៃលែងជាមួយលោកយាយលោកតា បងប្អូនជនភៀសសឹកទាំងអស់ ដែលបង្ខំចិត្តចាកចោលផ្ទះសម្បែងដោយសារភាពតានតឹងនៅតាមព្រំដែន។ ទន្ទឹមនឹងនេះដែរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានពាំនាំនូវព្រះរាជបន្ទូល និងព្រះសវណីយ៍ ផ្តាំផ្ញើសួរសុខទុក្ខ និងក្តីនឹករលឹក ពីព្រះករុណា ព្រះមហាក្សត្រ ជាអម្ចាស់ជីវិតលើត្បូង និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចកាល ព្រះអង្គទាំងទ្វេតែងតែគិតគូរពីសុខទុក្ខប្រជានុរាស្ត្ររបស់ព្រះអង្គនៅគ្រប់ទីកន្លែង គ្រប់ពេលវេលា។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងបញ្ជាក់ថា កាកបាទក្រហមកម្ពុជា ដែលជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ ទោះបីជាស្ថិតក្នុងកាល:ទេស:ណាក៏ដោយ ក៏កាកបាទក្រហមកម្ពុជានៅតែគិតគូរយកចិត្តទុកដាក់ដល់ប្រជាពលរដ្ឋគ្រប់ពេលវេលា ហើយស្បៀង និងសម្ភារៈដែលនាំមកចែកជូនជួយសម្រាលការលំបាកដល់បងប្អូនប្រជាពលរដ្ឋនាពេលនេះ គឺទទួលបានពីសប្បុរសជនគ្រប់មជ្ឈដ្ឋាន។

ថ្លែងពីលើវេទិកានោះដែរ សម្តេចកិត្តិព្រឹទ្ធបណ្ឌិត បានអំពាវនាវដល់បងប្អូនប្រជាពលរដ្ឋទាំងអស់ បើទោះបីជាមកពីខេត្តណា ឬទីកន្លែងណាក៏ដោយ សូមត្រូវចេះស្រឡាញ់រាប់អានគ្នាក្នុងស្មារតីជាខ្មែរ ឱ្យស័ក្តិសមនឹងវប្បធម៌ប្រពៃណីដ៏ល្អផូរផង់របស់ខ្មែរយើង។ ជាក់ស្តែង សម្តេចកិត្តិព្រឹទ្ធបណ្ឌិត បានមើលឃើញថា បងប្អូនប្រជាពលរដ្ឋខ្មែរយើង គឺតែងតែចេះជួយយកអាសាគ្នាទៅវិញទៅមក ជួយឧបត្ថម្ភគាំទ្រដល់អ្នកដែលជួបការលំបាកនៅគ្រប់កាលៈទេសៈទាំងអស់ ដូចពាក្យចាស់ពោលថា «ស្រឡាញ់គ្នាក្នុងគ្រាក្រ»។

ជាមួយគ្នានេះដែរ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា បានអំពាវនាវជូនដល់លោកយាយលោកតា និងបងប្អូនប្រជាពលរដ្ឋទាំងអស់ សូមថែរក្សាសុខភាពឱ្យបានល្អ សម្អាតបរិស្ថានជុំវិញផ្ទះឱ្យបានស្អាត ផឹកទឹកដាំឆ្អិនជានិច្ច ព្រោះសុខភាព គឺជាកត្តាចាំបាច់បំផុតសម្រាប់យើងម្នាក់ៗ ជៀសវាងមានជំងឺនានាដែលនាំឱ្យយើងចំណាយលុយកាក់ និងខាតបង់ពេលវេលាប្រកបរបរទទួលទាន ដូច្នេះសូមបងប្អូនប្រកាន់ខ្ជាប់ពាក្យស្លោក «ការពារប្រសើរជាងព្យាបាល»។ ដោយឡែក ចំពោះស្ត្រីមានផ្ទៃពោះទាំងអស់ បើទោះបីជាខ្លួនធ្លាប់បានសម្រាលកូនទី១ ឬទី២ ឬទី៣ ហើយក៏ដោយ ក៏សូមទៅពិនិត្យផ្ទៃពោះឱ្យបានទៀងទាត់ តាមការកំណត់របស់គ្រូពេទ្យជំនាញនៅតាមមណ្ឌលសុខភាព ឬមន្ទីរពេទ្យដែលនៅជិត ដែលជៀសវាងគ្រោះថ្នាក់ណាមួយជាយថាហេតុ។

សម្តេចកិត្តិព្រឹទ្ធបណ្ឌិត សូមជូនពរបងប្អូនប្រជាពលរដ្ឋទាំងអស់ សូមមានសុខភាពល្អ រកស៊ីទទួលទានមានបាន និងមានសុភមង្គលក្នុងក្រុមគ្រួសារនៅពេលដែលត្រឡប់ទៅកាន់គេហដ្ឋានរៀងៗខ្លួនវិញ។ ប្រជាពលរដ្ឋភៀសសឹកទាំងអស់មានក្តីរំភើប និងបានថ្លែងអំណរគុណយ៉ាងជ្រាលជ្រៅចំពោះទឹកចិត្តមេត្តា ករុណា និងការគិតគូរពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំពោះសុខទុក្ខរបស់ប្រជាពលរដ្ឋ ដោយមិនមានការរើសអើង និងមិនទុកនរណាម្នាក់ចោលឡើយ។

សូមបញ្ជាក់ថា គ្រួសារនីមួយៗទទួលបានអង្ករ ៣០គីឡូក្រាម មី ០១កេស ត្រីខ ១០កំប៉ុង ទឹកស៊ីអ៊ីវ  ០៦ដប ទឹកត្រី ០៦ដប ប្រេងឆា ០១ដប ម្សៅសាប៊ូ ០២គីឡូក្រាម ឃីត (សារុង ក្រមា មុង ភួយ) ០១កញ្ចប់ នំប៉័ង ០១ដើម ទឹកបរិសុទ្ធ ០១ដប និងថវិកា ៥ម៉ឺនរៀល។ ស្បៀង សម្ភារៈ និងថវិកា ខាងលើនេះ ជាអំណោយរបស់សប្បុរសជនតាមរយៈកាកបាទក្រហមកម្ពុជា៕

ដោយ: ស៊ុម វណ្ណា (ប្រភព: កាកបាទក្រហមកម្ពុជា)