AKP ភ្នំពេញ ថ្ងៃទី០៨ ខែសីហា ឆ្នាំ២០២៥-- ឯកឧត្ដម នេត្រ ភក្រ្តា រដ្ឋមន្ត្រីក្រសួងព័ត៌មាន បានអញ្ជើញក្នុងពិធីបិទវគ្គបណ្តុះបណ្តាលជំនាញបច្ចេកទេសកម្រិតមធ្យមលើកទី១ ស្ដីពី «បច្ចេកវិទ្យាប្រព័ន្ធផ្សព្វផ្សាយ ការផលិតព័ត៌មាន និងការផលិតមាតិកាផ្សព្វផ្សាយ» នៅសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន នៃទីស្តីការក្រសួងព័ត៌មាននៅរសៀលថ្ងៃទី០៨ ខែសីហា ឆ្នាំ២០២៥។ ក្នុងឱកាសនេះដែរ ឯកឧត្ដមរដ្ឋមន្ត្រីបានមានប្រសាសន៍ថា វគ្គបណ្តុះបណ្តាលជំនាញបច្ចេកទេសកម្រិតមធ្យមលើកទី១ ស្ដីពីបច្ចេកវិទ្យាប្រព័ន្ធផ្សព្វផ្សាយ ការផលិតព័ត៌មាន និងការផលិតមាតិកាផ្សព្វផ្សាយនឹងរួមចំណែកយ៉ាងសំខាន់ក្នុងការពង្រឹងសមត្ថភាពឱ្យសិក្ខាកាម ចូលរួមចំនួន ១២៦រូប មកពីស្ថាប័នសារព័ត៌មាននានា សរុបចំនួន ១៨អង្គភាព ក្លាយជាធនធានមនុស្សដែលមានសមត្ថភាពគ្រប់ជ្រុងជ្រោយ ដោយផ្អែកលើគុណភាព និងទេពកោសល្យខ្ពស់។

លោកស្រី ជា សុវណ្ណរ័ត្ន មន្រ្តីមកពីមន្ទីរព័ត៌មានខេត្តកោះកុង និងជាតំណាងឲ្យសិក្ខាមទាំអស់បានលើកឡើងថា សិក្ខាកាមទាំងអស់មានមោទកភាពយ៉ាងខ្លាំងចំពោះការរៀបចំវគ្គបណ្តុះបណ្តាលនេះ ហើយសូមថ្លែងអំណរគុណយ៉ាងជ្រាលជ្រៅដល់ ឯកឧត្តមរដ្ឋមន្ត្រី ដែលបានយកចិត្តទុកដាក់ និងគាំទ្រដល់ការអភិវឌ្ឍធនធានមនុស្ស លោកស្រីបន្តថា ការគាំទ្រនេះបានរួមចំណែកយ៉ាងសំខាន់ក្នុងការលើកកម្ពស់គុណភាពការងាររបស់សិក្ខាកាមទាំងអស់គ្នា។ លោកស្រីបានបន្ថែម សិក្ខាកាមទាំងអស់ សិក្ខាកាមមានសំណូមពរឱ្យមានការរៀបចំវគ្គបណ្តុះបណ្តាលបន្តបន្ទាប់ទៀត ដែលផ្តោតលើប្រធានបទស៊ីជម្រៅបែបនេះ ដូចជាការកាត់តវីដេអូកម្រិតខ្ពស់ ឬការគ្រប់គ្រងប្រព័ន្ធផ្សព្វផ្សាយសង្គម។ ទន្ទឹមនេះ ការបង្កើតឱកាសឱ្យសិក្ខាកាមបានអនុវត្តន៍ផ្ទាល់ នូវអ្វីដែលបានរៀននៅក្នុងថ្នាក់ ដើម្បីទទួលបានបទពិសោធន៍កាន់តែច្បាស់លាស់។

ឯកឧត្ដមរដ្ឋមន្ត្រីបានផ្តល់នូវអនុសាសន៍ផ្តាំផ្ញើទៅសិក្ខាកាមទាំងអស់ថា ត្រូវចំណេះដឹងដែលទទួលបានពីវគ្គនេះ ទៅអនុវត្តន៍ក្នុងការងារជាក់ស្តែង ដោយផ្តោតលើការផលិតព័ត៌មានប្រកបដោយគុណភាព, ការផលិតមាតិកាផ្សព្វផ្សាយដោយមានទំនួលខុសត្រូវ, ការធ្វើទីផ្សារសម្រាប់មាតិកាដែលបានផលិត, ការផលិតវីដេអូបទយកការណ៍ ដើម្បីទាក់ទាញចំណាប់អារម្មណ៍អ្នកទស្សនា, ការគ្រប់គ្រងហេដ្ឋារចនាសម្ព័ន្ធ និងប្រព័ន្ធផ្សព្វផ្សាយនៅក្នុងអង្គភាពខ្លួនប្រកបដោយសុវត្ថិភាព និងការពារ និងការបង្ការគ្រោះថ្នាក់ក្នុងការងារ។

ជាមួយគ្នានេះផងដែរ ឯកឧត្ដមរដ្ឋមន្រ្តីបានអំពាវនាវឱ្យសិក្ខាកាមទាំងអស់បន្តពង្រឹងសមត្ថភាពផ្ទាល់ខ្លួនជានិច្ច ទាំងផ្នែកចំណេះដឹង និងជំនាញ ដើម្បីក្លាយជាធនធានមនុស្សដែលមានគុណភាព សាកសមនឹងតម្រូវការរបស់ស្ថាប័ន និងសង្គមជាតិ៕

ដោយ ទូច វលក័្ខណ រូបថត៖ ខឹម សុវណ្ណារ៉ា