AKP ភ្នំពេញ ថ្ងៃទី០៨ ខែសីហា ឆ្នាំ២០២៥--ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានបញ្ជាក់សាជាថ្មីម្ដងទៀតពីគោលជំហរសន្តិភាពនិយម និងការគោរពច្បាប់អន្តរជាតិរបស់កម្ពុជា ដែលកំពុងតែទទួលបានការគាំទ្រ ដូចយើងទាំងអស់គ្នាបានដឹងស្រាប់ហើយថា ប្រមុខដឹកនាំរបស់យើងមានសម្ដេចតេជោ ហ៊ុន សែន ប្រធានព្រឹទ្ធសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងតែផ្ដល់តម្លៃខ្ពស់ណាស់ដល់សន្តិភាព ពីព្រោះសន្តិភាពគឺជាមូលដ្ឋានគ្រឹះនៃការអភិវឌ្ឍប្រទេស និងជាប្រភពនៃភាពសុខសាន្តរបស់ប្រជាពលរដ្ឋ។

ក្នុងឱកាសនៃការធ្វើសេចក្តីសង្ខេបព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នារសៀលថ្ងៃទី០៨ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាលកម្ពុជាបានបញ្ជាក់ថា ជាក់ស្ដែងលទ្ធផលដែលយើងឃើញស្រាប់ហើយ ទី១. កម្ពុជាគាំទ្រនិងការពារយ៉ាងម៉ឺងម៉ាត់កិច្ចព្រមព្រៀងឈប់បាញ់រវាងកម្ពុជានិងថៃដែលសម្រេចបានក្នុងកិច្ចប្រជុំពិសេសកាលពីថ្ងៃទី២៨ខែកក្កដា ឆ្នាំ២០២៥ នៅឯប្រទេសម៉ាឡេស៊ី ក្រោមគំនិតផ្ដួចផ្ដើមដោយ ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក ដោយមាននាយករដ្ឋមន្ត្រីម៉ាឡេស៊ីប្រធានប្ដូរវេនអាស៊ានជាអ្នកសម្របសម្រួល និងមានការចូលរួមយ៉ាងសកម្មពីសាធារណរដ្ឋប្រជាមានិតចិន។
ទី២. កម្ពុជាអនុវត្តយ៉ាងខ្ជាប់ខ្ជួននូវកិច្ចព្រមព្រៀងឈប់បាញ់ហើយកំពុងតែជំរុញនិងអនុវត្តយ៉ាងសកម្មនូវលទ្ធផលនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជាថៃ(GBC) នៅទីក្រុងគួឡាឡាំពួកាលពីថ្ងៃទី០៧ខែសីហាឆ្នាំ២០២៥។ ហើយការអនុវត្តនៃកិច្ចប្រជុំនេះកំពុងតែប្រព្រឹត្តិទៅដោយមានការចូលរួមពីក្រុមអ្នកសង្កេតការណ៍អន្តរកាល នៅខណៈពេលយើងកំពុងរង់ចាំការបង្កើតក្រុមអ្នកសង្កេតការណ៍អាស៊ានជាផ្លូវការណ៍។
ទី៣. ហេតុអ្វីបានជាប្រមុខដឹកនាំរបស់យើងប្រកាន់គោលជំហរសន្តិភាព ពីព្រោះថ្នាក់ដឹកនាំរបស់យើងស្គាល់ច្បាស់អំពីផលវិបាកនៃសង្ត្រាម និងស្គាល់ច្បាស់ពីតម្លៃនៃសន្តិភាព នេះជាហេតុផលពិតប្រាកដដែលកម្ពុជាមិនត្រូវការសង្រ្គាម តែកម្ពុជាត្រូវការការពារសន្តិភាព។ ជំហររបស់កម្ពុជាទទួលបានការគាំទ្រយ៉ាងខ្លាំងពីសហគមន៍អន្តរជាតិដែលស្រឡាញ់សន្តិភាព។ ជំហរសន្តិភាពនិយមនេះទៀតសោត មានប្រយោជន៍ខ្លាំងណាស់មិនត្រឹមតែសម្រាប់ប្រទេស និងប្រជាជនកម្ពុជាទេ ក៏ប៉ុន្តែក៏មានប្រយោជន៍ធំធេងសម្រាប់ប្រទេសនិងប្រជាពលរដ្ឋថៃផងដែរ៕
ដោយ៖ គង់ សិរីរ័ត្ន