AKP ភ្នំពេញ ថ្ងៃទី០៨ ខែសីហា ឆ្នាំ២០២៥--លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានបានថ្លែងថា នៅព្រឹកថ្ងៃទី០៨ ខែសីហា ឆ្នាំ២០២៥ លោកវរសេនីយ៍ឯក ណាស់ស្លីប៊ីន  អាប់ឌុលរ៉ាហ៊ីម(Nazlee Bin Abdul Rahim) អនុព័ន្ធយោធាម៉ាឡេស៊ីប្រចាំនៅកម្ពុជាបានដឹកនាំក្រុមការងារសម្របសម្រួលអ្នកសង្កេតការណ៍អន្តរកាលបានចូលរួមមានចំនួន៧ប្រទេស ដែលកំពុងធ្វើដំណើរទៅបំបេញបេសកកម្ម នៅខេត្តឧត្តរមានជ័យ។ ការថ្លែងបញ្ជាក់របស់អ្នកនាំពាក្យក្រសួងការពារជាតិកម្ពុជាយ៉ាងដូច្នេះ ក្នុងឱកាសធ្វើសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៨ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកជំទាវឧត្តមសេនីយ៍ឯក ម៉ាលី សុជាតា បានលើកឡើងថា ការចុះបេសកកម្មរបស់ក្រុមអ្នកសង្កេតកាណ៍នេះគឺដើម្បីអនុវត្ដន៍យ៉ាងម៉ាត់ចំពោះការសម្រេចនៅថ្ងៃទី០៧ ខែសីហា ឆ្នាំ២០២៥ នៅប្រទេសម៉ាឡេស៊ីស្តីពីការកិច្ចប្រជុំ វិសាមញគណៈកម្មការព្រំដែនទូទៅកម្ពុជា-ថៃ(GCB ) ។

លោកជំទាវឧត្តមសេនីយ៍ឯក អ្នកនាំពាក្យក្រសួងការពារជាតិបានបញ្ជាក់ថា ចំពោះសមាសភាពក្រុមអ្នកសង្កេតការណ៍អន្តរកាលដែលបានចូលរួមមានចំនួន០៧ប្រទេស ដែលកំពុងធ្វើដំណើរទៅបំពេញបេសកកម្មនៅខេត្តឧត្តរមានជ័យ រួមមាន ៖ ១- អនុព័ន្ធយោធាម៉ាឡេស៊ីប្រចាំកម្ពុជា (ប្រធាន) ២-អនុព័ន្ធយោធាមីយ៉ាន់ម៉ាប្រចាំកម្ពុជា ៣- អនុព័ន្ធយោធាឥណ្ឌូណេស៊ីប្រចាំកម្ពុជា ៤-អនុព័ន្ធយោធាសិង្ហបុរីប្រចាំកម្ពុជា មាននិវេសនដ្ឋាននៅរដ្ឋធានីហាណូយ ៥-ជំនួយការអនុព័ន្ធយោធាវៀតណាមប្រចាំកម្ពុជា ៦- ជំនួយការអនុព័ន្ធយោធាឡាវប្រចាំកម្ពុជា ៧-ជំនួយការអនុព័ន្ធយោធាហ្វីលីពីនប្រចាំកម្ពុជា៕

ដោយ៖ អ៊ាង ប៊ុនរិទ្ធ