AKP ភ្នំពេញ ថ្ងៃទី៣០ ខែកក្កដា ឆ្នាំ២០២៥--ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានប្រកាសជំហររក្សាសន្តិភាពឱ្យខាងតែបាន ដើម្បីធ្វើជាមួលដ្ឋានសម្រាប់ការអភិវឌ្ឍប្រទេស។ ដូច្នេះគ្មានហេតុផលណាដែលកម្ពុជាត្រូវរំលោភសេចក្ដីទុកចិត្ត រំលោភបទឈប់បាញ់នោះឡើយ។

ឆ្លើយតបទៅនឹងការចោទប្រកាន់ប្រទេសកម្ពុជា ក្នុងសន្និសីទសារព័ត៌មាន នាព្រឹកថ្ងៃទី៣០ កក្កដា ឆ្នាំ២០២៥ នៅទីស្ដីការគណៈរដ្ឋមន្ត្រី ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាល បានគូសបញ្ជាក់ថា រយៈពេលជិត៣ទសវត្សចុងក្រោយនេះ សន្តិភាពបានក្លាយទៅជាអត្តសញ្ញាណរបស់កម្ពុជាទៅហើយ បន្ទាប់ពីកម្ពុជារកបានសន្តិភាពពេញលេញដោយលំបាកលំបិនកាលពីថ្ងៃ២៩ធ្នូ១៩៩៨ ដោយនយោបាយ ឈ្នះ ឈ្នះ របស់ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា។ ក្នុងន័យនេះ ឯកឧត្តម ប៉ែន បូណា ចង់សង្កត់ធ្ងន់ថា«សន្តិភាពគឺជាមូលដ្ឋានគ្រឹះនៃការអភិវឌ្ឍប្រទេសឱ្យបានលូតលាស់ដូចសព្វថ្ងៃនេះ ហេតុដូច្នេះហើយបានជារាជរដ្ឋាភិបាលកម្ពុជាផ្ដល់តម្លៃខ្ពស់ណាស់ដល់ការថែរក្សាសុខសន្តិភាពឱ្យទាល់តែបាន បើទោះជាក្នុងតម្លៃណាក៏ដោយ»។

ចុងក្រោយនេះ កម្ពុជាបានឮការចោទប្រកាន់មួយចំនួនថា កម្ពុជាជាអ្នកឈ្លានពានគេ កម្ពុជាជាអ្នកបង្កជម្លោះ កម្ពុជាជាអ្នកបាញ់មុន ហើយឥឡូវនេះបានឮពាក្យមួយទៀតថា កម្ពុជាបានរំលោភកិច្ចព្រមព្រៀងឈប់បាញ់ ដែលសម្រេចបានកាលពីថ្ងៃ២៨កក្កដា ឆ្នាំ២០២៥នៅទីក្រុងគួឡាឡាំពួប្រទេសម៉ាឡេស៊ី។ ទាំងអស់នេះ សុទ្ធសឹងតែជាការចោទប្រកាន់ដែលមិនសមហេតុផល និងមិនសមស្របជាមួយនឹងស្ថានភាពប្រទេសកម្ពុជាទាល់តែសោះ។ នេះបើតាម ការកត់សម្គាល់របស់ ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាល។

រាជរដ្ឋាភិបាលនីតិកាលទី៧នៃរដ្ឋសភាដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានដាក់ចេញយុទ្ធសាស្ត្របញ្ចកោណដោយសម្លឹងឆ្ពោះទៅចក្ខុវិស័យកម្ពុជាឆ្នាំ២០៥០ក្លាយជាប្រទេសដែលមានចំណូលខ្ពស់ដោយឈរលើមូលដ្ឋានគ្រឹះនៃសុខសន្តិភាពនេះឯង។ ដូច្នេះប្រាកដណាស់ថា កម្ពុជាត្រូវថែរក្សាសន្តិភាពឱ្យបានទើបមានពេលកសាងអភិវឌ្ឍន៍ប្រទេស ដូច្នេះជម្លោះប្រដាប់អាវុធឬក៏សង្រ្គាមគឺជាអ្វីដែលកម្ពុជាខិតខំនិងត្រូវចៀសវាងជាទីបំផុត៕

ដោយ៖ គង់ សិរីរ័ត្ន