AKP ភ្នំពេញ ថ្ងៃទី ២៩ ខែកក្កដា ឆ្នាំ ២០២៥--
លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានថ្លែងបញ្ជាក់ថា ក្នុងកិច្ចប្រជុំកងទ័ពយោធភូមិភាគទី៣ កម្ពុជា និងបញ្ជាការដ្ឋានការពារព្រំដែន ខេត្តច័ន្ទបុរី និងខេត្តត្រាត ប្រទេសថៃ តាមរយៈហ្សូម(Zoom) វេលាម៉ោង៩ព្រឹក ថ្ងៃទី ២៩ ខែ កក្កដា ឆ្នាំ ២០២៥ ខាងភាគីថៃបានស្នើបោសសម្អាតមីនតាមព្រំដែន តែខាងកម្ពុជាឆ្លើយតបថា ឱ្យរង់ចាំកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ(GBC)ដែលនឹងធ្វើឡើងនៅថ្ងៃទី០៤ ខែសីហា ឆ្នាំ ២០២៥ រវាងក្រសួងការពារជាតិកម្ពុជា និងថៃ ជាមុនសិន។   

ថ្លែងក្នុងសន្និសីទសារព័ត៌មានស្តីពី លទ្ធផលនៃការអនុវត្តបទឈប់បាញ់រវាងកម្ពុជា-ថៃ នារសៀលថ្ងៃទី២៩ ខែកក្កដា ឆ្នាំ២០២៥ លោកជំទាវឧត្តមសេនីយ៍ឯក ម៉ាលី សុជាតា បានបញ្ជាក់ថា ក្នុងកិច្ចប្រជុំនេះ បានដំណើរការល្អ ហើយបានឯកភាពគ្នាក្នុងចំណុចមួយចំនួន ដោយក្នុងនោះ ខាងភាគីថៃបានស្នើសុំមួយចំនួនដូចជា ទី១- មិនត្រូវបង្កើនកម្លាំងលើសកម្រិតដែលមាននាពេលបច្ចុប្បន្នទេ ហើយមិនត្រូវមានអាវុធចូលជំនួយបន្ថែម ជិតទីតាំងព្រំដែន ហើយមិនបង្កភាពតានតឹង។ ទី២- តំបន់ដែលមិនទាន់ដាច់ស្រេចដែលស្ថិតនៅក្រោមអនុស្សរណៈនៃការយោគយល់គ្នាឆ្នាំ ២០០០ ភាគីទាំងពីរ អាចចុះល្បាតពិនិត្យមើលបានដោយមិនត្រូវឱ្យមានសំណង់ ឬការសាងសង់ថ្មីណាមួយកើតឡើងទេ។ ទី៣- ការបោសម្អាតមីនតាមតំបន់ក្បែរព្រំដែនភាគីថៃអាចដំណើរការដោយគ្មានការរារាំងណាមួយឡើយ។
លោកជំទាវឧត្តមសេនីយ៍ឯក អ្នកនាំពាក្យបានបន្ដថា ជាការឆ្លើយតបឯកឧត្តមមេបញ្ជាការយុទ្ធភូមិភាគទី៣    កម្ពុជាបានលើកឡើងថា ចំពោះកម្ពុជាមានបំណងចង់រក្សាសុខសន្តិភាព ចង់ឱ្យប្រជាជនប្រទេសទាំងពីរ រស់នៅដោមានសេចក្តីសុខ និងមានការអភិវឌ្ឍតាមបណ្តោយព្រំដែន។ ទី១- កម្ពុជាស្នើឱ្យរក្សាស្ថានភាពដូចមុនថ្ងៃទី២៨ ខែ ឧសភា ឆ្នាំ ២០២៥។ ទី២- មិនត្រូវបង្កើនកម្លាំងយោធាតាមបណ្តោយព្រំដែន ទី៣- មិនបង្កើនសព្វាវុធ គ្រប់ប្រភេទតាមខ្សែបន្ទាត់ព្រំដែន និង ចំពោះការស្នើចុះល្បាតនៅតាមតំបន់មិនទាន់ដាច់ស្រេចជម្លោះដែលបានកំណត់ក្នុងអនុស្សរណៈនៃការយោគយល់គ្នាឆ្នាំ២០០០ និង ការបោសសម្អាតមីន នៅតំបន់ក្បែរព្រំដែនស្នើឱ្យភាគីទាំងពីររង់ចាំកិច្ចប្រជុំរបស់គណៈកម្មាធិការព្រំដែនទូទៅកម្ពុជា-ថៃ(GBC)ដែលនឹងធ្វើឡើងនៅថ្ងៃទី០៤ ខែសីហា ឆ្នាំ ២០២៥ រវាងក្រសួងការពារជាតិកម្ពុជា និងថៃជាមុនសិន។ ទន្ទឹមនេះ បើលទ្ធផលសម្រេចបានយ៉ាងណាយើងនឹងសម្រេចតាមនោះផងដែរ។
ក្នុងឱកាសនោះ លោកជំទាវឧត្តមសេនីយ៍ឯក ម៉ាលី សុជាតា បានថ្លែងបន្ថែមថា ភាគីទាំងពីរបានឯកភាពគ្នាលើចំណុចដូចខាងក្រោម ចំពោះការកំណត់ព្រំដែនរង់ចាំសម្រេចរបស់(GBC), រក្សាមិនបង្កើនកម្លាំងនិងសព្វាវុធ ហើយចំពោះការស្នើសុំចុះល្បាតក្នុងតំបន់មិនទាន់ដាច់ស្រេចនិងការបោសសម្អាតមីននៅតាមព្រំដែនស្នើដាក់ទៅជាមួយ(GBC)សម្រេច៕ដោយ៖ មករា