AKP ភ្នំពេញ ថ្ងៃទី២៩ ខែកក្កដា ឆ្នាំ២០២៥ -- ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានបញ្ជាក់គោលជំហរដ៏ម៉ឺងម៉ាត់របស់រាជរដ្ឋាភិបាលកម្ពុជា ក្នុងការគោរពកិច្ចព្រមព្រៀងឈប់បាញ់គ្នាជាបន្ទាន់ ហើយនឹងគ្មានលក្ខខណ្ឌដែលបានសម្រេចកាលពីថ្ងៃទី២៨ខែកក្កដា ឆ្នាំ២០២៥ នៅក្នុងកិច្ចប្រជុំពិសេសនៅ ទីក្រុងគួឡាឡាំពួ ប្រទេសម៉ាឡេស៊ី ហើយបានចូលជាធរមាននៅពាក់កណ្ដាលអធ្រាត្រថ្ងៃទី២៨យប់មិញ។

ក្នុងកម្មវិធីផ្សាយផ្ទាល់ពិសេស៖ សេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នារសៀលថ្ងៃអង្គារ ៤កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៩ ខែកក្កដា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាលបានថ្លែងថា រាជរដ្ឋាភិបាលចាត់ទុកកិច្ចព្រមព្រៀងនេះថា មានតម្លៃជាសារវន្តសម្រាប់ថែរក្សាសន្តិភាពប្រទេសទាំងពីរ កម្ពុជា ថៃ ក៏ដូចជាសន្តិភាពស្ថេរភាព នៅក្នុងតំបន់។ ដោយ ឯកឧត្តមបានសង្កត់ធ្ងន់ថា «ក្នុងនាមជាប្រទេសស្រឡាញ់សន្តិភាពនិងគោរពច្បាប់អន្តរជាតិ រាជរដ្ឋាភិបាលកម្ពុជា បានគោរពកិច្ចព្រមព្រៀងនេះយ៉ាងខ្ជាប់ខ្ជួន និងបានណែនាំឱ្យកងកម្លាំងជួរមុខរបស់ខ្លួនទាំងអស់ស្ងប់ស្ងាត់និងអត់ធ្មត់ខ្ពស់បំផុត»។

ជាមួយគ្នានេះ អ្នកនាំពាក្យរាជរដ្ឋាភិបាលកម្ពុជា បានបដិសេធរាល់ព័ត៌មានទាំងឡាយណា ដែលចោទប្រកាន់កម្ពុជាថា បានបំពានបទឈប់បាញ់ អ្នកនាំពាក្យរាជរដ្ឋាភិបាលចាត់ទុកព័ត៌មានទាំងនោះថា ជាព័ត៌មានមិនពិត ប្រឌិតចោទប្រកាន់ ដែលមិនផ្ដល់ផលចំណេញទៅដល់ការថែរក្សាកិច្ចព្រមព្រៀងឈប់បាញ់ដែលប្រទេសទាំងពីរបានព្រមព្រៀងគ្នានោះឡើយ។ 

ជាថ្មីម្ដងទៀតរាជរដ្ឋាភិបាលកម្ពុជាចាត់ទុកកិច្ចព្រមព្រៀងឈប់បាញ់គ្នាថាពិតជាមានសារៈសំខាន់ណាស់ដែលត្រូវអនុវត្តឱ្យមានប្រសិទ្ធភាព ពីព្រោះវាមិនត្រឹមតែរក្សាសុខសន្តិភាពសម្រាប់ប្រទេសទាំងពីរកម្ពុជានិងថៃប៉ុណ្ណោះទេ ក៏ប៉ុន្តែក៏ដើម្បីធានានិរន្តរភាពនៃសុខសន្តិភាពក្នុងតំបន់ឱ្យបានយូរអង្វែងផងដែរ។៕

ដោយ៖ គង់ សិរីរ័ត្ន