AKP កណ្ដាល ថ្ងៃទី២៩ ខែកក្កដា ឆ្នាំ២០២៥ -- មន្ទីរវប្បធម៌ និងវិចិត្រសិល្បៈខេត្តកណ្តាល នៅថ្ងៃទី២៩ ខែកក្កដា ឆ្នាំ២០២៥ បានរៀបចំការប្រឡងប្រជែងស្នាដៃចម្លាក់ប្រាក់-ស្ពាន់ខ្មែរ ស្រុកពញាឮ ខេត្តកណ្តាល ក្រោមប្រធានបទ "ជំនាញដូនតាក្រោមម្លប់សន្តិភាព" ដោយមានការចូលរួមពីអាជ្ញាធរស្រុក មន្ទីរជំនាញពាក់ព័ន្ធ និងប្រជាពលរដ្ឋអ្នកផលិតចម្លាក់ប្រាក់-ស្ពាន់ជាច្រើនអ្នកផងដែរ នៅសមាគមចម្លាក់ប្រាក់ ស្ពាន់ ស្រុកពញាឮ ខេត្តកណ្តាល។ 

ការប្រឡងស្នាដៃចម្លាក់ប្រាក់ ស្ពាន់ខ្មែរ ខេត្តកណ្តាល ធ្វើឡើងក្នុងគោលបំណងទទួលស្គាល់ស្នាដៃ ដែលមានការផលិតតាមទម្រង់រចនាបថខ្មែរ ព្រមទាំងជំរុញ និងលើកទឹកចិត្តដល់សិប្បករក្នុងការអភិវឌ្ឍសមត្ថភាពជំនាញរបស់ខ្លួន ពង្រឹងក្បាច់ចម្លាក់ខ្មែរ ដើម្បីរួមចំណែកអភិរក្ស និងអភិវឌ្ឍជំនាញដូនតាឱ្យបានគង់វង្ស និងពង្រឹងអាជីព និងការធានានូវចីរភាពផ្នែកចំណូលរបស់ប្រជាជនចម្លាក់ប្រាក់-ស្ពាន់ខ្មែរ គឺជាជំនាញវិជ្ជាជីវៈដូនតា ដែលបច្ចុប្បន្ននៅស្រុកពញាឮយើងមានទីតាំងផលិតប្រមាណ១៧៦កន្លែង សិប្បករទាំងអស់កំពុងមមាញឹក ក្នុងការប្រកបអាជីពរបស់ខ្លួន លើកិច្ចការចម្លាក់ មានដូចជា សម្ភារតាំងលម្អ រូបបដិមា រូបសត្វ វត្ថុអនុស្សារីយ៍ និងក្បាច់លម្អផ្សេងៗ។

បេក្ខជន បេក្ខនារី ដែលបានចូលរួមប្រឡងនាឱកាសនេះ សុទ្ធតែមានបទពិសោធន៍ និងបានប្រកបរបរចម្លាក់នេះជាប្រចាំថ្ងៃ ហើយការប្រឡងយើងនាពេលនេះជាការបំពេញបន្ថែម និងពង្រឹងស្នាដៃ ក្នុងគោលបំណងពង្រឹងការយល់ដឹង អំពីសិល្បៈចម្លាក់ ទាំងអត្ថន័យ ខ្លឹមសារការប្រើប្រាស់ក្នុងជីវភាពប្រចាំថ្ងៃ បំផុសគំនិតមហាជនឱ្យយល់ដឹងពីតម្លៃ និងការចេះស្រឡាញ់សិល្បៈចម្លាក់ខ្មែរ និងជំរុញឱ្យស្នាដៃសិល្បៈចម្លាក់ខ្មែរ មានការកោតសសើរ និងត្រូវបានគេទទួលស្គាល់ជាសកល រក្សាបាននូវអត្តសញ្ញាណជាតិខ្មែរ ដែលមិនអាចឱ្យបរទេសមកបន្លំបានឡើយ។

សូមបញ្ជាក់ផងដែរ ការប្រឡងប្រជែងស្នាដៃចម្លាក់ប្រាក់ ស្ពាន់ខ្មែរ ស្រុកពញាឮ ខេត្តកណ្តាល ក្រោមប្រធានបទ "ជំនាញដូនតាក្រោមម្លប់សន្តិភាព" មានប្រជាពលរដ្ឋដែលជាបេក្ខជន បេក្ខនារី មកប្រឡងមានចំនួន៥២នាក់ បេក្ខជន៣នាក់ បេក្ខនារី៤៩នាក់ ហើយសម្រាប់ពេលវេលានៃការប្រឡងមានរយៈពេល២១ថ្ងៃសម្រាប់ការប្រឡងចម្លាក់ប្រាក់ស្ពាន់ខ្មែរ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)