AKP កំពង់ស្ពឺ ថ្ងៃទី២៩ ខែកក្កដា ឆ្នាំ២០២៥ -- កម្មវិធីទិវាមច្ឆជាតិ ១កក្កដា លើកទី២០ ឆ្នាំ២០២៥ បានប្រារព្ធធ្វើឡើងនៅទំនប់អាងស្វាយ ភូមិស្លា ឃុំស្រង់ ស្រុកគងពិសី ខេត្តកំពង់ស្ពឺ ក្រោមអធិបតីលោក ហន ពិសិដ្ឋ អភិបាលស្រុកគងពិសី និងមន្រ្តី មកពីមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងអាជ្ញាធរមូលដ្ឋានស្រុកគងពិសី សិស្សានុសិស្ស ប្រជាពលរដ្ឋយ៉ាងច្រើនកុះករ នៅព្រឹកថ្ងៃទី២៩ ខែកក្កដា ឆ្នាំ២០២៥។

នាឱកាសនោះ មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ បានរៀបចំលែងកូនត្រីចម្រុះប្រមាណ៣ម៉ឺនក្បាល និងត្រីមេពូជចំនួន៥០គីឡូក្រាម ដូចជា ត្រីឆ្ពិន ត្រីក្រាញ់ ត្រីកន្ធរ ត្រីពោ និងត្រីប្រាជាដើម ចូលក្នុងស្រះជម្រកត្រីសហគមន៍ទំនប់អាងស្វាយ។

លោក ហន ពិសិដ្ឋ បានលើកឡើងថា “ទិវាមច្ឆជាតិ” ត្រូវបានប្រារព្ធឡើងរៀងរាល់ថ្ងៃទី០១ ខែកក្កដា ចាប់តាំងពីឆ្នាំ២០០៣ មកទល់ពេលបច្ចុប្បន្ន ដើម្បីផ្សព្វផ្សាយ និងបំផុសស្មារតីឱ្យប្រជាពលរដ្ឋនៅទូទាំងប្រទេស ចូលរួមអភិរក្ស និងអភិវឌ្ឍធនធានជលផលប្រកបដោយនិរន្តរភាព សំដៅបង្កើនផលស្តុកមច្ឆជាតិ បំពេញសេចក្តីត្រូវការអាហារ មូលដ្ឋានប្រចាំថ្ងៃ ធានាសន្តិសុខស្បៀង និងជួយទ្រទ្រង់ជីវភាពប្រជាពលរដ្ឋ។ ផ្អែកលើយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ជាពិសេសកម្មវិធីគោលនយោបាយអាទិភាពទី៥ និងទី៦ សំដៅជំរុញការអភិវឌ្ឍវិស័យកសិកម្ម ដែលរួមមានការលើកស្ទួយផលិតកម្ម ការរកទីផ្សារ និងរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប។

លោកអភិបាលស្រុកបានថ្លែងកោតសរសើរ និងវាយតម្លៃខ្ពស់ចំពោះការចូលរួមរបស់អង្គភាពពាក់ព័ន្ធ ពិសេសមន្ទីរកសិកម្ម រុក្ខាប្រមាញ់ និង នេសាទខេត្តកំពង់ស្ពឺ ដែលមានខណ្ឌរដ្ឋបាលជលផល ជាសេនាធិការ និងអាជ្ញាធរមានសមត្ថកិច្ច ដែលបានចូលរួមសហការគ្នាយ៉ាងជិតស្និទ្ធក្នុងស្មារតីរួមគ្នា ដើម្បីសម្រេចគោលដៅ ក្នុងការទប់ស្កាត់ និងបង្ក្រាបការបទល្មើសនេសាទដែលមានលក្ខណៈបំផ្លិចបំផ្លាញធ្ងន់ធ្ងរ សំដៅពង្រឹងការគ្រប់គ្រង និងការអភិរក្សធនធានជលផលធម្មជាតិ។

លោកអភិបាលស្រុកបានសំណូមពរដល់ប្រជាពលរដ្ឋទាំងអស់ក្នុងខេត្តកំពង់ស្ពឺ ពិសេសអាជ្ញាធរមូលដ្ឋាន ត្រូវបន្តចូលរួមជាមួយរាជរដ្ឋាភិបាលក្នុងស្តារឡើងវិញ នៅកំណើតផលត្រី ពិសេស នៅឆ្នាំ២០២៥ កំណើតផលត្រី ក្នុងខេត្តកំពង់ស្ពឺ មានការកើនឡើងគួរឱ្យកត់សម្គាល់។

លោកអភិបាលស្រុកក៏សុំការអធ្យាស្រ័យដល់ប្រជាពលរដ្ឋ ក្នុងរដូវបិទនេសាទ ឆ្នាំ២០២៥ ដែលអាចប៉ះពាល់ដល់ការប្រមូលផលត្រីរបស់បងប្អូនអ្នកនេសាទយើង ដោយមានវិធានការ តឹងរ៉ឹង នៅរដូវបិទនេសាទនេះ ក្នុងគោលបំណងពង្រឹងការគ្រប់គ្រង និងការអភិរក្សធនធានជលផលធម្មជាតិ ប្រកបដោយនិរន្តរភាព និងប្រសិទ្ធភាព៕

ដោយ លឹម សាន្ត