AKP កំពង់ធំ ថ្ងៃទី២៩ ខែកក្កដា ឆ្នាំ២០២៥-- សាខាកាកបាទក្រហមកម្ពុជាខេត្តកំពង់ធំ សហការជាមូយអនុសាខាកាកបាទក្រហមកម្ពុជាស្រុកប្រាសាទបល្ល័ង្ក បានចុះអប់រំផ្សព្វផ្សាយស្ដីអំពី "រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ"និងបានដាក់ថ្នាំអាបែតជូនប្រជាពលរដ្ឋ នៅឃុំក្រយា ព្រមទាំងបានចែកអំណោយដល់កុមារកំព្រានៅភូមិឫស្សីដួច ស្រុកប្រាសាទបល្ល័ង្ក ខេត្តកំពង់ធំ កាលពីថ្ងៃទី២៨ ខែកក្កដា ឆ្នាំ២០២៥ ដោយមានការអញ្ជើញពីលោកស្រី ឡេង សុឃីម នាយិការងសាខាកាកបាទក្រហមកម្ពុជាខេត្តកំពង់ធំ រួមទាំងមន្ត្រីក្រុមប្រតិបត្តិ លោកស្រី ឃួន ឡេ អនុប្រធានអនុសាខាកាកបាទក្រហមកម្ពុជាស្រុកប្រាសាទបល្ល័ង្ក មន្ត្រីអនុសាខា យុវជនកាកបាទក្រហមកម្ពុជា លោកគ្រូអ្នកគ្រូចំនួន៣០នាក់ (ស្រី១៤នាក់)និងសិស្សានុសិស្សចំនួន៧១៦នាក់ (ស្រី ៣៨៨នាក់)។

ក្នុងឱកាសនោះ លោកស្រី ឡេង សុឃីម នាយិការងសាខាកាកបាទក្រហមកម្ពុជាខេត្តកំពង់ធំ បានពាំនាំនូវប្រសាសន៍ផ្ដាំផ្ញើសាកសួរសុខទុកពីចម្ងាយអំពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលជានិច្ចកាលសម្ដេចតែងតែគិតដល់សុខទុក្ខបងប្អូនប្រជាពលរដ្ឋគ្រប់មជ្ឈដ្ឋាន ដោយមិនរើសអើងពណ៌សម្បុរ ឬនិន្នាការនយោបាយអ្វីឡើយ ជាពិសេសចំពោះប្អូនៗអ្នកស្ម័គ្រចិត្ត ក្មួយៗយុវជនកាកបាទក្រហមកម្ពុជានិងសិស្សានុសិស្ស ដែលកម្លាំងនាំមុខនៅសហគមន៍ និងជាទំពាំងស្នងឫស្សីរបស់សង្គមជាតិ។

លោកស្រី ឃួន ឡេ ធ្វើការបង្ហាញអំពីគោលបំណងក្នុងការផ្សព្វផ្សាយនេះគឺដើម្បីឱ្យប្អូនៗដែលជាយុវជនកាកបាទក្រហម និងសិស្សានុសិស្សទាំងអស់យល់ដឹងអំពីជំងឺឆ្លងនិងជំងឺមិនឆ្លងដែលប្រទេសកម្ពុជាយើងបច្ចុប្បន្នកំពុងមានការព្រួយបារម្ភជាខ្លាំង និងតម្រូវឱ្យប្អូនៗទាំងអស់ចូលរួមទប់ស្កាត់និងការពារផ្ដោតទៅលើជំងឺឆ្លងដូចជាជំងឺ covid ១៩ ជំងឺអេដស៍ ជំងឺរបេង ដែលកំពុងបន្តកើតជារៀងរាល់ថ្ងៃ។លោកស្រីបានបញ្ជាក់ថាដើម្បីចូលរួមទប់ស្កាត់និងការពារជំងឺមិនឆ្លង៤ប្រភេទធំៗ ដែលកំពុងតែកើតមានឡើងជារៀងរាល់ថ្ងៃមានដូចជា÷ ជំងឺមហារីក ជំងឺទឹកនោមផ្អែម ជំងឺលើសឈាម និងជំងឺផ្លូវដង្ហើមរ៉ាំរ៉ៃ ដែលវាកើតឡើងតាមរបបអាហារប្រចាំថ្ងៃ ផ្អែម  ប្រៃ និងខ្លាញ់ជាដើម ស្របតាមទិសស្លោក"ស្រឡាញ់ខ្លួនស្ងួនចំណី"។ ដើម្បីឱ្យសហគមន៍មានភាពធន់ និងអាកាសធាតុ សូមចូលរួមរៀនបន្ស៊ាំខ្លួន និងចូលរួមកាត់បន្ថយការប្រើប្រាស់ថង់ប្លាស្ទិក មិនដុត ឬកប់សំបកដបជ័រក្នុងដី។ លោកស្រីក៏បានផ្សព្វផ្សាយបន្ថែមអំពីវិធានការការពារមេរោគអេដស៍ និងជំងឺអេដស៍ការជូយសង្គ្រោះជនរងគ្រោះ ការស្លាក់ និងការហូរឈាមផងដែរ។

ជាមួយគ្នានេះដែរ លោកស្រី និងក្រុមការងារបាននាំអំណោយមនុស្សធម៌របស់សាខាកាកបាទក្រហមកម្ពុជា ចែកជូនដល់កុមារកំព្រានូវអង្ករ២៥គីឡូក្រាម មី១កេស ទឹកស៊ីអ៊ីវ១យួរ ត្រី១យួរ ត្រីខ១យួរ និងបានដាក់ថ្នាំអាបែតនៅក្នុងពាងទឹកអាងទឹកជូនប្រជាពលរដ្ឋនៅឃុំក្រយា ស្រុកប្រាសាទបល្ល័ង្កផងដែរ៕

ដោយ ស៊ុម វណ្ណា