AKP ភ្នំពេញ ថ្ងៃទី២៩ ខែកក្កដា ឆ្នាំ២០២៥--លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ នៃ ព្រះរាជាណាចក្រកម្ពុជាបានថ្លែងថា ចាប់ពីវេលាម៉ោង ៧ព្រឹកថ្ងៃទី២៩ ខែកក្កដា ឆ្នាំ២០២៥នេះគឺ មានការជួបប្រជុំថ្នាក់ភូមិភាគរវាងកងទ័ពកម្ពុជា-ថៃ រួចមកហើយ។ក្នុងម៉ោងនេះគឺមេបញ្ជាការកងទ័ពភូមិភាគទី៥របស់កម្ពុជាបានកំពុងជួបពិភាក្សាគ្នាជាមួយកងទ័ពភូមិភាគទី១ថៃនៅតាំងក្បាលស្ពានដែលចាប់ផ្តើមតាំងតែម៉ោង ៧,០០ព្រឹកមិញមកម្ល៉េះ។ក្រោយបទឈប់បាញ់ជាបន្ទាន់មួយរវាងប្រទេសទាំងពីរយើងឃើញមានសញ្ញាវិជ្ជមានដោយពុំមានការផ្ទុះអាវុធដាក់គ្នានោះទេ។

លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជាថ្លែងក្នុងសន្និសីទសារព័ត៌មានស្តីពី «បច្ចុប្បន្នភាពជុំវិញកិច្ចចរចាបទឈប់បាញ់ជាបន្ទាន់និងអត់លក្ខខណ្ខរវាងកងទ័ពកម្ពុជា-ថៃ» នាព្រឹកថ្ងៃទី២៩ ខែកក្កដា ឆ្នាំ២០២៥ នៅទីស្តីការគណៈរដ្ឋមន្ត្រីឱ្យដឹងថា” ដើម្បីធានាដល់ ភាគីទាំងពីរក្នុងនេះទីមួយត្រូវបញ្ឈប់ការបាញ់គ្នា ទីពីរមិនឱ្យមានការចល័តទ័ព ការបន្ថែមទ័ព និងទី៣ភាគីទាំងពីរត្រូវរក្សានៅទីតាំងដដែលរាប់ចាប់ពីម៉ោង ២៤,០០ម៉ោងក្នុងតំបន់ថ្ងៃទី២៨ ខែកក្កដា ឆ្នាំ២០២៥។ទី៤ត្រូវបង្កើតការងារដើម្បីទំនាក់ទំនងមួយដើម្បីធ្វើការជាមួយគ្នា។ក្នុងនេះចំណុចទី២គឺការរៀបចំកិច្ចប្រជុំក្រៅផ្លូវការរវាងមេបញ្ជាការភូមិភាគទី១ ភូមិភាគទី ២និងបញ្ជាការដ្ឋានការពារព្រំដែនខេត្តច័ន្ទបុរី ខេត្តត្រាត របស់ភាគីថៃ និងជួបប្រជុំគ្នាជាមួយនឹងភូមិភាគទី៤ទី៥ ហើយនិងមេបញ្ជាការភូមិភាគ៣របស់កម្ពុជា។

អ្នកនាំពាក្យក្រសួងការពារជាតិបានបញ្ចាក់បន្ថែមថា៖”ចាប់ពីវេលាម៉ោង ៧ព្រឹកថ្ងៃទី២៩ ខែកក្កដា ឆ្នាំ២០២៥គឺយើងមានការប្រជុំថ្នាក់ភូមិភាគរួចមកហើយ។ក្នុងម៉ោងនេះគឺកងទ័ពភូមិភាគទី៥របស់កម្ពុជាបានកំពុងជួបពិភាក្សាគ្នាជាមួយភាគីទី១ថៃនៅតាំងក្បាលស្ពានដែលចាប់ផ្តើមតាំងតែម៉ោង ៧,០០ព្រឹកមិញមកម្ល៉េះ។ដោយឡែក ចំពោះមេបញ្ជាការកងទ័ពភូមិភាគ៤កម្ពុជា និងកងទ័ពភូមិភាគ២របស់ថៃ នឹងមានការជួបប្រជុំគ្នានៅអូស្មាច់នៅវេលាម៉ោង១០៖០០នាទីព្រឹកនេះ។ក្រៅពីនេះក៏មានការប្រជុំគ្នាជាមួយនឹងមេបញ្ជាការភូមិភាគ៣កម្ពុជានិងមេបញ្ជាការព្រំដែនច័ន្ទបុរី និងខេត្រាតរបស់ថៃ នឹងជួបប្រជុំជាមួយគ្នាតាមរយៈហ្ស៊ូមវេលាម៉ោង៩ព្រឹកនេះផងដែរ៕

ដោយ៖មករា