AKP បន្ទាយមានជ័យ ថ្ងៃទី១៤ ខែកក្កដា ឆ្នាំ២០២៥–លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ កាលពីថ្ងៃទី១៣ ខែកក្កដា ឆ្នាំ២០២៥ វេលាម៉ោង ៨:៣០ នាទី  បានដឹកនាំកម្លាំងនគរបាលក្រោមឱវាទទូទាំងខេត្ត ប្រារព្ធពិធីទូងស្គរយ៉ាងឱឡារិក ដើម្បីអបអរសាទរព្រឹត្តិការណ៍ជាប្រវត្តិសាស្ត្រនៃការចុះបញ្ជី "បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សានិងសន្តិភាព" ទៅក្នុងបញ្ជីបេតិកភណ្ឌពិភពលោក។

ព្រឹត្តិការណ៍ដ៏មានអត្ថន័យនេះ ត្រូវបានរៀបចំឡើងក្នុងគោលបំណងសំខាន់ពីរ៖ ទីមួយ ដើម្បីបំផុសបន្ថែមទៀតនូវការប្រឆាំងដាច់ខាតចំពោះវិនាសកម្មសង្គ្រាម និងឧក្រិដ្ឋកម្មប្រល័យពូជសាសន៍។ ទីពីរ ដើម្បីរំលឹកអំពីភាពចាំបាច់នៃការរួបរួមគ្នាការពារសន្តិភាពឱ្យបានគង់វង្សជានិច្ច ជាមរតកដ៏ថ្លៃថ្លាសម្រាប់ជនជំនាន់ក្រោយ។

ថ្លែងក្នុងពិធីទូងស្គរដ៏ឧឡារិកនេះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានមានប្រសាសន៍ថា «ការចុះបញ្ជីបូជនីយដ្ឋានចងចាំនៃកម្ពុជាទៅក្នុងបញ្ជីបេតិកភណ្ឌពិភពលោក គឺជាការទទួលស្គាល់ដ៏ធំធេងពីសហគមន៍អន្តរជាតិ ចំពោះការឈឺចាប់ដែលប្រជាជនកម្ពុជាបានឆ្លងកាត់ពីរបបប្រល័យពូជសាសន៍។ ព្រឹត្តិការណ៍នេះមិនត្រឹមតែជាមោទនភាពជាតិប៉ុណ្ណោះទេ ប៉ុន្តែវាក៏ជាការដាស់តឿនយើងទាំងអស់គ្នាឱ្យចងចាំជានិច្ចនូវមេរៀនប្រវត្តិសាស្ត្រដ៏ជូរចត់ និងបន្តរួមគ្នាថែរក្សាសន្តិភាពឱ្យបានគង់វង្ស។ កម្លាំងនគរបាលខេត្តបន្ទាយមានជ័យទាំងអស់ប្តេជ្ញាចិត្តខ្ពស់ក្នុងការចូលរួមចំណែកថែរក្សាសន្តិសុខ សណ្តាប់ធ្នាប់សាធារណៈ និងការពារសន្តិភាព ដើម្បីធានាថាប្រវត្តិសាស្ត្រដ៏អាក្រក់នឹងមិនកើតឡើងសាជាថ្មីឡើយ»។

ព្រឹត្តិការណ៍នេះមិនត្រឹមតែជាការអបអរសាទរមួយប៉ុណ្ណោះទេ ប៉ុន្តែក៏ជាការរំលឹកដល់មហាជនគ្រប់រូបអំពីតម្លៃនៃសន្តិភាព និងការចងចាំនូវប្រវត្តិសាស្ត្រដ៏ជូរចត់ ដើម្បីធានាថាព្រឹត្តិការណ៍ដ៏សោកសៅបែបនេះនឹងមិនកើតឡើងសារជាថ្មីទៀតឡើយ។

គំនិតផ្តួចផ្តើមដ៏វែងឆ្ងាយ និងការទទួលស្គាល់ជាសកលការចុះបញ្ជី "បូជនីយដ្ឋានចងចាំនៃកម្ពុជា" ដែលរួមមាន អតីតមន្ទីរឃុំឃាំង ម-១៣ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក ទៅក្នុងបញ្ជីបេតិកភណ្ឌពិភពលោក គឺជាគំនិតផ្តួចផ្តើមប្រកបដោយចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា។

យោងតាមសារលិខិតរបស់ប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា សម្តេចតេជោបានផ្តល់យោបល់ និងណែនាំកាលពីឆ្នាំ២០១៩ ដល់ក្រសួងវប្បធម៌ និងវិចិត្រសិល្បៈ និងក្រសួងស្ថាប័នពាក់ព័ន្ធ ឱ្យសិក្សាលទ្ធភាពបញ្ចូលទីតាំងសារមន្ទីរទួលស្លែងទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ គោលបំណងគឺដើម្បីបន្សល់ទុកជាកេរមរតកប្រវត្តិសាស្ត្រនៃការចងចាំសម្រាប់កូនចៅជំនាន់ក្រោយរាប់ពាន់ឆ្នាំតទៅមុខ។

តាមរយៈអនុសាសន៍ដ៏ខ្ពង់ខ្ពស់នេះ ក្រសួងវប្បធម៌ និងវិចិត្រសិល្បៈ បានសហការជាមួយក្រសួងស្ថាប័នពាក់ព័ន្ធ អ្នកជំនាញជាតិ អន្តរជាតិ និងអង្គការយូណេស្កូ ដើម្បីសិក្សា ស្រាវជ្រាវ និងចងក្រងឯកសារបច្ចេកទេសទៅតាមនីតិវិធីនៃក្រមប្រតិបត្តិរបស់អនុសញ្ញាឆ្នាំ១៩៧២។ ជាលទ្ធផល ទីតាំងទាំងបីបានទទួលនូវការទទួលស្គាល់អំពីតម្លៃលេចធ្លោជាសកលពីសំណាក់អ្នកជំនាញការអន្តរជាតិ (ICOMOS) រួមទាំងការវាយតម្លៃ និងការផ្តល់យោបល់គាំទ្រដល់ការដាក់បញ្ចូលជាបេតិកភណ្ឌពិភពលោក។

កាលបរិច្ឆេទប្រវត្តិសាស្ត្រសម្រាប់កម្ពុជា និងពិភពលោកថ្ងៃទី១១ ខែកក្កដា ឆ្នាំ២០២៥ បានក្លាយជាកាលបរិច្ឆេទនៃការចងចាំ និងដ៏មានសារៈសំខាន់មួយបន្ថែមទៀតសម្រាប់ជាតិ ប្រជាជនកម្ពុជា និងពិភពលោកទាំងមូល។ នៅថ្ងៃនោះ គណៈកម្មាធិការបេតិកភណ្ឌពិភពលោក បានសម្រេចជាឯកច្ឆន្ទចុះ "បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សានិងសន្តិភាព" ទៅក្នុងបញ្ជីបេតិកភណ្ឌពិភពលោក នាសម័យប្រជុំលើកទី៤៧ នៅទីក្រុងប៉ារីស ប្រទេសបារាំង តាមសំណើរបស់រាជរដ្ឋាភិបាលកម្ពុជា៕

 ដោយ៖ ឈុន សារ៉ាត