AKP​ កំពង់ធំ ថ្ងៃទី១៣ ខែកក្កដា ឆ្នាំ២០២៥ --  ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង  ប្រធានសមាគមអតីតយុទ្ធជនកម្ពុជាខេត្តកំពង់​ធំ​ នាព្រឹកថ្ងៃទី១៣ខែកក្កដាឆ្នាំ២០២៥បានដឹកនាំសហការី រៀបចំពិធីអបអរសាទរ​ បូជនីយ​ដ្ឋាន​ចងចាំ​ នៃ​កម្ពុជា​ ពីទីតាំង​ឧក្រិដ្ឋកម្ម​មក​ជាមណ្ឌល​ផ្សះផ្សានិង​សន្តិភាព​ ក្នុង​បញ្ជី​បេតិកភណ្ឌ​ពិភពលោកថ្ងៃទី១១ ខែកក្កដា ឆ្នាំ២០២៥ ដែលពិធីនេះប្រព្រឹត្តទៅនៅភូមិដងក្តាទីតាំងដីសម្បទានសង្គមកិច្ច សម្រាប់ផ្ដល់ជូនអតីតយុទ្ធជនស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ ដោយមានការចូលរួមពីអតីតយុទ្ធជនពិការ គ្រួសារអតីតយុទ្ធជនពលីដោយសារសង្គ្រាមជាច្រើននាក់។

ជាកិច្ចចាប់ផ្ដើមឧត្តមសេនីយ៍ទោ សោម ស៊ុន បានឡើងអានសារលិខិតលេខ៣២.សរល  របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសនៃការចុះបញ្ជីបូជនីដ្ឋានចងចាំនៃកម្ពុជា ពីទីតាំងឧក្រិដ្ឋកម្មមកជាមណ្ឌលផ្សះផ្សា និងសន្តិភាព នៅក្នុងបញ្ជីបិតិកភណ្ឌពិភពលោក នៅថ្ងៃទី១១ ខែកក្កដា ឆ្នាំ២០២៥ដើម្បីផ្សព្វផ្សាយជូនបងប្អូនអតីតយុទ្ធជននិងក្រុមគ្រួសារអតីតយុទ្ធជនពលី បានជ្រួតជ្រាបអំពីជោគជ័យនៃការចុះបញ្ជីបិតិកភណ្ឌពិភពលោករបស់កម្ពុជា នៅ​ពេល​នេះ​ ។

ឧត្តមសេនីយ៍ទោ សោម ស៊ុន និងសហការី ព្រមទាំងអតីតយុទ្ធជននៅក្នុងភូមិអតីតយុទ្ធជនទាំងអស់ បានទូងស្គរ វាយជួង ក្រវីទង់ជាតិ ទង់សាសនា​ ព្រះមហាក្ស ដើម្បី​អបអរសាទរយ៉ាងភ្លៀវក្លាក្នុងការចុះបញ្ជី បូជនីយ​ដ្ឋាន​ចងចាំ​ នៃ​កម្ពុជា​ ពីទីតាំង​ឧក្រិដ្ឋកម្ម​មក​ជាមណ្ឌល​ផ្សះផ្សា​ និង​សន្តិភាព​ ក្នុង​បញ្ជី​បេតិកភណ្ឌ​ពិភព​លោក យ៉ាងអធឹកអមនិង​រីករាយ​ក្រៃលែង​។

នៅក្នុង​ឱកាស​នេះ​ផងដែរ​ បងប្អូនអតីតយុទ្ធជន និងក្រុមគ្រួសារអតីតយុទ្ធជនពលី បានប្ដេជ្ញាចិត្តគាំទ្រដាច់ខាតចំពោះប្រមុខរាជរដ្ឋាភិបាល ដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការដោះស្រាយបញ្ហាព្រំដែន តាមច្បាប់អន្តរជាតិ ដោយសន្តិវិធី តាម​អនុសារណៈ​យោគយល់​គ្នា​រវាង​ប្រទេស​ទាំង​ពីរកម្ពុជា-ថៃ​ ឆ្នាំ​ ២០០០​ និងការប្រើប្រាស់វិធានការ យោធាក្នុងករណីចាំបាច់ ក្នុងការការពារបូរណភាពទឹកដីនៃកម្ពុជា​មិន​ឱ្យសត្រូវ​ឈ្លានពាន​បាន​ជាដាច់ខាត៕

ប្រភព៖ តំបន់សឹករងកំពង់ធំ