AKP ភ្នំពេញ ថ្ងៃទី០៩ ខែកក្កដា ឆ្នាំ២០២៥ -- អាជ្ញាធរប៉ាឡេស្ទីនបាននិយាយកាលពីថ្ងៃអង្គារថា មនុស្សកន្លះលាននាក់នៅតំបន់ហ្គាហ្សាភាគកណ្តាល ប្រឈមមុខនឹងហានិភ័យនៃការបាត់បង់សិទ្ធិទទួលបានការថែទាំសុខភាពក្នុងរយៈពេលប៉ុន្មានម៉ោងខាងមុខនេះ បន្ទាប់ពីម៉ាស៊ីនភ្លើងដ៏សំខាន់នៅមន្ទីរពេទ្យ Shuhada al-Aqsa ក្នុងទីក្រុង Deir al-Balah បានខូច។

កាលពីចុងខែឧសភា ក្រសួងសុខាភិបាលតំបន់ហ្គាហ្សាបានរាយការណ៍ថា មានតែមន្ទីរពេទ្យចំនួន១៧ ប៉ុណ្ណោះក្នុងចំណោមមន្ទីរពេទ្យចំនួន៣៨ នៅតំបន់ហ្គាហ្សាដែលនៅតែដំណើរការ បើទោះបីជាត្រូវប្រឈមនឹងការខ្វះខាតថ្នាំពេទ្យ ឧបករណ៍ បុគ្គលិក និងប្រេងឥន្ធនៈសម្រាប់ម៉ាស៊ីនភ្លើងក៏ដោយ។ មន្ទីរ​ពេទ្យ​មួយចំនួនត្រូវ​បាន​យោធា​អ៊ីស្រាអែល​កំណត់​ជាគោលដៅ ដោយពួកគេបាន​អះអាង​ថា​មន្ទីរពេទ្យទាំងនោះ​ជា​កន្លែងលាក់ខ្លួនរបស់ពួក​សកម្មប្រយុទ្ធក្រុម​ហាម៉ាស់។

អាជ្ញាធរសុខាភិបាលប៉ាឡេស្ទីនបានប៉ាន់ស្មានថា មនុស្សជាង ៦.៩០០នាក់ត្រូវបានសម្លាប់ និងជាង ២៤.៥០០នាក់ផ្សេងទៀតបានរងរបួស ចាប់តាំងពីអ៊ីស្រាអែលបានបន្តការវាយប្រហាររបស់ខ្លួនទៅលើតំបន់ជុំវិញកាលពីថ្ងៃទី១៨ ខែមីនា៕

ដោយ៖ យា ចិន្ដាខន្ដី (ប្រភព៖ ស្ពុតនីក)