AKP កំពង់ធំ ថ្ងៃទី០៦ ខែកក្កដា ឆ្នាំ២០២៥-- ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ កាលពីរសៀលថ្ងៃទី០៥ ខែកក្កដា ឆ្នាំ២០២៥ បានដឹកនាំកងកម្លាំងចូលរួមរំលែកទុក្ខជាមួយក្រុមគ្រួសារសពមន្ត្រីនគរបាលជាតិ លោកវរសេនីយ៍ទោ គាង សុធា អធិការរងនៃអធិការដ្ឋាននគរបាលស្រុកបារាយណ៍ ទទួលមរណភាពកាលពីថ្ងៃទី០១ ខែកក្កដា ឆ្នាំ២០២៥ ក្នុងជន្មាយុ៣៦ឆ្នាំដោយរោគា ស្ថិតនៅភូមិដូង ឃុំ បល្ល័ង្ក ស្រុកបារាយណ៍ ខេត្តកំពង់ធំ។

ក្នុងឱកាសនោះ ឧត្តមសេនីយ៍ទោ ហេង សុផល បានពាំនាំនូវប្រសាសន៍ផ្ដាំផ្ញើពីសំណាក់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ ចូលរួមរំលែកទុក្ខជាមួយក្រុមគ្រួសារសព លោក គាង សុធា គឺជាការបាត់បង់មេគ្រួសារ ស្វាមី ឪពុក ប្រកបដោយព្រហ្មវិហារធម៌ និងជាមន្ត្រីនគរបាលជាតិ ដែលមានស្នាដៃគុណបំណាច់ ចំពោះជាតិមាតុភូមិ ក្នុងបេសកកម្មនានាជាពិសេសការអនុវត្តច្បាប់ព្រមទាំងការផ្សព្វផ្សាយអប់រំច្បាប់ចរាចរណ៍ផ្លូវគោក ដល់ប្រជាពលរដ្ឋបង្កើនការយល់ដឹងចូលរួមអនុវត្តច្បាប់សំដៅរក្សាអាយុជីវិត ទ្រព្យសម្បត្តិប្រជាពលរដ្ឋ។

ឧត្តមសេនីយ៍ទោស្នងការបានបញ្ជាក់ថា លោក គាង សុធា មានឥរិយាបថ ស្មោះត្រង់ ស្លូតបូត សុភាពរាបសារ ទន់ភ្លន់ រួសរាយ រាក់ទាក់ ម៉ឹងម៉ាត់ ម៉ត់ចត់ គោរពវិន័យ អនុវត្តតួនាទី/ភារកិច្ច មានការទទួលខុសត្រូវ ពោរពេញដោយការសាមគ្គីភាព ជាមួយបងប្អូន កងកម្លាំង ដែលធ្វើឱ្យអ្នកផងទាំងពួង មានការគោរពស្រឡាញ់។ មរណភាពរបស់លោក គាង សុធា បន្សល់ទុកនូវសកម្មភាពល្អៗ ជាច្រើន ដែលយើងទាំងអស់គ្នាពុំអាចបំភ្លេចបានឡើយ។

ស្ថិតក្នុងឱកាសដ៏សែនក្រៀមក្រំបំផុតនេះ លោកស្នងការសូមចូលរួមសម្តែងនូវសមានទុក្ខដោយក្ដីអាឡោះអាល័យនិងឧទ្ទិសបួងសួង ដល់គុណបុណ្យព្រះរតនត្រ័យ វត្ថុស័ក្តិសិទ្ធិ ក្នុងលោក សូមជួយដឹកនាំដួងវិញ្ញាណក្ខន្ធរបស់លោក គាង សុធា បានទៅកាន់សុគតិភព កុំបីឃ្លៀងឃ្លាតឡើយ។

លោក ឧត្តមសេនីយ៍ទោស្នងការ បានប្រគល់ថវិកាអង្គភាពចំនួន៣លានរៀល និងថវិកាសមាគមមិត្តនគរបាលជាតិកម្ពុជាចំនួន៦លានរៀលជូនក្រុមគ្រួសារសពសម្រាប់ចូលរួមសម្រាលក្នុងការដោះស្រាយចំណាយក្នុងពិធីបុណ្យ៕

ដោយ ស៊ុម វណ្ណា ប្រភព៖ ស្នងការនគរបាលខេត្តកំពង់ធំ