AKP ព្រៃវែង ថ្ងៃទី០៦ ខែកក្កដា ឆ្នាំ២០២៥-- លោកស្រី ហ៊ន សុធារី អភិបាលរងខេត្តព្រៃវែង បានថ្លែងការកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំមន្ទីរពេទ្យបង្អែកបាភ្នំ រួមទាំងគ្រូពេទ្យទាំងអស់ដែលបានយកចិត្តទុកដាក់ រួមសហការគ្នាក្នុងការពិនិត្យព្យាបាលជំងឺជូនប្រជាពលរដ្ឋ និងបានធ្វើឱ្យមន្ទីរពេទ្យបង្អែកបាភ្នំមានការអភិវឌ្ឍជាបន្តបន្ទាប់ ដោយបានពង្រីក និងពង្រឹងសកម្មភាពគ្រប់គ្រងការផ្តល់សេវារបស់ខ្លួនបានល្អប្រសើរ។ ការថ្លែងយ៉ាងដូច្នេះរបស់លោកស្រី ហ៊ន សធារី ក្នុងពិធីក្រុងពលីបញ្ចុះបឋមសិលាសាងសង់អគារមន្ទីពេទ្យ ១ខ្នង កម្ពស់៥ជាន់ សាងសង់លើផ្ទៃដីទំហំ ៤.០០០ ម៉ែត្រការ៉េរបស់មន្ទីរពេទ្យបង្អែកស្រុកបាភ្នំ កាលពីថ្ងៃទី០៥ ខែកក្កដា ឆ្នាំ២០២៥។ 

លោកស្រីអភិបាលរងខេត្តថ្លែងថា ចំពោះពិធីបញ្ចុះបឋមសិលាសាងសង់អគារមន្ទីរពេទ្យបង្អែកបាភ្នំថ្មី គឺជាចំណងដៃថ្មីដើម្បីឆ្លើយតបទៅនឹងចំនួនប្រជាពលរដ្ឋក្នុងស្រុកបាភ្នំ ដែលមានការកើនឡើងពីមួយឆ្នាំ ទៅមួយឆ្នាំ និងបានរួមចំណែកដ៏ថ្លៃថ្លាក្នុងការជួយលើកកម្ពស់ដល់សុខមាលភាពរស់នៅរបស់ប្រជាពលរដ្ឋក៏ដូចជាគុណភាពនៃវិស័យសុខាភិបាលនៅកម្ពុជា ស្របតាមគោលនយោបាយរបស់រាជដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ ដោយបានចាត់ទុកការអភិវឌ្ឍវិស័យសុខាភិបាលជាអាទិភាព។

ក្នុងឱកាសនេះ លោកស្រី ហ៊ន សុធារី បានផ្តល់អំណោយដល់ប្រជាពលរដ្ឋចំនួន៣០០គ្រួសារ ដោយក្នុងមួយគ្រួសារទទួលបានអង្ករ៥០គីឡូក្រាម ទឹកត្រី១យួរ ទឹកស៊ីអ៊ីវ១យួរ និងមី១កេសផងដែរ៕

ដោយ៖ ចាន់ សុភឿន (ប្រភព៖ រដ្ឋបាលខេត្តព្រៃវែង)