AKP ភ្នំពេញ ថ្ងៃទី០៥ ខែកក្កដា ឆ្នាំ២០២៥-
ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានប្រតិភូកម្ពុជាបានអញ្ជើញចូលរួមជាមួយប្រទេសមហាអនុតំបន់ទន្លេមេគង្គឆ្នាំ១៩៩៣ មាន កម្ពុជា ចិន មីយ៉ាន់ម៉ា ឡាវ ថៃ វៀតណាម និងបានបិទបញ្ចប់កិច្ចប្រជុំលើកទី២របស់ខ្លួននៅថ្ងៃទី០៣ ខែកក្កដា ឆ្នាំ២០២៥ នេះ ក្រោយពីចាប់ផ្តើមតាំងពីថ្ងៃទី០១ ខែកក្កដា ឆ្នាំ២០២៥ កន្លងមក ។ 

ឯកឧត្តម ឧត្តមសេនីយ៍ឯក នាក់ យុទ្ធា បាន បញ្ជាក់ថា ប្រទេសមហាអនុតំបន់ទន្លេមេគង្គទាំងអស់បានធ្វើបច្ចុប្បន្នភាពការងាររបស់ខ្លួន ដែលបានសម្រេចកាលពីកិច្ចប្រជុំលើកទី១ ឆ្នាំ២០២៤ កន្លងមក ព្រមទាំងបានលើកយកនៅបញ្ហាប្រឈមក៏ដូចជាវិធានការឆ្លើយតបនានាមកធ្វើការចែករំលែកចំណេះដឹង និងការលើកជាសកម្មភាពសម្រាប់អនុវត្តន៍ក្នុងឆ្នាំ ២០២៥ -២០២៦ បន្តទៀត។  ឯកឧត្តម ឧត្តមសេនីយ៍ឯកបានបន្ថែមថា ក្រុមការងារទាំងបីរបស់កម្ពុជាបានលើកយកនូវសកម្មភាពថ្មីៗមានជាអាទិ៍ ការបណ្ដុះបណ្ដាលជំនាញនៃគ្រួសារ គ្រូបង្គោល វេទិកាយុវជន មិត្តអប់រំមិត្ត ការងារអប់រំសហគមន៍ពហុសាសនា លើកកម្ពស់ការងារអប់រំ បង្ការ ការប្រើប្រាស់​ប្រព័ន្ធ PEN online និង PEN online light និងការពង្រឹងសមត្ថភាពគ្រប់គ្រង-បំផ្លាញដោយសុវត្ថិភាព នូវសារធាតុគីមីផ្សំ ការផ្ដល់ព័ត៌មានពីការនាំចេញ-ចូលសារធាតុគីមីផ្សំ ការចែករំលែកព័ត៌មានពីគ្រឿងញៀនថ្មី NPS  ការកសាងសមត្ថភាពមន្ត្រីពិសោធន៍ យន្តការការប្រើប្រាស់ MNR Spectrum Surveillance ការវិភាគគំរូ  ការពង្រឹងកិច្ចសហប្រតិបត្តិការលើការវិភាគ និងការកំណត់អត្តសញ្ញាណគ្រឿងញៀន ការកំណត់សកម្មភាពជាអាទិភាពដើម្បីបង្កើនសមត្ថភាពកោសល្យវិច្ច័យ និងយន្តការចែករំលែកព័ត៌មាននៅទូទាំងតំបន់មេគង្គ។ 

ក្នុងកិច្ចប្រជុំនោះដែរ លោក Benedikt Hofmann អ្នកតំណាង UNODC អាស៊ីអាគ្នេយ៍ ប៉ាស៊ីហ្វិកបានលើកឡើងថា ១ឆ្នាំកន្លងមកតំបន់បន្តប្រឈមនឹងការវិវត្តនិងបញ្ហាប្រឈមដ៏ស្មុគស្មាញទាក់ទងនឹងការផលិត ការជួញដូរ និងការប្រើប្រាស់គ្រឿងញៀន។ លោកបន្តថា ថ្នាំញៀនមេតំហ្វេតាមីនចំនួន ២៣៦ តោន ត្រូវបានរឹបអូសនៅអាស៊ីបូព៌ា និងអាគ្នេយ៍ក្នុងឆ្នាំ ២០២៤ កើន២៤ភាគរយ លើសឆ្នាំមុនមាន១៩០ តោន ហើយលោកបានកោតសសើរដល់ក្រុមការងារទាំងបីដែលបានចូលរួមចំណែកអនុវត្តន៍ការងារបានល្អ និងបានលើកជាសកម្មភាពក្នុងកិច្ចប្រជុំលើកទី២ ដើម្បិបានអនុវត្តន៍បន្ត៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន