AKP ព្រះសីហនុ ថ្ងៃទី០៥ ខែកក្កដា ឆ្នាំ២០២៥-- នារសៀលថ្ងៃសៅរ៍ ទី០៥ ខែកក្កដា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ អញ្ជើញសំណេះសំណាល និងប្រគល់ឯកសណ្ឋាន សម្ភារជូនប្រជាការពារភូមិទាំង១៥ ចំនួន ៣៩២រូប ចំណុះសង្កាត់ទាំង៤ នៃក្រុងព្រះសីហនុ នៅសាលប្រជុំស្នងការដ្ឋាននគរបាលខេត្តព្រះសីហនុ។

ក្នុងឱកាសនោះ ឯកឧត្តម សាយ សំអាល់ បានមានប្រសាសន៍ថា ប្រជាការពារមានតួនាទីសំខាន់ក្នុងការចូលរួមជួយមន្ត្រីនគរបាលទៅវិញទៅមក យើងកុំគិតថា យើងមិនមែនជាមន្ត្រីក្រប ខណ្ឌ កុំគិតថាយើងជាមន្ត្រីនគរបាល កុំគិតថា យើងជាមន្ត្រីយុត្តិធម៌ដូចកងរាជអាវុធហត្ថ ព្រោះយើងជាអ្នកស្រឡាញ់ខេត្តព្រះសីហនុ ដូច្នេះយើងត្រូវចូលរួមជាមួយគ្នា ព្រោះប្រជាការពារបានធ្វើការងារយ៉ាងច្រើននៅ ក្នុងមូលដ្ឋានគ្រប់បែបយ៉ាងក្នុងការចូលរួមការងារអនាម័យបរិស្ថាន រក្សាសន្តិសុខ សុវត្ថិភាពសាធារណនៅក្នុងមូលដ្ឋាន និងសូមថ្លែងអំណគុណដល់ប្រជាការពាររបស់យើង និងសូមបន្តការងារដ៏ឧត្តុងឧត្តមរបស់បន្ថែមទៀត។

ឯកឧត្តម សាយ សំអាល់ បានបញ្ជាក់ថា ការប្រគល់ឯកសណ្ឋាននាពេលនេះ គឺជាកិត្តិយស និងជានិមិត្ត រូបនៃការទទួលស្គាល់ប្រជាការពាររបស់អ្នកកំពង់សោម យើងអាចបង្កើតវប្បធម៌បំពេញការងារជាមួយគ្នា ដោយសារលោកស្នងការខេត្តព្រះសីហនុ បានជួយឧបត្ថមនូវឯកសណ្ឋានមានដូចជា សម្លៀកបំពាក់ ស្បែកជើង ដែលជាឯកសណ្ឋានមួយច្បាស់លាស់ យើងត្រូវចូលរួមជ្រោមជ្រែងអនុវត្តនូវគោលនយោបាយ ភូមិ ឃុំ សង្កាត់មានសុវត្ថិភាព ក្នុងការកសាងខេត្តព្រះសីហនុជាភូមិដ្ឋានសុខក្រេមក្សាន្ត២៤ម៉ោង លើ ២៤ម៉ោង កុំឱ្យភ្ញៀវមកលេងហើយមានការព្រួយបារម្ភ ព្រោះទីក្រុងកំពង់សោម ជាទីក្រុងអន្តរជាតិ។ ទន្ទឹមនោះយើងត្រូវចេះបដិសណ្ឋាកិច្ចជូនចំពោះភ្ញៀវទេសចរជាតិ អន្តរជាតិ ហើយប្រជាការពាររបស់យើងត្រូវបាមចូលរួមជាមួយរដ្ឋបាលខេត្ត រដ្ឋបាលក្រុង ស្នងការដ្ឋាននគរបាលខេត្ត និងបញ្ជាការកងរាជអាវុធហត្ថខេត្ត ដើម្បីប្រែក្លាយខេត្តព្រះសីហនុ ជាខេត្តសម្បុរសប្បាយមានការអភិវឌ្ឍរីកចម្រើននាពេលខាងមុខ។

ឯកឧត្តម សាយ សំអាល់ បានបន្តថា ខេត្តកំពតកុំភ្លេចខ្លួន ព្រោះសៀមរាបជាគោលដៅធំទី១ របស់កម្ពុជា ហើយខេត្តកំពត ក៏ជាគោលដៅធំទី២ ប្រសិនបើអ្នកកំពតចេះធ្វើម្ហូបសមុទ្រមានរស់ជាតិឆ្ងុយឆ្ងាញ់ ភ្ញៀវទេសចរជាតិនឹងមកលេងកម្សានកាន់តែច្រើន ដូច្នេះខេត្តព្រះសីហនុ ក៏ដូចគ្នាដែរ យើងត្រូវទាក់ទាញអ្នកធ្វើម្ហូបឱ្យមានរសជាតិឈ្ងុញឆ្ងាញ់។ ដោយឡែកសណ្ឋាគារមានតម្លៃសមរម្យ ព្រោះការមកលេងកម្សានបើមកហើយកើតទុក្ខនោះ ពួកគេមិនមកទីនោះទៀតទេ ដូច្នេះតួនាទីប្រជាការពារត្រូវធ្វើការងារសហការជាមួយកងរាជ អាវុធហត្ថ និងមន្ត្រីនគរបាល ត្រូវសហការគ្នាក្នុងការចូលរួមថែរក្សា ការពារសន្តិសុខ សុវត្ថិភាពសាធារណៈជូនភ្ញៀវទេសចរជាតិ អន្តរជាតិ និងវិនិយោគិន។

ក្នុងឱកាសនោះ ឯកឧត្តម ប្រធានក្រុមការងារ ក៏បាននាំយកថវិការបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ឧបត្ថម្ភជូនប្រជាការពារទាំង ៣៩២នាក់ ក្នុងម្នាក់ទទួលបានថវិកា ៥ម៉ឺនរៀល និងជូនស្នងការដ្ឋាននគរបាលខេត្តព្រះសីហនុ ចំនួន ៥ ០០០ពាន់ដុល្លាអាមេរិក៕

ដោយ ងូ សុមុនី