AKP ព្រះសីហនុ ថ្ងៃទី០៥ ខែកក្កដា ឆ្នាំ២០២៥-- លោកជំទាវ គឹម សុភ័ក្រ ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍខេត្តព្រះសីហនុ អញ្ជើញបិទកិច្ចប្រជុំបូកសរុបលទ្ធផលការងារប្រចាំត្រីមាសទី២ និងឆមាសទី១ ឆ្នាំ២០២៥ របស់គណ: កម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍខេត្តព្រះសីហនុ និងចលនាស្ត្រីខេត្តព្រះសីហនុ នាព្រឹកថ្ងៃសៅរ៍ ទី០៥ ខែកក្កដា ឆ្នាំ២០២៥ ដោយមានការចូលរួមពីសមាជិក សមាជិការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តព្រះសីហនុ។

លោកជំទាវ គីម សុភ័ក្រ្ត ប្រធានកិត្តិយសសាខាសមាគមនារី ដើម្បីសន្តិភាព និងអភិវឌ្ឍន៍ខេត្តព្រះសីហនុ ថ្លែងបិទកិច្ចប្រជុំប្រចាំត្រីមាសទី២ របស់សាខាសមាគមនារី ដើម្បីសន្តិភាព និងអភិវឌ្ឍន៍ខេត្តព្រះសីហនុ ដោយបានធ្វើការផ្តាំផ្ញើសួរសុខទុក្ខ និងសេចក្តីនឹករលឹកពីសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ សម្តេចតែងតែជឿជាក់ និងលើកទឹកចិត្តដល់បងប្អូននារីយើង ជាសមាជិកានៃសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍គ្រប់លំដាប់ថ្នាក់ ដែលបានខិតខំប្រឹងប្រែងយកអស់ពីកម្លាំងកាយ ប្រាជ្ញា ស្មារតីក្នុងការបំពេញបេសកកម្មជូនសង្គមជាតិ និងមាតុភូមិ។ 

ជាមួយគ្នានេះ លោកជំទាវ ក៏បានវាយតម្លៃចំពោះគណៈកម្មការប្រតិបត្តិសាខាសមាគមនារីកម្ពុជា ដើម្បីសន្តិភាព និងអភិវឌ្ឍខេត្តព្រះសីហនុ មន្ទីរអង្គភាពពាក់ព័ន្ធដែលជាសមាជិកាបានរៀបចំកិច្ចប្រជុំប្រចាំត្រីមាសទី២ ឆ្នាំ២០២៥ ប្រព្រឹត្តទៅយ៉ាងរលូន។

ទន្ទឹមនឹងនោះ លោកជំទាវក៏បានថ្លែងអំណរគុណសមាជិក សមាជិការសាខាសមាគមនារីខេត្ត និងអនុសាខាសមាគមនារីក្រុង ស្រុក ដែលបានចូលរួមយ៉ាងសកម្មទាំងស្មារតី កម្លាំងកាយ និងថវិកាក្នុងការងារមនុស្សធម៌ ដើម្បីជួយដល់ស្រ្តី កុមារ ជនងាយរងគ្រោះ និងចាស់ជរាគ្មានទីពឹងប្រកបដោយសមធម៌ និងបរិយាប័ន្ន ការជួយឧបត្ថម្ភជាថវិកា និងសម្ភារដល់សមាគមនារីកម្ពុជារបស់យើងមានចំនួនតិចតួច ក៏ប៉ុន្តែនេះជាទឹកចិត្តអាណិតអាសូរ និងការស្រលាញ់ចំពោះមនុស្សនៅជុំវិញខ្លួនយើង ជាពិសេសអ្នកដែលកំពុងជួបការលំបាកនៅក្នុងសហគមន៍។

លោកជំទាវ បានបញ្ជាក់ថា ក្នុងនាមជាប្រធានកិត្តិយសនៃសាខាសមាគមនារី ដើម្បីសន្តិភាព និងអភិវឌ្ឍន៍ខេត្តព្រះ សីហនុ សូមអំពាវនាវឪ្យសមាជិកាគ្រប់រូបចូលរួមធ្វើសកម្មភាព និងរួមទទួលខុសត្រូវ ដើម្បីជំរុញការងារមនុស្សធម៌របស់សមាគមឱ្យកាន់តែរីក ចម្រើនទៅមុខ។ បន្តពង្រឹងសាមគ្គីភាពផ្ទៃក្នុងបង្កើតភាពស្និទ្ធស្នាលដោយធ្វើការចែក រំលែកព័ត៌មានឱ្យគ្នាទៅវិញទៅមក បន្តស្វែងរក និងកៀគរហិរញ្ញវត្ថុ និងធនធានពីសប្បុ រសជន ដៃគូអភិវឌ្ឍ និងគាំទ្រគ្រប់សកម្មភាពរបស់សមាគម។ បន្តសហការ និងចូលរួមយ៉ាងសកម្មក្នុងសកម្មភាពសមាគមនារីក្លាយជាស្ថាប័នមួយក្នុងការចូលរួមចំណែកអភិ វឌ្ឍន៍សង្គម និងការកាត់បន្ថយភាពក្រីក្រ ដើម្បីរួមចំណែកដល់ការគាំទ្រយុទ្ធសាស្ត្រជាតិ និងគោលនយោបាយរបស់រាជរដ្ឋាភិបាល ដើម្បីលើកកម្ពស់សិទ្ធិស្រ្តី កុមារ និងការផ្តល់សេវាសាធារណៈប្រកបដោយគុណភាព សមធម៌ និងបរិយាបន្ន ឈានទៅសម្រេចចក្ខុវិស័យឆ្នាំ២០៣០ កម្ពុជាជាប្រទេសដែលមានចំណូលមធ្យមកម្រិតខ្ពស់៕

ដោយ ងូ សុមុនី