AKP កំពង់ធំ ថ្ងៃទី០៥ ខែកក្កដា ឆ្នាំ២០២៥-- ខណ្ឌរដ្ឋបាលជលផលកំពង់ធំសហការជាមួយកម្លាំងចម្រុះចុះបង្ក្រាបនេសាទខុសច្បាប់នៅរដូវត្រីពងកូនក្នុងភូមិសាស្ត្រខេត្តកំពង់ធំដូចភ្លៀងរលឹមដើម្បីរក្សាពូជត្រីឱ្យបានគង់វង្ស។

កាលពីថ្ងៃទី០៤ ខែកក្កដា ឆ្នាំ២០២៥ សង្កាត់រដ្ឋបាលជលផលពាមបាងបានចូលរួមជាមួយលោកអនុសេនីយ៍ឯក លុយ សុភាព នាយទាហាន ថ្នាក់ដឹកនាំតំបន់ប្រតិបត្តិការសឹករងកំពង់ធំ (យោធភូមិភាគទី៤) សហការជាមួយកម្លាំងចម្រុះទីបញ្ជាការស្រាលប្រចាំការឃុំពាមបាងស្រុកស្ទោងបានចេញប្រតិបត្តិការត្រួតពិនិត្យ និងបង្ក្រាបបទល្មើសនេសាទនៅចំណុចបាកដាវឃុំពាមបាង ស្រុក ស្ទោង ខេត្តកំពង់ធំដោយបានរុះរើ កាប់បំផ្លាញចោលឧបករណ៍នេសាទខុសច្បាប់បាន០១ករណី រួមមាន របាំងសាច់អួនក្រឡាញឹកចំនួន០៦ របាំងប្រវែង៦៤០ម៉ែត្រ ឡុកសាច់អួន ចំនួន៦គ្រឿង លូសាច់អួនចំនួន១២មាត់ និងបង្គោលចំនួន៥២០ដើម។

សង្កាត់រដ្ឋបាលជលផលស្ទោងសហការជាមួយកម្លាំងសឹករងស្រុកដឹកនាំសហគមន៍នេសានបឹងប្រសានចុះបង្រ្កាបបទល្មើសនេសាទនៅចំណុចអូអញ្ចាញស្ទឹងសល្ងាច ឃុំកំពង់ចិនជើង ស្រុកស្ទោង លទ្ធផលអនុវត្តបាន០២ករណីដោយបានរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែង រួមមាន របាំងស្បៃមុងចំនួន១០ របាំង ប្រវែង ៦០០ម៉ែត្រឡុកចំនួន១០គ្រឿង លូចំនួន១០មាត់។ របាំងសាច់អួនក្រឡាញឹកចំនួន៥របាំង ប្រវែង១០០០ម៉ែត្រ ឡុកចំនួន០៥គ្រឿង លូចំនួន១០មាត់បង្គាលចំនួន៣៥០ដើម និងបានចាក់លែងត្រីស្រស់ចម្រុះចូលបឹងធម្មជាតិវិញចំនួន៣០គីឡូក្រាម៕

ដោយ ស៊ុម វណ្ណា