AKP កំពង់ធំ ថ្ងៃទី០៥ ខែកក្កដា ឆ្នាំ២០២៥-- គណៈកម្មការអន្តរក្រសួង ដឹកនាំដោយ ឯកឧត្តម ផូ ផារិទ្ធ រដ្ឋលេខាធិការ សមាជិកគណៈកម្មាធិការលទ្ធកម្ម តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដោយ លោកជំទាវ ឯក គន្ធវារី អនុរដ្ឋលេខាធិការនិងឯកឧត្តម លឹម អ៊ីវ អនុរដ្ឋលេខាធិការ តំណាងគ.ត.វ ព្រមទាំងមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុនិងលោកប្រធានមន្ទីរអភិវឌ្ឍន៍ជនបទខេត្តកំពង់ធំ កាលពីថ្ងៃទី០៤ ខែកក្កដា ឆ្នាំ២០២៥ បានចុះពិនិត្យ និងវាយតម្លៃដំណាក់កាលទី១លើការងារថែទាំជាប្រចាំផ្លូវចំនួន៤ខ្សែដោយក្រាលកៅស៊ូពីរជាន់(DBST) ប្រវែងសរុបជាង១១៦.៥៨០ម៉ែត្រ ទទឹង៥ម៉ែត្រ និង៦ម៉ែត្រ ស្ថិតនៅស្រុកកំពង់ស្វាយ ប្រាសាទសំបូរ សណ្តាន់ ស្ទោង និងស្រុកប្រាសាទបល្ល័ង្គ ក្នុងគោលបំណងធានាថា ការថែទាំផ្លូវអនុវត្តបានត្រឹមត្រូវមានគុណភាព តាមស្តង់ដារនិងអាចប្រើប្រាស់បានយូរអង្វែងបម្រើឱ្យការធ្វើដំណើររបស់ប្រជាពលរដ្ឋនៅសហគមន៍ជនបទ។

ការអនុវត្តការថែទាំផ្លូវជនបទរបស់ក្រសួងអភិវឌ្ឍន៍ជនបទ គឺជាការងារសំខាន់ជួយសម្រួលចរាចរណ៍របស់ប្រជាពលរដ្ឋ ក្នុងការដឹកជញ្ជូនផលិតផលកសិកម្ម កសិឧស្សាហកម្មនិងការធ្វើដំណើររបស់សិស្សនិស្សិតទៅសាលាក៏ដូចជាដឹកជញ្ជូនអ្នកជំងឺទៅមណ្ឌលសុខភាពបានទាន់ពេល។

បន្ទាប់ពីការចុះត្រួតពិនិត្យ ជាក់ស្តែងអំពីស្ថានភាពការងារថែទាំផ្លូវជាប្រចាំដោយក្រាលកៅស៊ូពីរជាន់ទាំង០៤ខ្សែ និងកិច្ចប្រជុំពិភាក្សា ផ្លាស់ប្តូរយោបល់រួចមក គណៈកម្មការអន្តរក្រសួងបានឯកភាពទទួលយកលទ្ធផលសម្រេចបានដំណាក់កាលទី១ សម្រាប់គម្រោងទាំងមូល (គម្រោងលេខ DRR-RM-2025-No.003)ដោយបានអនុវត្តរួចរាល់ និងមានគុណភាពល្អដើម្បីធានាបានឱ្យប្រជាពលរដ្ឋងាយស្រួលក្នុងការធ្វើដំណើរ៕

ដោយ ស៊ុម វណ្ណា