AKP ភ្នំពេញ ថ្ងៃទី០៤ ខែកក្កដា ឆ្នាំ២០២៥-- ឯកឧត្តម ប៉ុញ សច្ចៈ រដ្ឋលេខាធិការក្រសួងធនធានទឹក និងឧតុនិយម បានដឹកនាំក្រុមការងារដែលរួមមាន មន្ត្រីពាក់ព័ន្ធគម្រោងកូរ៉េ ក្រុមការងារទីប្រឹក្សាបច្ចេកទេស ក្រុមហ៊ុនសាងសង់កូរ៉េ មន្ទីរធនធានទឹក និងឧតុនិយមខេត្តបន្ទាយមានជ័យ និងតំណាងសហគមន៍កសិករប្រើប្រាស់ទឹក ចុះពិនិត្យជាក់ស្តែងវឌ្ឍនភាពគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ខេត្តបន្ទាយមានជ័យ ព្រមទាំងពិនិត្យស្ថានភាព និងពិភាក្សានៅលើទីតាំងផ្ទាល់ ដើម្បីដោះស្រាយបញ្ហារាំងស្ទះមួយចំនួន នាថ្ងៃសុក្រ ទី០៤ ខែកក្កដា ឆ្នាំ២០២៥។

ក្នុងឱកាសនោះ ឯកឧត្តមរដ្ឋលេខាធិការបានស្នើឱ្យក្រុមហ៊ុនសាងសង់ អាជ្ញាធរដែនដី និងមន្ទីរធនធានទឹក និងឧតុនិយមខេត្តបន្ទាយមានជ័យ បន្តសហការគ្នា ដើម្បីជំរុញ និងបង្កើនសកម្មភាពដោះស្រាយបញ្ហាប្រឈមមួយចំនួនឱ្យបានឆាប់រហ័ស ជាពិសេស ការកំណត់ទីតាំងបំពាក់ផ្ទាំងសូឡាតាមបណ្តាសំណង់ និងទីតាំងដើម្បីសាងសង់អគារសហគមន៍តាមបែបទំនើប ស្របតាមអនុសាសន៍ដ៏ខ្ពង់ខ្ពស់របស់ឯកឧត្តមរដ្ឋមន្រ្តីក្រសួងធនធានទឹក និងឧតុនិយម៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)