AKP ព្រះសីហនុ ថ្ងៃទី០៤ ខែកក្កដា ឆ្នាំ២០២៥--

លោកបណ្ឌិត សេង ជាសិទ្ធ ប្រធាននាយកដ្ឋាននីតិកម្មគោលនយោបាយសារពើពន្ធ និងសហប្រតិបត្តិការពន្ធដារអន្តរជាតិនៃអគ្គនាយកដ្ឋានពន្ធដារ និងលោកស្រី ម៉ាក់ សំណាង អភិបាលរងនៃគណ:អភិបាលខេត្តព្រះសីហនុ អញ្ជើញបើកសិក្ខាសាលាផ្សព្វផ្សាយស្តីពី “ច្បាប់និងលិខិតបទដ្ឋានគតិយុត្ត ស្តីពីពន្ធដារថ្មី និងវិធាននិងនីតិវិធីនៃការអនុវត្តកិច្ចព្រម ព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល” នាព្រឹកថ្ងៃសុក្រ ទី០៤ ខែកក្កដា ឆ្នាំ២០២៥ ដោយមានការចូលរួមពីលោកប្រធានសាខាពន្ធដារខេត្តព្រះសីហនុ កោះកុង កំពត កែប កំពង់ស្ពឺ និងខេត្តពោធិ៍សាត់ បងប្អូនអាជីវករ ពាណិជ្ជករក្នុងខេត្តព្រះសីហនុ ប្រមាណជា ២៥០នាក់។

លោកស្រី ម៉ាក់ សំណាង អភិបាលរងខេត្តព្រះសីហនុ បានស្វាគមន៍សិក្ខាសាលាលើវិស័យពន្ធដារ បានដើរតួនាទីយ៉ាងសំខាន់ក្នុងការប្រមូលធាតុចូល សម្រាប់បម្រើដល់ការអភិវឌ្ឍសេដ្ឋកិច្ច និងសង្គមជាតិ។ ការបង់ពន្ធ គឺជាការចូលរួមចំណែកក្នុងថវិកាជាតិ ដើម្បីឱ្យរាជរដ្ឋាភិបាលមានចំណូលយកទៅចំណាយដោយមិនចាំបាច់បោះពុម្ពលុយ ដែលអាចបង្កឱ្យមានបញ្ហាអតិផរណា។ ថវិកាដែលបានពីការបង់ពន្ធនឹងត្រូវយកទៅចំណាយទៅលើការបើកប្រាក់បៀវត្សមន្ត្រីរាជការស៊ីវិល កងកម្លាំងប្រដាប់អាវុធ ដែលជាអ្នកទទួលបន្ទុកផ្តល់សេវារដ្ឋបាល ការពារសន្តិសុខសណ្តាប់ធ្នាប់ និងការពារអធិបតេយ្យភាព ការផ្តល់សេវាសាធារណៈ ឬការអភិវឌ្ឍហេដ្ឋារចនាសម្ព័ន្ធដូចជាស្ពាន ថ្នល់ សាលារៀន មន្ទីរពេទ្យជាដើម ។ល។ រាជរដ្ឋាភិបាលកម្ពុជានីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ និងកម្មវិធីនយោបាយនានា ដើម្បីបន្តកសាង និងពង្រឹងមូលដ្ឋានគ្រឹះសម្រាប់ជំរុញសន្ទុះនៃការអភិវឌ្ឍប្រទេសជាតិស្របតាមចក្ខុវិស័យកម្ពុជានៅឆ្នាំ២០៥០ ដើម្បីធ្វើការប្រកួតប្រជែងមានលក្ខណៈបើកចំហ បរិយាបន្ន និងប្រកបដោយចីរភាព។ រដ្ឋប្រកាន់យកតួនាទីជាយុទ្ធសាស្ត្រវិទូជាអ្នកដឹកនាំ និងអ្នកគ្រប់គ្រង ការអភិវឌ្ឍ ជាអ្នកការពារកម្មសិទ្ធិ និងទ្រព្យសម្បត្តិឯកជន និងជាអ្នកគាំ ទ្រ និងលើកកម្ពស់ការអភិវឌ្ឍវិស័យឯកជន។ រដ្ឋប្រកាន់យកនូវការបើកចំហឆ្ពោះទៅខាងក្រៅដោយពង្រឹង និងពង្រីកក្របខ័ណ្ឌពាណិជ្ជកម្មសេរី ទាំងទ្វេភាគី និងពហុភាគី ការរក្សាស្ថិរភាពម៉ាក្រូសេដ្ឋកិច្ច ការជំរុញការធ្វើពិពិធកម្មសេដ្ឋកិច្ច ការអភិវឌ្ឍសេដ្ឋកិច្ច និងសង្គមឌីជីថល និងការបង្កើនភាពរឹងមាំនៃវិស័យហិរញ្ញវត្ថុ ។ ដើម្បីពន្លឿនការអភិវឌ្ឍខេត្តព្រះសីហនុ ឱ្យក្លាយទៅជាតំបន់សេដ្ឋកិច្ចពិសេសគំរូពហុបំណង ដែលជាប៉ូលសេដ្ឋកិច្ចដ៏សំខាន់សម្រាប់វិស័យពាណិជ្ជកម្ម ឧស្សាហកម្ម ភស្តុភារកម្ម ទេសចរណ៍ មជ្ឈមណ្ឌល និងសេវាហិរញ្ញវត្ថុអន្តរជាតិជាដើម។ រាជរដ្ឋាភិបាលបានដាក់ចេញនូវ “វិធានការជាកញ្ចប់សម្រាប់ដោះស្រាយគម្រោងវិនិយោគជាប់គាំងក្នុងខេត្តព្រះសីហនុ” និង «កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤» ជាកត្តាជំរុញការអភិវឌ្ឍខេត្តឱ្យមានសន្ទុះកាន់តែលឿន និងដោះ ស្រាយបញ្ហាអគារជាប់គាំងបានច្រើនគួរជាទីកត់សម្គាល់ ដូចជាការលើកទឹកចិត្តផ្នែកពន្ធ (ពន្ធដារ និងពន្ធគយ) និងការលើកទឹកចិត្តមិនមែនពន្ធ (សម្របសម្រួលនីតិវិធីវិនិយោគ និងធុរកិច្ច រួមទាំងការស្នើសុំអាជ្ញាបណ្ណផ្សេងៗ)។ ជាលទ្ធផល ក្រុមការងារពិសេសជំរុញការវិនិយោគទទួលបានសំណើសុំលើកទឹកចិត្តចំនួន ៣២៣គម្រោង ក្នុងនោះគម្រោងដែលទទួលបាន «លិខិតអនុញ្ញាតជាគោលការណ៍» មានចំនួន ២៩៧គម្រោង ដែលមានទុនវិនិយោគប្រមាណជាង ៧ពាន់ លានដុល្លារអាមេរិក ក្នុងនោះគម្រោងវិនិយោគអគារជាប់គាំងមានចំនួន ១៣២គម្រោង មានទុនវិនិយោគប្រមាណ ៣ ៣០០ដុល្លារអាមេរិក។

លោកបណ្ឌិត សេង ជាសិទ្ធ ប្រធាននាយកដ្ឋាននីតិកម្មគោលនយោបាយសារពើពន្ធ បានបើកសិក្ខាសាលាដោយគូសបញ្ជាក់ថា រដ្ឋបាលខេត្តព្រះសីហនុ បានយកចិត្តទុកដាក់ពីវិស័យពន្ធដារដែលជាចំណុចសំខាន់ក្នុងការអនុវត្តច្បាប់សារពើពន្ធ ដែលជាកម្មវត្ថុនៃការកៀគរថវិកាថ្នាក់ក្រោមជាតិក្នុងការអភិវឌ្ឍខេត្ត ព្រោះច្បាប់សារពើពន្ធត្រូវបានធ្វើការកែសម្រួលពីអគ្គនាយកដ្ឋានពន្ធដារ ម្យ៉ាងទៀតបទបញ្ញាតិថ្មី គឺជាការស្មើសុំពីបងប្អូនអាជីវករ ពាណិជ្ជករ ព្រោះការប្រមូលពន្ធត្រូវមានបទបញ្ញាតិត្រឹមត្រូវ ក្នុងគោបំណងចូលរួមធានាឱ្យបាននូវតម្លាភាព សមធម៌ គណនេយ្យភាព និងភាពប្រាកដប្រជាក្នុងការដាក់លិខិតប្រកាសសារពើពន្ធ។ អគ្គនាយកដ្ឋានពន្ធដារ រៀបចំជាសៀវភៅណែនាំ ស្តីពីបែបបទ និងនីតិវិធីនៃការដាក់លិខិតប្រកាសសារពើពន្ធ និងការបង់ប្រាក់ពន្ធសម្រាប់អ្នកជាប់ពន្ធតាមរបបស្វ័យប្រកាស ដើម្បីចែកជូនអ្នកជាប់ពន្ធ និងសាធារណជនសម្រាប់យកទៅប្រើប្រាស់ ហើយសិក្ខាសាលានាពេលនេះ លោក លោកស្រី  និងសាធារណជនបង្កើនការយល់ដឹងឱ្យកាន់តែច្បាស់ និងស៊ីជម្រៅថែមទៀតអំពីបែបបទ និងនីតិវិធីនៃការដាក់លិខិតប្រកាសសារពើពន្ធ និងការបង់ប្រាក់ពន្ធ ដើម្បីបំពេញកាតព្វកិច្ចបង់ពន្ធ និងពង្រឹងអនុ លោមភាពដោយស្ម័គ្រចិត្តរបស់អ្នកជាប់ពន្ធឱ្យកាន់តែគត់មត់ និងប្រសើរឡើងថែមទៀតនាពេលអនាគត៕

ដោយ ងូ សុមុនី