AKP ភ្នំពេញ ថ្ងៃទី០៤ ខែកក្កដា ឆ្នាំ២០២៥ -- យោងតាមប្រព័ន្ធផ្សព្វផ្សាយតេឡេក្រាមរបស់​មន្ត្រី​រុស្ស៊ី​បាន​បង្ហាញ​កាល​ពី​ថ្ងៃ​ព្រហស្បតិ៍ថា ប្រទេសកូរ៉េខាងជើងបានបង្កើតការផលិតយន្តហោះគ្មានមនុស្សបើក ដោយមានជំនួយពីប្រទេសរុស្ស៊ី ហើយគ្រូបង្វឹកជនជាតិរុស្ស៊ីក៏កំពុងបណ្តុះបណ្តាលអ្នកបើកយន្តហោះគ្មានមនុស្សបើកនៅក្នុងទីក្រុងព្យុងយ៉ាង និងទីក្រុងវ៉ុនសាន ភាគខាងកើតប្រទេស។

លោក អានដ្រី កូវ៉ាលេនកូ (Andriy Kovalenko) ប្រធានមជ្ឈមណ្ឌលប្រឆាំងព័ត៌មានមិនពិតរបស់ក្រុមប្រឹក្សាសន្តិសុខ និងការពារជាតិអ៊ុយក្រែន បាននិយាយនៅក្នុងសារប្រព័ន្ធផ្សព្វផ្សាយតេឡេក្រាមបង្ហោះកាលពីថ្ងៃមុនថា «ដូចដែលខ្ញុំបាននិយាយកាលពីរដូវស្លឹកឈើជ្រុះ... ការផលិតយន្តហោះគ្មានមនុស្សបើកសាហេដ-ហ្គេរ៉ាន់ (Shahed-Geran) នៅក្នុងប្រទេសកូរ៉េខាងជើងត្រូវបានបង្កើតឡើងរួចហើយ ដោយមានជំនួយពីប្រទេសរុស្ស៊ី»។

ហ្គារ៉ាន់ (Geran) គឺជាការរចនារបស់ប្រទេសរុស្ស៊ីចំពោះយន្តហោះគ្មានមនុស្សបើកសម្រាប់ធ្វើអត្តឃាតដែលផលិតដោយជនជាតិអ៊ីរ៉ង់ឈ្មោះ សាហេដ (Shahed) ។ លោក កូវ៉ាលេនកូ ក៏បាននិយាយផងដែរថា គ្រូបង្វឹកជនជាតិរុស្សីកំពុងធ្វើការនៅទីក្រុងព្យុងយ៉ាង និងនៅតំបន់អាកាសយានដ្ឋាន Kalma នៃទីក្រុងវ៉ុនសាន ដោយបណ្តុះបណ្តាលអ្នកបើកយន្តហោះគ្មានមនុស្សបើករបស់ប្រទេសកូរ៉េខាងជើងឱ្យធ្វើប្រតិបត្តិការទាំងការវាយប្រហារ និងយន្តហោះគ្មានមនុស្សបើកការប្រយុទ្ធ។

ទីភ្នាក់ងារស៊ើបការណ៍សម្ងាត់របស់ប្រទេសអ៊ុយក្រែនបានលាតត្រដាងកាលពីខែមុនថា ប្រទេសរុស្ស៊ីបានយល់ព្រមផ្ទេរបច្ចេកវិទ្យាផលិតកម្មសម្រាប់យន្តហោះគ្មានមនុស្សបើក Geran ទៅកាន់ប្រទេសកូរ៉េខាងជើង ខណៈដែលទីក្រុងព្យុងយ៉ាង និងទីក្រុងម៉ូស្គូបានពង្រឹងយោធារបស់ពួកគេចាប់តាំងពីការចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយកាលពីខែមិថុនាឆ្នាំមុន៕

ដោយ៖ មូល មិនា (ប្រភព៖ យ៉ុនហាប់)