AKP ភ្នំពេញ. ថ្ងៃទី០៤ ខែកក្ដដា ឆ្នាំ២០២៥…….

សម្តេចកិត្តិសង្គហបណ្ឌិត ម៉ែន សំអន បានបញ្ជាក់ថា ការរីកចម្រើនរបស់ពុទ្ធចក្រ គឺមានការចូលរួមចំណែកយ៉ាងសំខាន់ពីកត្តាសុខសន្តិភាព ប្រជាពលរដ្ឋមានជីវភាពធូរធារ ដែលបានរួមគ្នាប្រិតបត្តិបានយ៉ាងខ្ជាប់ខ្ជួននូវប្រពៃណីព្រះពុទ្ធសាសនា និងកសាងសមិទ្ធិផលជាច្រើននៅតាមវត្តអារាម នៅទូទាំងប្រទេស។

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានបញ្ជាក់ បែបនេះ ខណៈសម្ដេចបានអញ្ជើញជាអធិបតីក្នុងពិធីក្រុងពាលីបញ្ចុះខណ្ឌសីមាព្រះវិហារថ្មី ស្ថិតក្នុងវត្តពោធិ៍ព្រឹក្សាខារាម (ហៅវត្តតូប) ដែលមានទីតាំងនៅភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ ខេត្តកំពត នាព្រឹកថ្ងៃសុក្រទី០៤ ខែកក្កដា  ឆ្នាំ ២០២៥។ការកសាងព្រះវិហាថ្មីនេះ ក្រោមគំនិតផ្តួចផ្តើមរបស់សម្តេចព្រះវនរ័តកិត្តិបណ្ឌិត ណយ ច្រឹក,សម្តេចកិត្តិសង្គហបណ្ឌិត ម៉ែន សំអន,លោក ម៉ៅ ធនិន និងលោកស្រី, អ្នកឧកញ៉ា យី រដ្ឋា និងលោក ប៊ុន ដារ៉ា ព្រមទាំងក្រុមគ្រួសារ រួមជាមួយពុទ្ធបរិស័ទជិតឆ្ងាយ បានចូលរួមកសាងប្រកប ដោយសទ្ធាជ្រះថ្លាក្នុងព្រះពុទ្ធសាសនា។ ទាំងនេះ វាខុសប្លែកកាលពីជាង៤៦ឆ្នាំមុនដែល ប្រទេជាតិកំពុងជួបការលំបាករងឥទ្ធិពល និងផលប៉ះពាល់នៃវិបត្តិសង្គ្រាម ដែលធ្វើឱ្យការកសាងសមិទ្ធិផលនានានៅក្នុងវត្តត្រូវចំណាយពេលយូរ អាចរហូតដល់ជាង១០ឆ្នាំក៏មាន។ ប៉ុន្តែបច្ចុប្បន្ននេះការ សាងសង់ព្រះវិហារដែលមានលក្ខណ: ស្អាត ប្រណិត គឺចំណាយពេលតែជាងចន្លោះពី១-២ឆ្នាំប៉ុណ្ណោះរួចរាល់ ។

សម្ដេចកិត្ដិសង្គហបណ្ឌិត បានបន្ដថា៖ វត្តតូបនេះបានកសាងតាំងពីឆ្នាំ១៩៥០ មានអាយុកាលជាង ៧៥ឆ្នាំហើយ និងបានកសាងសមិទ្ធិផលជាបន្តបន្ទាប់រហូតដល់បច្ចុប្បន្ន។ ក្នុងនោះកាលពីថ្ងៃទី២២ ខែមេសា ឆ្នាំ២០២៥សម្តេចកិត្តិសង្គហបណ្ឌិត ក៏បានអញ្ជើញជាអធិបតីក្នុងពិធីបញ្ចុះបឋមសិលាសាង សង់ព្រះវិហារ។ដោយឡែកនៅថ្ងៃទី៥ខែកក្កដា ឆ្នាំ២០២៥ ក៏មានពិធីសម្ពោធសមិទ្ធិផលនានា នៅវត្តពោធិ៍ព្រឹក្សាខារាម (ហៅវត្តតូប) ក្រោមអធិបតីភាពរបស់ លោកជំទាវបណ្ឌិត ពេជ ចន្ទមុនី ហ៊ុន ម៉ាណែត តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាផងដែរ៕ 

ដោយ សួស សំរិត