AKP ព្រះវិហារ ថ្ងៃទី០៣ ខែកក្កដា ឆ្នាំ២០២៥-

សមាគមអ្នកផ្គត់ផ្គង់ត្រីនៅកម្ពុជា ដឹកនាំដោយ លោកជំទាវ នាង សុណ្ណារី បានជួបសំណេះសំណាលនិងនាំយកអំណោយ ជូនដល់ស្ត្រីមានផ្ទៃពោះ ជនពិការ និងកងកម្លាំងប្រចាំការនៅមណ្ឌលសុវត្ថិភាពវត្តពោធិ៍៥០០០ដើម។ ពិធីនេះ ប្រព្រឹត្តទៅក្រោមវត្តមានចូលរួមពីសំណាក់លោក សុខ សាន្តតារ៉ា អភិបាលរងខេត្ត ព្រះវិហារ អជ្ញាធរស្រុក កងកម្លាំងប្រដាប់អាវុធ និងបងប្អូនប្រជាពលរដ្ឋជាច្រើនរូប នៅក្នុងបរិវេណវត្តពោធិ៍៥០០០ដើម ស្ថិតនៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ នារសៀលថ្ងៃទី០៣ ខែកក្កដា ឆ្នាំ២០២៥។ 

ជាមួយនឹងសកម្មភាពនេះបានបង្ហាញឱ្យឃើញអំពីមនោសញ្ចេតនា ដ៏ជ្រាលជ្រៅ និងការយកចិត្តទុកដាក់ខ្ពស់របស់សមាគមឯកជនជាមួយប្រជាពលរដ្ឋដែលកំពុងជួបការលំបាកក្នុងគ្រាមានអាសន្ន ពិសេសការគិតគូរចំពោះស្ត្រីមានផ្ទៃពោះនិង ជនពិការភាព ដែលជួបប្រទះនូវការលំបាក។ ទន្ទឹមនេះ ក៏បង្ហាញឱ្យឃើញពីការរួបរួមសាមគ្គីគ្នារបស់បងប្អូនប្រជាពលរដ្ឋខ្មែរ រួមសុខរួមទុក្ខជួយគ្នាទៅវិញទៅមកធ្វើឱ្យសង្គមយើងកាន់តែរឹងមាំ។

ក្នុងឱកាសនោះ លោក សុខ សាន្តតារ៉ា បានថ្លែងអំណរគុណយ៉ាងជ្រាលជ្រៅចំពោះការចូលរួម បរិច្ចាគនូវ សម្ភារប្រើប្រាស់និងគ្រឿងឧបភោគបរិភោគទាំងអស់នេះ របស់សមាគមអ្នកផ្គត់ផ្គង់ត្រីនៅកម្ពុជា ក្នុងពេលដ៏សំខាន់នេះ។ លោកអភិបាលរងខេត្តទាំងនេះបញ្ជាក់ឱ្យឃើញពីការលះបង់របស់សមាជិកសមាជិកានៃសមាគម គ្រប់រូប ដើម្បីចូលរួមសម្រាលនូវទុក្ខលំបាករបស់បងប្អូនប្រជាពលរដ្ឋ ដែលបានជម្លៀសខ្លួនមកពីតំបន់ងាយរងហានិភ័យ ក៏ដូចជាការចូលរួម ដោះស្រាយនៅក្តីកង្វល់របស់ រដ្ឋបាលខេត្តព្រះវិហារ។ លើសពីនេះបង្ហាញ ឱ្យឃើញ អំពីសាមគ្គីភាព របស់បងប្អូនប្រជាពលរដ្ឋខ្មែរ គ្រប់ស្រទាប់វណ្ណៈ សមនឹងពាក្យថា ខ្មែរជួយខ្មែរ ជួយគ្នាក្នុងគ្រាលំបាក។

សូមជម្រាបជូនថា សម្ភារដែលនាំមកជូននេះ រួមមាន៖ អង្រឹង មុង កង្ហារ ត្រីងៀត ទឹកសុទ្ធ ឆៃប៉ូវ និងថវិកាមួយចំនួន៕

ដោយ៖ រិទ្ធី ប្រភព៖ មន្ទីរព័ត៌មានខេត្តព្រះវិហារ