AKP ភ្នំពេញ ថ្ងៃទី០៣ ខែកក្កដា ឆ្នាំ២០២៥--

កម្ពុជា បាននាំចេញអង្ករចំនួន ៣៨៧ ០៧០តោន ទៅកាន់ទីផ្សារអន្តរជាតិតាមរយៈក្រុមហ៊ុនចេញអង្ករចំនួន ៥០ក្រុមហ៊ុន សម្រេចបានទឹកប្រាក់ប្រមាណ ២៨៣.៤១លានដុល្លារ ក្នុងរយៈពេល ៦ខែនៃឆ្នាំ​២០២៥។ 

យោងតាមរបាយការណ៍របស់សហព័ន្ធស្រូវអង្ករនៅថ្ងៃទី៣ ខែកក្កដា ឆ្នាំ២០២៥ ក្នុងរយៈពេល៦ខែនៃឆ្នាំ២០២៥ កម្ពុជាបាននាំចេញអង្ករបានចំនួន ៣៨៧ ០៧០តោន​ តាមរយៈក្រុមហ៊ុននាំចេញអង្ករចំនួន ៥០ក្រុមហ៊ុន ទៅកាន់គោលដៅចំនួន៦៣។ 

របាយការណ៍នេះបានបញ្ជាក់ថា ការនាំចេញអង្ករទៅកាន់បណ្តាប្រទេសនៅក្នុងតំបន់អឺរ៉ុបចំនួន ​២៦​បានបរិមាណអង្ករចំនួន ១៨២ ៨៨៥តោន គិតជាទឹកប្រាក់ចំនួន ១៤៣.៦៤​លានដុល្លារ, ទៅកាន់ប្រទេសចិន ​និងហុងកុង ចំនួន ១០២ ៥០៩តោន គិតជាទឹកប្រាក់ចំនួន ៦០.២៥លានដុល្លារ និងទៅកាន់ប្រទេសក្នុងអាស៊ានចំនួន ៧ប្រទេសបានបរិមាណចំនួន ៥២ ៨៩០តោន​ គិតជាទឹកប្រាក់ចំនួន ៣៧.០៩លានដុល្លារ។

បន្ថែមពីនេះ កម្ពុជាក៏បាននាំទៅកាន់គោលដៅ ៣២ប្រទេសផ្សេងទៀតមាន អាហ្វ្រិក មជ្ឈឹម បូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ៤៨ ៧៨៥តោន គិតជាទឹកប្រាក់ចំនួន ៤២.៤២ លានដុល្លារ។

គួរបញ្ជាក់ដែរថា ចំពោះប្រភេទអង្ករដែលបាននាំចេញអង្កររួមមាន អង្ករក្រអូបចំនួន ៧៥ភាគរយ, អង្ករសគ្រាប់វែង ១៩.៦៨ភាគរយ, អង្ករចំហ៊ុយ ២.៤៩ភាគរយ, អង្ករសរីរាង្គចំនួន ២.១៣ភាគរយ និងអង្ករផ្សេងៗចំនួន ០.៧ភាគរយ។ ជាមួយគ្នានេះដែរ កម្ពុជាក៏បាននាំចេញស្រូវចំនួន ៣ ១៧៦ ៥៦១ តោនស្រូវសើម ដែលគិតជាទឹកប្រាក់បានប្រមាណ ៧៥៧.៤៩ លានដុល្លារសហរដ្ឋអាមេរិក៕

ដោយ៖ ស្រីពេជ្រ