AKP ភ្នំពេញ ថ្ងៃទី០៣ ខែកក្កដា ឆ្នាំ២០២៥ -- នាយករដ្ឋមន្ត្រីបែលហ្ស៊ិក លោក បាត ដេ វេវឺ (Bart De Wever) បានជួបជាមួយរដ្ឋមន្ត្រីការបរទេសចិន លោក វ៉ាង យី (Wang Yi) កាលពីថ្ងៃអង្គារ ដោយសន្យាថានឹងធ្វើឱ្យការផ្លាស់ប្តូរកាន់តែស៊ីជម្រៅ និងបង្កើនការជឿទុកចិត្តគ្នាទៅវិញទៅមកជាមួយប្រទេសចិន។

លោក ដេ វេវឺ បានកត់សម្គាល់ថា ប្រទេសបែលហ្ស៊ិក និងចិនបានរីករាយនឹងការផ្លាស់ប្តូរប្រវត្តិសាស្រ្តដ៏យូរអង្វែងជាមួយនឹងទំនាក់ទំនងមិត្តភាពកម្រិតមូលដ្ឋានដ៏រស់រវើក ហើយប្រទេសបែលហ្ស៊ិកដើរតួនាទីជាច្រកទ្វារក្នុងកិច្ចសហប្រតិបត្តិការសហភាពអឺរ៉ុប-ចិន។

ដោយរំលឹកពីដំណើរទស្សនកិច្ចជាច្រើនដងរបស់លោកទៅកាន់ប្រទេសចិន លោក លោក ដេ វេវឺ បាននិយាយថា លោកមានការចាប់អារម្មណ៍យ៉ាងខ្លាំងចំពោះសមិទ្ធិផលនៃការអភិវឌ្ឍរបស់ប្រទេសចិន។ ទោះបីជាមានទស្សនៈខុសគ្នាក៏ដោយ លោកបានសង្កត់ធ្ងន់លើសារៈសំខាន់នៃការបង្កើនការផ្លាស់ប្តូរ និងការបង្កើនការជឿទុកចិត្តគ្នាទៅវិញទៅមកចំពោះភូមិសាស្ត្រនយោបាយដ៏ស្មុគស្មាញនាពេលបច្ចុប្បន្ន។

ជាងនេះទៅទៀត លោកបានបញ្ជាក់ជាថ្មីពីការប្តេជ្ញាចិត្តរបស់ប្រទេសបែលហ្ស៊ិកចំពោះពហុភាគីនិយម និងការគាំទ្រសម្រាប់ទ្វីបអឺរ៉ុបដែលមានស្វ័យភាពកាន់តែច្រើន ខណៈពេលដែលលោកបានបង្ហាញពីក្តីសង្ឃឹមថាកិច្ចប្រជុំរបស់មេដឹកនាំសហភាពអឺរ៉ុប-ចិន នាពេលខាងមុខនឹងផ្តល់លទ្ធផលវិជ្ជមាន។

លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បានគូសបញ្ជាក់ពីតួនាទីពិសេសរបស់ប្រទេសបែលហ្ស៊ិកក្នុងដំណើរការសមាហរណកម្មអឺរ៉ុប និងទំនាក់ទំនងចិន-សហភាពអឺរ៉ុប ក្នុងនាមជាសមាជិកស្ថាបនិកនៃសហភាពអឺរ៉ុប (EU) និងជាម្ចាស់ផ្ទះនៃទីស្នាក់ការកណ្តាលសហភាពអឺរ៉ុប។

លោក វ៉ាង បាននិយាយថា ប្រទេសចិនកោតសរសើរចំពោះគោលនយោបាយចិនប្រកបដោយសមហេតុផល និងជាក់ស្តែងដែលបន្តដោយរដ្ឋាភិបាលបែលហ្ស៊ិកថ្មី ហើយមានឆន្ទៈធ្វើការជាមួយប្រទេសបែលហ្ស៊ិកដើម្បីបន្តទំនាក់ទំនងមិត្តភាពប្រពៃណី និងជំរុញភាពជាដៃគូគ្រប់ជ្រុងជ្រោយនៃកិច្ចសហប្រតិបត្តិការមិត្តភាពរវាងប្រទេសទាំងពីរក្នុងលក្ខណៈស្ថិរភាព និងនិរន្តរភាព៕

ដោយ៖ មូល មិនា (ប្រភព៖ ភីបផលដេលី)