AKP កំពង់ធំ ថ្ងៃទី០៣ ខែកក្កដា ឆ្នាំ២០២៥ -- រដ្ឋបាលខេត្តកំពង់ធំ កាលពីថ្ងៃទី០២ ខែកក្កដា ឆ្នាំ២០២៥ បានធ្វើញត្តិគាំទ្រសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ក្នុងការផ្តួចផ្តើមគំនិតស្នើវិសោធនកម្មរដ្ឋធម្មនុញ្ញដកហូតសញ្ជាតិខ្មែរពីជនទាំងឡាយណាដែលឃុបឃិតជាមួយបរទេសធ្វើសកម្មភាពបំផ្លាញផលប្រយោជន៍ជាតិ។

ញត្តិគាំទ្រមានខ្លឹមសារថា ក្នុងនាមថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តកំពង់ធំ យើងខ្ញុំសូមប្រកាសគាំទ្រយ៉ាងពេញទំហឹង ចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលបានប្រកាសផ្តួចផ្តើមគំនិតដ៏ខ្ពង់ខ្ពស់ប្រកបដោយស្មារតីស្នេហាជាតិដ៏ ជ្រាលជ្រៅ ស្នើសិក្សាទិដ្ឋភាពច្បាប់ធ្វើវិសោធនកម្មរដ្ឋធម្មនុញ្ញ ក្នុងគោលដៅដកហូតសញ្ជាតិខ្មែរពីជនទាំងឡាយណាដែលឃុបឃិតជាមួយបរទេស ធ្វើសកម្មភាពបំផ្លាញផលប្រយោជន៍ជាតិ។

ការផ្តួចផ្តើមគំនិតនាពេលនេះបានបញ្ជាក់យ៉ាងច្បាស់អំពីគោលជំហរក្នុងការតម្កល់ឧត្តមប្រយោជន៍ជាតិជាធំ ជាពិសេសការប្រកាន់ខ្ជាប់នូវភាពស្មោះត្រង់ចំពោះប្រទេសជាតិ នៅគ្រប់កាលៈទេសៈទាំងអស់។ គំនិតផ្តួចផ្តើមនេះទៀតសោត ពិតជាមានសារៈសំខាន់មិនអាចខ្វះបាន នៅក្នុងដំណើរការនៃការអភិវឌ្ឍប្រទេសជាតិ ការរក្សាសន្តិភាព ការពារបូរណភាពទឹកដី អធិបតេយ្យជាតិ និងចៀសវាងឱ្យបានពីការបំពុលពីជនមួយក្តាប់តូច ដែលបានចូលដៃ ចូលជើងជាមួយបរទេស ប្រើប្រាស់វិធីសាស្ត្រលាបពណ៌ ញុះញង់ បណ្តុះគំនិតហិង្សាដោយចេតនា ក្នុងគោលដៅ បំបែកបំបាក់សាមគ្គីភាពជាតិរបស់កម្ពុជាយើង ព្រមទាំងឃុបឃិតធ្វើទង្វើក្បត់ជាតិក្នុងចេតនាបំផ្លិចបំផ្លាញជាតិខ្លួន ដែលកំពុងមានការអភិវឌ្ឍ មានសុខសន្តិភាព ស្ថិរភាព សេរីភាពយ៉ាងពេញលេញបរិបូរណ៍។

តាមរយៈគំនិតផ្តួចផ្តើមប្រកបដោយគតិបណ្ឌិត និងទស្សនវិស័យដ៏វែងឆ្ងាយរបស់សម្តេចតេជោ សូមជនរួមជាតិទាំងអស់ បន្តរួបរួមស្មារតីជាធ្លុងមួយ គាំទ្ររាជរដ្ឋាភិបាល គាំទ្រការធ្វើវិសោធនកម្មរដ្ឋធម្មនុញ្ញ ដើម្បីរួមគ្នា បង្កើតប្រវត្តិសាស្ត្រថ្មីមួយទៀត សម្រាប់ជាតិយើង គឺការធានាឱ្យបានច្បាស់យ៉ាងម៉ឺងម៉ាត់ថា ជនជាតិខ្មែរគ្រប់រូប មិនថាខ្មែរពីកំណើត ឬជនទទួលបានសញ្ជាតិខ្មែរនោះទេ គឺត្រូវតែមានកាតព្វកិច្ចការពារឧត្តមប្រយោជន៍ជាតិ ហើយរាល់សកម្មភាពឃុបឃិតជាមួយបរទេសដើម្បីបំផ្លាញផលប្រយោជន៍ជាតិ គឺជាទង្វើក្បត់ជាតិ ដែលត្រូវទទួលទណ្ឌកម្មតាមផ្លូវច្បាប់ រួមទាំងការដកហូតសញ្ជាតិខ្មែរផងដែរ៕

ដោយ ស៊ុម វណ្ណា