AKP ព្រៃវែង ថ្ងៃទី០៣ ខែកក្កដា ឆ្នាំ២០២៥-- សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានគូសបញ្ជាក់ថា ការបើកច្រកអន្ដរជាតិម៉ឺនជ័យ ស្ថិតនៅស្រុកកំចាយមារ ខេត្តព្រៃវែង ក្នុងគោលដៅសំខាន់នោះ គឺដើម្បីជំរុញការតភ្ជាប់សេដ្ឋកិច្ចកម្ពុជា-វៀតណាម ខណៈទំហំពាណិជ្ជកម្មរវាងប្រទេសទាំងពីរបានកើនឡើង ១០ពាន់លានដុល្លារហើយ។ ការគូសបញ្ជាក់របស់សម្ដេចតេជោបែបនេះ ក្នុងឱកាសអញ្ជើញជួបសំណេះសំណាលជាមួយ សិស្ស និស្សិត លោកគ្រូ អ្នកគ្រូ នៅមជ្ឈម ណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ក្នុងខេត្តព្រៃវែង នាថ្ងៃទី០៣ ខែកក្កដា ឆ្នាំ២០២៥។

សម្ដេចតេជោ ហ៊ុន សែន បានថ្លែងយ៉ាងដូច្នេះថា៖ «ការបើកច្រកម៉ឺនជ័យ គោលដៅសំខាន់ គឺជំរុញការតភ្ជាប់សេដ្ឋកិច្ច ដែលបញ្ហាពាណិជ្ជកម្ម ការផ្លាស់ប្ដូរទំនិញ ការទៅមក រកគ្នា គឺជាគោលដៅធំរបស់យើង។ អីចឹងទេ សង្ឃឹមថា ក្នុងខេត្តព្រៃវែងនេះ នឹងមានការផ្លាស់ប្ដូរពាណិជ្ជកម្ម កើនឡើង តាមរយៈការបើកច្រកថ្មី អន្ដរជាតិម៉ឺនជ័យនេះ»។ សម្ដេចតេជោបានលើកឡើងថា នៅពេលបើកសម្ពោធជាផ្លូវការនូវច្រកទ្វារអន្ដរជាតិម៉ឺនជ័យហើយ កម្ពុជា អាចទាក់ទាញអ្នកវិនិយោគ ឬដឹកជញ្ជូនទៅវិញទៅមក រវាងកម្ពុជា-វៀតណាម ។ សម្ដេចតេជោប្រធាន ព្រឹទ្ធសភាបានឱ្យដឹងដែរថា ទំហំពាណិជ្ជកម្មរវាង កម្ពុជា-វៀតណាម គឺបានឆ្លងផុត ហួសពីកម្រិត ១០ពាន់លានដុល្លារហើយ។ 

ក្នុងឱកាសនោះ សម្ដេចតេជោប្រធានព្រឹទ្ធសភាបានបន្ថែមថា កាលពីថ្ងៃទី២៩ ខែមេសា កន្លងទៅ រដ្ឋមន្ដ្រីក្រសួងពាណិជ្ជកម្មកម្ពុជា បានចុះហត្ថលេខាជាមួយរដ្ឋមន្ដ្រីពាណិជ្ជកម្មប្រទេសវៀតណាម ដំឡើងកម្រិតដាក់ចេញគោលដៅ ២០ពាន់លានដុល្លារ។ 
សូមជម្រាបថា ខេត្តព្រៃវែង គ្រោងរៀបចំកិច្ចប្រជុំពិភាក្សាជាមួយអាជ្ញាធរខេត្តតៃនីញ អំពីពិធីសម្ពោធដាក់ឱ្យប្រើប្រាស់ជាផ្លូវការនូវច្រកទ្វារព្រំដែនអន្តរជាតិម៉ឺនជ័យ-តឺនណា ក្រោមអធិបតីភាពរបស់ថ្នាក់ដឹកនាំនៃប្រទេសទាំងពីរ។ ច្រកទ្វារព្រំដែនអន្តរជាតិម៉ឺនជ័យនេះមានទំហំផ្ទៃដីសរុបចំនួន ៨៩ ៥៧៧ ម៉ែត្រការេ ដោយបានដោះស្រាយផលប៉ះពាល់ជូនអ្នកពាក់ព័ន្ធបានរួចរាល់ នៅឆ្នាំ២០២០៕

ដោយ៖ ប៊ុនរិទ្ធ