AKP ភ្នំពេញ ថ្ងៃទី០២ ខែកក្កដា ឆ្នាំ២០២៥ -- ការិយាល័យប្រធានាធិបតីកូរ៉េខាងត្បូង បាននិយាយថា លោក លី ជេយុង (Lee Jae Myung) និងប្រធានាធិបតីនៃប្រទេសអេមីរ៉ាត់អារ៉ាប់រួមបានសន្ទនាតាមទូរស័ព្ទកាលពីថ្ងៃអង្គារ ហើយបានយល់ព្រមធ្វើឱ្យស៊ីជម្រៅនូវកិច្ចសហប្រតិបត្តិការទ្វេភាគីក្នុងបច្ចេកវិទ្យាទំនើប ឧស្សាហកម្មថាមពល និងការពារជាតិ។

អ្នក​នាំ​ពាក្យ​ប្រធានាធិបតីកូរ៉េខាងត្បូង ​លោកស្រី កាង យូជុង (Kang Yu-jung) បាន​និយាយ​ក្នុង​បទ​សម្ភាសន៍​មួយថា នៅក្នុងការសន្ទនាតាមទូរស័ព្ទលើកដំបូងរបស់ភាគីទាំងពីរចាប់តាំងពីលោក លី ចូលកាន់តំណែងកាលពីខែមុន លោក លី បានប្រាប់ប្រធានាធិបតីអេមីរ៉ាត់អារ៉ាប់រួម លោក ម៉ូហាមេដ ប៊ីន ហ្សាយេដ អាល់ ណាហ៍យ៉ាន់ (Mohamed bin Zayed Al Nahyan) ថាលោកទន្ទឹងរង់ចាំការជំរុញបន្ថែមទៀតនៃភាពជាដៃគូយុទ្ធសាស្ត្រពិសេសដែលបានបង្កើតឡើងរវាងប្រទេសទាំងពីរនៅក្នុងឆ្នាំ២០១៨។ មេដឹកនាំទាំងពីរបានឯកភាពគ្នាលើតម្រូវការពង្រីកកិច្ចសហប្រតិបត្តិការទៅក្នុង «ផ្នែកយុទ្ធសាស្ត្រ និងទិសដៅអនាគត» បន្ថែមទៀត។

លោកស្រី កាង បាននិយាយថា «ជាពិសេស ពួកគេបានយល់ព្រមពង្រឹងកិច្ចសហប្រតិបត្តិការលើវិស័យដូចជា បញ្ញាសិប្បនិម្មិត បច្ចេកវិទ្យាទំនើប ឧស្សាហកម្មការពារជាតិ និងសព្វាវុធ និងថាមពលនុយក្លេអ៊ែរ»។

លោកស្រីបានបន្ថែមថា ភាគីទាំងពីរក៏បានយល់ព្រមជួបដោយផ្ទាល់ក្នុងអំឡុងពេលព្រឹត្តិការណ៍ការទូតនាពេលខាងមុខ ដូចជាកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ដែលនឹងត្រូវធ្វើឡើងនៅទីក្រុងយ៉ុងជូ ប្រទេសកូរ៉េខាងត្បូង នៅចុងឆ្នាំនេះ ដើម្បីពិភាក្សាអំពីវិធីពង្រឹងទំនាក់ទំនងទ្វេភាគី៕

ដោយ៖ មូល មិនា (ប្រភព៖ យ៉ុនហាប់)