AKP ភ្នំពេញ ថ្ងៃទី០២ ខែកក្កដា ឆ្នាំ២០២៥ -- រដ្ឋមន្ត្រីការបរទេសតួកគី លោក ហាកាន់ ហ្វីដាន់ (Hakan Fidan) កាលពីថ្ងៃចន្ទបានសាទរចំពោះ «កិច្ចសហប្រតិបត្តិការដ៏ខ្លាំងក្លា» របស់ប្រទេសតួកគីជាមួយចក្រភពអង់គ្លេស ហើយបានអំពាវនាវឱ្យមានការពង្រីកពាណិជ្ជកម្មទ្វេភាគីបន្ថែមទៀត។

ក្នុងអំឡុងពេលសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសអង់គ្លេស លោក ដាវីដ ឡាមមី (David Lammy) នៅរដ្ឋធានីអង់ការ៉ា លោក ហ្វីដាន បានលើកឡើងពីកិច្ចសហប្រតិបត្តិការទ្វេភាគីក្នុងវិស័យសេដ្ឋកិច្ច ការពារជាតិ និងបច្ចេកវិទ្យា។

លោកបានសរសើរពីជំហរគាំទ្ររបស់ចក្រភពអង់គ្លេសលើបញ្ហារួមទាំងជម្លោះនៅតំបន់ហ្គាហ្សា ប្រទេសស៊ីរី អ៊ុយក្រែន និងមជ្ឈិមបូព៌ាដ៏ធំទូលាយ ហើយបានស្វាគមន៍ការសម្រេចចិត្តរបស់ចក្រភពអង់គ្លេសនាពេលថ្មីៗនេះ ដើម្បីដកទណ្ឌកម្មមួយចំនួនលើប្រទេសស៊ីរី។

លោក ហ្វីដាន បានសង្កត់ធ្ងន់ថា ការធានាបទឈប់បាញ់ ជាពិសេសរវាងប្រទេសអ៊ីរ៉ង់ និងអ៊ីស្រាអែល និងនៅតំបន់ហ្គាហ្សា នៅតែជាអាទិភាពយុទ្ធសាស្ត្រកំពូលមួយរបស់ប្រទេសតួកគី។

ចំណែកឯលោក ឡាមមី បានសង្កត់ធ្ងន់លើភាពរឹងមាំនៃទំនាក់ទំនងតួកគី-ចក្រភពអង់គ្លេស ដោយលោកបានបង្ហាញពីកិច្ចព្រមព្រៀងពាណិជ្ជកម្មសេរីដែលមានសក្តានុពលរហូតដល់ ២៨ប៊ីលានផោន (៣៨,៣៦ប៊ីលានដុល្លារអាម៉េរិក) ក្នុងផលប្រយោជន៍សេដ្ឋកិច្ចទៅវិញទៅមក។

លោក ឡាមមី បាននិយាយថា «យើងទន្ទឹងរង់ចាំការចរចាលើកិច្ចព្រមព្រៀងពាណិជ្ជកម្មសេរីក្នុងប៉ុន្មានសប្តាហ៍ និងខែខាងមុខនេះ»។

លោក ឡាមមី ក៏បានសរសើរប្រទេសតួកគីចំពោះការខិតខំប្រឹងប្រែងរបស់ខ្លួនក្នុងការលើកកម្ពស់សន្តិភាពក្នុងជម្លោះរុស្ស៊ី-អ៊ុយក្រែន ហើយលោកបានបានសង្កត់ធ្ងន់ថា ប្រទេសទាំងពីរកំពុងធ្វើការឆ្ពោះទៅរកការបន្ធូរបន្ថយវិបត្តិមនុស្សធម៌នៅតំបន់ហ្គាហ្សា និងឆ្ពោះទៅរកដំណោះស្រាយរដ្ឋពីរសម្រាប់ប៉ាឡេស្ទីន៕

ដោយ៖ មូល មិនា (ប្រភព៖ ស៊ីនហួ)