AKP ភ្នំពេញ ថ្ងៃទី០១ ខែកក្កដា ឆ្នាំ២០២៥ -- ក្រុមហ៊ុន Mineral Resources ដែលជាក្រុមហ៊ុនគ្រប់គ្រងដោយរដ្ឋបាននិយាយកាលពីថ្ងៃអាទិត្យថា យ៉ាងហោចណាស់មនុស្ស ១១នាក់បានស្លាប់ និង ៧នាក់រងរបួស បន្ទាប់ពីអណ្តូងរ៉ែមាសមួយបានបាក់រលំនៅភាគឦសានប្រទេសស៊ូដង់។

ក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា ឧបទ្ទវហេតុនេះបានកើតឡើងនៅឯអណ្តូងរ៉ែ Kersh Al-Feel ក្នុងតំបន់ Houeid រវាងទីក្រុងអាតបារ៉ា និងទីក្រុងហាយ៉ា ក្នុងរដ្ឋ Red Sea ។ ក្រុមហ៊ុនមិនបានបញ្ជាក់កាលបរិច្ឆេទនៃការដួលរលំនោះទេ។

ក្រុមហ៊ុន​បាន​និយាយ​ថា អណ្តូង​រ៉ែ​នេះ​ត្រូវ​បាន​បញ្ជា​ឱ្យ​បិទ​ពី​មុន​ដោយ​សារ​ការ​ព្រួយ​បារម្ភ​អំពី​សុវត្ថិភាព។ ក្រុមហ៊ុនបានសន្យាថានឹងបន្តត្រួតពិនិត្យសកម្មភាពរុករករ៉ែ និងកែលម្អស្តង់ដារសុវត្ថិភាព ដោយជំរុញឱ្យអ្នករុករករ៉ែគោរពតាមច្បាប់សុវត្ថិភាព និងបរិស្ថាន។

ការជីកយករ៉ែបែបប្រពៃណីមានចំណែកយ៉ាងសំខាន់នៃផលិតកម្មមាសរបស់ប្រទេសស៊ូដង់ ប៉ុន្តែវិស័យនេះបានជួបគ្រោះថ្នាក់ជាញឹកញាប់ដោយសារតែស្តង់ដារសុវត្ថិភាពមិនល្អ និងហេដ្ឋារចនាសម្ព័ន្ធមានវ័យចំណាស់។

យោងតាមទិន្នន័យផ្លូវការបានឱ្យដឹងថា កម្មកររ៉ែសិប្បករប្រហែល ១,៥លាននាក់ផលិតមាសជិត ៨០% នៃប្រទេសស៊ូដង់ដែលសរុបប្រហែល ៦៤តោនក្នុងឆ្នាំ២០២៤៕

ដោយ៖ មូល មិនា (ប្រភព៖ ស៊ីនហួ)