AKP ភ្នំពេញ ថ្ងៃទី០១ ខែកក្កដា ឆ្នាំ២០២៥ -- ចំនួនសមាជិកនៃបក្សកុម្មុយនិស្តចិន (CPC) នៅក្នុងប្រទេសចិន បានកើនឡើងដល់ ១០០,២៧លាននាក់គិតត្រឹមឆ្នាំ២០២៤ ដែលជាអត្រាកំណើន ១,១%។

បក្សកុម្មុយនិស្តចិនមានសមាជិកជាង ១០០,២៧លាននាក់គិតត្រឹមចុងឆ្នាំ២០២៤ ដែលកើនឡើងជិត ១,០៩លាននាក់ធៀបនឹងឆ្នាំ២០២៣។ នេះបើយោងតាមរបាយការណ៍ដែលបានចេញផ្សាយកាលពីថ្ងៃចន្ទ មុនខួបលើកទី១០៤ នៃការបង្កើតបក្ស។

របាយការណ៍ដែលចេញផ្សាយដោយនាយកដ្ឋានអង្គការនៃគណៈកម្មាធិការមជ្ឈិមបក្ស CPC បាននិយាយថា សមាជិកភាពនៃបក្ស CPC បានពង្រីកឡើងជាលំដាប់ជាមួយនឹងការបន្តធ្វើឱ្យប្រសើរឡើងនៃរចនាសម្ព័ន្ធរបស់ខ្លួន ហើយស្ថាប័នគណបក្សកម្រិតបឋមកំពុងរីកចម្រើនកាន់តែខ្លាំង។

បក្ស CPC មានស្ថាប័នកម្រិតបឋមចំនួន ៥,២៥លាននាក់នៅដំណាច់ឆ្នាំ២០២៤ ដែលកើនឡើងចំនួន ៧៤.០០០នាក់បើធៀបនឹងឆ្នាំមុន។

បក្ស CPC បន្តអនុវត្តការគ្រប់គ្រងខ្លួនឯង និងអភិបាលកិច្ចដោយខ្លួនឯង ដោយប្រកាន់ខ្ជាប់នូវស្មារតីនៃកំណែទម្រង់ និងការអនុវត្តស្តង់ដារតឹងរ៉ឹង។ វាបានផ្តោតសំខាន់ទៅលើការពង្រឹងស្ថាប័នកម្រិតបឋម និងការគ្រប់គ្រងសមាជិកបក្សតាមស្តង់ដារខ្ពស់បំផុត ដើម្បីផ្តល់ការធានាដល់ស្ថាប័នសម្រាប់ការកសាងប្រទេសចិនឱ្យទៅជាប្រទេសដ៏រឹងមាំ និងសម្រេចបាននូវការស្តារជាតិឡើងវិញលើគ្រប់វិស័យតាមរយៈការបន្តទំនើបកម្មរបស់ចិន។

ទិន្នន័យពីរបាយការណ៍នោះបានបង្ហាញថា មនុស្សជាង ២,១៣លាននាក់បានចូលរួមជាមួយបក្ស CPC នៅក្នុងឆ្នាំ២០២៤។ ក្នុងចំណោមអ្នកទាំងនោះ មាន ៥២,៦% មកពីជួរមុខនៃក្រុមផលិតកម្ម និងការងារ ៥៤,៤% មានសញ្ញាប័ត្រអនុវិទ្យាល័យ ឬខ្ពស់ជាងនេះ និង ៨៣,៧% មានអាយុចាប់ពី ៣៥ឆ្នាំចុះក្រោម៕

ដោយ៖ យា ចិន្ដាខន្ដី (ប្រភព៖ ឆាយណាដេលី)