AKP ភ្នំពេញ ថ្ងៃទី០១ ខែកក្កដា ឆ្នាំ២០២៥ -- អាជ្ញាធរអ៊ីរ៉ង់បាននិយាយកាលពីថ្ងៃចន្ទថា មនុស្សយ៉ាងតិច ៩៣៥នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលក្នុងអំឡុងពេលជម្លោះដែលមានរយៈពេល ១២ថ្ងៃកន្លងមកជាមួយអ៊ីស្រាអែល។

អ្នកនាំពាក្យអាជ្ញាធរតុលាការ លោក Asghar Jahangir បាននិយាយនៅក្នុងសេចក្តីថ្លែងការណ៍មួយដែលដកស្រង់ដោយទីភ្នាក់ងារសារព័ត៌មាន Tasnim ថា ក្នុងចំណោមអ្នកស្លាប់ទាំងនោះ មានស្រ្តីចំនួន ​១៣២​នាក់ និង​កុមារចំនួន ​៣៨​នាក់។

នៅពេលមុននេះ ក្រសួង​សុខាភិបាលអ៊ីរ៉ង់បានប្រកាសថា ​ចំនួន​អ្នក​ស្លាប់​ដោយសារ​ការ​វាយ​ប្រហារ​របស់​អ៊ីស្រាអែលមាន​ចំនួន ៦០៦នាក់ និងអ្នក​រង​របួស​ចំនួន ៥.៣៣២នាក់។

លោក Jahangir បាននិយាយថា ការវាយប្រហាររបស់អ៊ីស្រាអែលទៅលើពន្ធនាគារ Evin នៅភាគពាយព្យនៃទីក្រុងតេអេរ៉ង់បានឆក់យកជីវិតមនុស្សចំនួន ៧៩នាក់ ដែលរួមមានទាំងអ្នកទោស បុគ្គលិក និងប្រជាជនដែលរស់នៅក្បែរនោះ។

ពន្ធនាគារ Evin លែងអាចដំណើរការបាន ហើយអ្នកទោសត្រូវបានជម្លៀសចេញ ដោយលោកបានហៅការវាយប្រហារនេះថា ជាការរំលោភបំពានយ៉ាងធ្ងន់ធ្ងរលើសិទ្ធិមនុស្សជាមូលដ្ឋាន និងដំណោះស្រាយអន្តរជាតិ។

ជម្លោះរវាងអ៊ីស្រាអែល និងអ៊ីរ៉ង់បានផ្ទុះឡើងនៅថ្ងៃទី១៣ ខែមិថុនា នៅពេលដែលទីក្រុងតេលអាវីវ បានបើកការវាយប្រហារតាមអាកាសទៅលើទីតាំងយោធា ទីតាំងនុយក្លេអ៊ែរ និងទីតាំងស៊ីវិលរបស់អ៊ីរ៉ង់។

សហរដ្ឋអាមេរិកក៏បានទម្លាក់គ្រាប់បែកទៅលើរោងចក្រនុយក្លេអ៊ែរ Fordo, Natanz និង Isfahan របស់អ៊ីរ៉ង់ផងដែរ ដែលវាជាការបង្កើនជម្លោះ។

ទីក្រុងតេអេរ៉ង់បានបាញ់គ្រាប់មីស៊ីលសងសឹកវិញ និងការវាយប្រហារដោយយន្តហោះគ្មានមនុស្សបើក (ដ្រូន) ទៅលើអ៊ីស្រាអែល ដោយបានសម្លាប់មនុស្សយ៉ាងហោចណាស់ ២៩នាក់ និងរបួសជាង ៣.៤០០នាក់។ នេះបើយោងតាមតួលេខដែលចេញផ្សាយដោយសាកលវិទ្យាល័យហេប្រ៊ូនៃទីក្រុងហ្សេរុយសាឡឹម។

ជម្លោះ​បាន​ឈាន​ដល់​ការ​បញ្ឈប់​ក្រោម​បទ​ឈប់​បាញ់គ្នា ​ដែល​គាំទ្រ​ដោយ​​អាម៉េរិកដែល​បាន​ចូល​ជា​ធរមានកាលពី​ថ្ងៃ​ទី២៤ ខែ​មិថុនា ឆ្នាំ២០២៥ កន្លងទៅ៕

ដោយ៖ យា ចិន្ដាខន្ដី (ប្រភព៖ AA-AKP)