AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥ -- យោងតាមប្រភពពីប៉ាឡេស្ទីនបានឱ្យដឹងថា យ៉ាងហោចណាស់ ជនជាតិប៉ាឡេស្ទីន ១៣នាក់ត្រូវបានសម្លាប់កាលពីថ្ងៃព្រហស្បតិ៍នៅក្នុងការវាយប្រហារតាមអាកាសរបស់អ៊ីស្រាអែលទៅលើតំបន់ Deir al-Balah នៅកណ្តាល តំបន់ហ្គាហ្សា។

សាក្សីដែលបានឃើញផ្ទាល់ភ្នែកបានប្រាប់សារព័ត៌មាន Xinhua ថាយន្តហោះគ្មានមនុស្សបើករបស់អ៊ីស្រាអែលបានកំណត់គោលដៅលើមនុស្សមួយក្រុមដែលប្រមូលផ្តុំគ្នានៅទីតាំងចែកចាយម្សៅមួយកន្លែងនៅកណ្តាលតំបន់ Deir al-Balah ។

ក្រុមគ្រូពេទ្យមកពីមន្ទីរពេទ្យ Al-Aqsa បានប្រាប់សារព័ត៌មានXinhua ថា បុគ្គលិកពេទ្យបានដឹកសាកសពមនុស្សយ៉ាងហោចណាស់១៣នាក់ រួមទាំងបុគ្គលិកសន្តិសុខ និងកុមារ ហើយបានជម្លៀសអ្នករបួសជាច្រើននាក់ទៅកាន់មន្ទីរពេទ្យនៅតំបន់ Deir al-Balah ។ មិន​មាន​ការ​អត្ថាធិប្បាយ​ភ្លាមៗ​ពី​យោធា​អ៊ីស្រាអែល​ទាក់​ទង​នឹង​ការ​វាយ​ប្រហារ​តាម​អាកាស​នោះ​ទេ។

យោងតាមទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានឱ្យដឹងថា នេះនាំឱ្យចំនួនប្រជាជនប៉ាឡេស្ទីនដែលត្រូវបានសម្លាប់ចាប់តាំងពីព្រឹកព្រលឹមកាលពីថ្ងៃព្រហស្បតិ៍កើនដល់ប្រហែល ៦២នាក់ដែលជាលទ្ធផលនៃការបាញ់កាំភ្លើង និងការបាញ់ផ្លោងរបស់អ៊ីស្រាអែលនៅទូទាំងតំបន់ហ្គាហ្សាស្ទ្រីប។

ចាប់តាំងពីអ៊ីស្រាអែលចាប់ផ្តើមយុទ្ធនាការយោធាកាន់តែខ្លាំងឡើងនៅថ្ងៃទី១៨ ខែមីនា យ៉ាងហោចណាស់មានជនជាតិប៉ាឡេស្ទីន៥.៩៣៦នាក់ត្រូវបានសម្លាប់ និង ២០.៤១៧នាក់ផ្សេងទៀតបានរងរបួសដែលនាំឱ្យចំនួនអ្នកស្លាប់សរុបនៅតំបន់ហ្គាហ្សាចាប់តាំងពីសង្គ្រាមបានចាប់ផ្តើមក្នុងខែតុលា ឆ្នាំ២០២៣ កើនដល់ ៥៦.២៥៩នាក់ ជាមួយនឹងមនុស្សសរុបចំនួន ១៣២.៤៥៨នាក់បានរងរបួស។ នេះបើយោងតាមអាជ្ញាធរសុខាភិបាលនៅតំបន់ហ្គាហ្សាកាលពីថ្ងៃព្រហស្បតិ៍៕

ដោយ៖ មូល មិនា (ប្រភព៖ ស៊ីនហួ)