AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥ -- ប្រធានាធិបតីតង់ហ្សានីលោកស្រី សាមៀ ស៊ូលូហ៊ូ ហាស់សាន់ (Samia Suluhu Hassan) កាលពីថ្ងៃពុធបានរំលឹកឡើងវិញនូវការប្តេជ្ញាចិត្តរបស់ប្រទេសលោកស្រីក្នុងការពង្រឹងកិច្ចសហប្រតិបត្តិការជាមួយប្រទេសម៉ូសំប៊ិកក្នុងការជំរុញការអភិវឌ្ឍការរួបរួមក្នុងតំបន់ និងសុខុមាលភាពរបស់ប្រជាជន។

ជាផ្នែកមួយនៃដំណើរទស្សនកិច្ចរបស់លោកស្រីទៅកាន់ប្រទេសអាហ្រ្វិកខាងត្បូង លោកស្រី ហាស់សាន់ បានចូលរួមក្នុងការប្រារព្ធពិធីមួយដែលធ្វើឡើងនៅកីឡដ្ឋាន Machava ក្នុងរដ្ឋធានីម៉ាពូតូ ប្រទេសម៉ូសំប៊ិកដើម្បីប្រារព្ធខួបលើកទី៥០ នៃឯករាជ្យភាពរបស់ប្រទេសម៉ូសំប៊ិក។

ប្រធានាធិបតីតង់ហ្សានីបានសាទរចំពោះទំនាក់ទំនងប្រវត្តិសាស្ត្រ និងសម័យរំដោះដ៏យូរអង្វែងរវាងប្រទេសទាំងពីរ ដែលលាតសន្ធឹងហួសពីភូមិសាស្ត្រជិតខាង។ លោកស្រីបានរំលឹកពីការគាំទ្ររបស់ប្រទេសតង់ហ្សានីសម្រាប់ការតស៊ូទាមទារឯករាជ្យរបស់ប្រទេសម៉ូសំប៊ិក ទោះបីជាប្រឈមមុខនឹងបញ្ហាសេដ្ឋកិច្ច និងសន្តិសុខផ្ទាល់ខ្លួននៅពេលនោះក៏ដោយ។

លោកស្រី ហាស់សាន់ ក៏បានកោតសរសើរពីការរីកចម្រើនរបស់ប្រទេសម៉ូសំប៊ិកក្នុងរយៈពេល ៥ទសវត្សរ៍កន្លងមកនេះលើវិស័យដូចជាការអប់រំ ការថែទាំសុខភាព និងហេដ្ឋារចនាសម្ព័ន្ធ ដោយផ្តល់កិត្តិយសដល់ចក្ខុវិស័យរួមរបស់ប្រទេសសម្រាប់ការកសាងសង្គមមួយដែលមានក្តីសង្ឃឹម។

ដើម្បីធ្វើឱ្យទំនាក់ទំនងសេដ្ឋកិច្ចកាន់តែស៊ីជម្រៅ លោកស្រីបានប្រកាសថា ក្រុមហ៊ុនអាកាសចរណ៍ជាតិរបស់ប្រទេសតង់ហ្សានី Air Tanzania Company Limited (ATCL) គ្រោងនឹងចាប់ផ្តើមការហោះហើរត្រង់រវាងប្រទេសទាំងពីរនៅចុងឆ្នាំនេះ៕

ដោយ៖ មូល មិនា (ប្រភព៖ ស៊ីនហួ)