AKP ភ្នំពេញ ថ្ងៃទី២៦ ខែមិថុនា ឆ្នាំ២០២៥ -- ការិយាល័យប្រធានាធិបតីម៉ុងហ្គោលីបាននិយាយនៅលើគេហទំព័ររបស់ខ្លួនកាលពីថ្ងៃអង្គារថាប្រទេសម៉ុងហ្គោលី និងអ៊ូសបេគីស្ថានបានចុះហត្ថលេខាលើឯកសារកិច្ចសហប្រតិបត្តិការមួយចំនួន។

ឯកសាររួមទាំងសេចក្តីប្រកាសរួមស្តីពីភាពជាដៃគូទូលំទូលាយរវាងប្រទេសម៉ុងហ្គោលី និងសាធារណរដ្ឋអ៊ូសបេគីស្ថាន និងអនុស្សរណៈយោគយល់គ្នាស្តីពីកិច្ចសហប្រតិបត្តិការក្នុងវិស័យធនធានរ៉ែត្រូវបានចុះហត្ថលេខានៅរដ្ឋធានីយូឡានបាទ័រ ប្រទេសម៉ុងហ្គោលី។

អមដំណើរដោយគណៈប្រតិភូជាន់ខ្ពស់ ប្រធានាធិបតីអ៊ូសបេគីស្ថានលោក សាវកាត់ មៀហ្សីយ៉ូយ៉េវ (Shavkat Mirziyoyev) បានមកដល់ទីក្រុងយូឡានបាទ័រ កាលពីរសៀលថ្ងៃអង្គារ សម្រាប់ដំណើរទស្សនកិច្ចផ្លូវរដ្ឋរយៈពេលពីរថ្ងៃតាមការអញ្ជើញរបស់ប្រធានាធិបតីម៉ុងហ្គោលី លោក យូខ៍ណា ឃូរ៉េលស៊ូខ៍ (Ukhnaa Khurelsukh) ។

នេះ​ជា​ដំណើរ​ទស្សនកិច្ច​លើក​ដំបូង​របស់​ប្រធានាធិបតី​អ៊ូសបេគីស្ថាន​ទៅ​កាន់ប្រទេស​ម៉ុងហ្គោលី​ចាប់​តាំង​ពី​បង្កើត​ទំនាក់ទំនង​ការទូត​រវាង​ប្រទេស​ទាំង​ពីរ៕

ដោយ៖ មូល មិនា (ប្រភព៖ ស៊ីនហួ)