AKP ភ្នំពេញ ថ្ងៃទី២៦ ខែមិថុនា ឆ្នាំ២០២៥ -- អាជ្ញាធរបាននិយាយកាលពីថ្ងៃអង្គារថា មេបញ្ជាការជាន់ខ្ពស់នៃកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ត្រូវបានសម្លាប់នៅក្នុងការវាយប្រហារដោយគ្រាប់មីស៊ីលរបស់អ៊ីស្រាអែលនៅក្នុងទីក្រុងតេអេរ៉ង់។

នាយកដ្ឋានទំនាក់ទំនងសាធារណៈរបស់ IRGC បានបញ្ជាក់ថា លោកម៉ូហាំម៉ាដ តាគី យូសេហ្វវេនដ៍ (Mohammad Taqi Yousefvand) ដែលជាប្រធានក្រុមការពារស៊ើបការណ៍សម្ងាត់ Basij ត្រូវបានសម្លាប់កាលពីថ្ងៃចន្ទនៅក្នុងការវាយប្រហារដោយគ្រាប់មីស៊ីលមួយក្នុងចំណោមការវាយប្រហារដោយគ្រាប់មីស៊ីលជាច្រើនដែលធ្វើឡើងដោយអ៊ីស្រាអែល។

សេចក្តី​ថ្លែងការណ៍​មួយ​បាន​កត់​សម្គាល់​ថា ទីតាំង​ជាច្រើន​ក្នុង​រដ្ឋធានីរបស់​អ៊ីរ៉ង់​ត្រូវ​បាន​គេ​កំណត់​គោលដៅ​កាលពី​ថ្ងៃ​ចន្ទ។

មេបញ្ជាការ IRGC បាននិយាយថា សពរបស់លោក យូសេហ្វវេនដ៍ដែលមានដើមកំណើតនៅខេត្តឡូរេស្ទែន នៅភាគខាងលិចប្រទេសអ៊ីរ៉ង់ត្រូវបានយកទៅស្រុកកំណើតរបស់លោកនៃតំបន់ស៊ែលសេឡេ កាលពីថ្ងៃពុធ។

ការស្លាប់របស់លោកបានកើតឡើងនៅមួយថ្ងៃបន្ទាប់ពីអ៊ីរ៉ង់ និងអ៊ីស្រាអែលបានយល់ព្រមលើបទឈប់បាញ់គ្នាមួយ ដោយបញ្ចប់ជម្លោះរយៈពេល ១២ថ្ងៃដែលបង្កឡើងដោយការវាយលុកដ៏គួរឱ្យភ្ញាក់ផ្អើលរបស់អ៊ីស្រាអែលទៅលើទីក្រុងនានារបស់អ៊ីរ៉ង់កាលពីថ្ងៃទី១៣ ខែមិថុនាឆ្នាំ២០២៥ កន្លងមក។

ការវាយប្រហារនេះបានឆក់យកជីវិតមនុស្សជាង ៤០០នាក់ រួមទាំងមេបញ្ជាការយោធាជាន់ខ្ពស់ អ្នកវិទ្យាសាស្ត្រនុយក្លេអ៊ែរ និងជនស៊ីវិល ដែលភាគច្រើនជាអ្នករស់នៅក្នុងទីក្រុងតេអេរ៉ង់ រដ្ឋធានីរបស់អ៊ីរ៉ង់។

ជាការសងសឹក កងកម្លាំងប្រដាប់អាវុធរបស់អ៊ីរ៉ង់ បានបើកការវាយប្រហារដោយគ្រាប់មីស៊ីល និងយន្តហោះគ្មានមនុស្សបើក (ដ្រូន)ទៅលើទីក្រុងនានារបស់អ៊ីស្រាអែលវិញ រួមទាំងទីក្រុងតេលអាវីវ និងទីក្រុងហៃហ្វាជាដើម។

បទ​ឈប់​បាញ់មួយ​បាន​កើត​ឡើង​បន្ទាប់​ពី​ភាគី​ទាំង​ពីរ​បាន​ចាប់​ផ្តើម​ការ​បាញ់​ប្រហារ​ចុង​ក្រោយ​កាលពី​ព្រឹក​ថ្ងៃ​អង្គារ៕

ដោយ៖ យា ចិន្ដាខន្ដី (ប្រភព៖ AA-AKP)