AKP ភ្នំពេញ ថ្ងៃទី២៥ ខែមិថុនា ឆ្នាំ២០២៥ -- យោងតាមប្រភពផ្លូវការ និងសន្តិសុខបានឱ្យដឹងថា សមាជិក ៣នាក់នៃគ្រួសារតែមួយត្រូវបានសម្លាប់កាលពីថ្ងៃអង្គារនៅក្នុងការវាយប្រហារដោយយន្តហោះគ្មានមនុស្សបើករបស់អ៊ីស្រាអែលនៅភាគខាងត្បូងប្រទេសលីបង់។

ទីភ្នាក់ងារសារព័ត៌មានជាតិផ្លូវការរបស់ប្រទេសលីបង់បានរាយការណ៍ថា យន្តហោះគ្មានមនុស្សបើកបានកំណត់គោលដៅលើរថយន្តស៊ីវិលជាមួយនឹងមីស៊ីលចំនួនពីរគ្រាប់នៅលើផ្លូវ Nabatieh-Kfar Dajjal ក្នុងសង្កាត់ណាបាទីហ៍ ដោយបានដុតបំផ្លាញរថយន្ដនោះ។

មជ្ឈមណ្ឌល​ប្រតិបត្តិការ​សង្គ្រោះ​បន្ទាន់​ផ្នែក​សុខភាព​សាធារណៈ​នៃ​ក្រសួង​សុខាភិបាល​បាន​បញ្ជាក់​ថា មនុស្ស​ ៣​នាក់​បាន​ស្លាប់​ក្នុង​ហេតុការណ៍​នោះ។ ប្រភពសន្តិសុខលីបង់បានប្រាប់សារព័ត៌មាន   Xinhua ថាជនរងគ្រោះគឺ លោក ហាច ហៃថាម បាគ្រី (Hajj Haitham Bakri) ដែលធ្វើការផ្នែកប្តូរប្រាក់ និងកូនប្រុស ២នាក់របស់លោក។

យោងតាមសាក្សី និងប្រភពសន្តិសុខ បានឱ្យដឹងថា យន្តហោះចម្បាំងអ៊ីស្រាអែលបានធ្វើការវាយប្រហារតាមអាកាសប្រហែល ២០លើកក្នុងរយៈពេលតិចជាង ១៥នាទីកាលពីរសៀលថ្ងៃច័ន្ទ ដោយផ្តោតលើទីតាំងរបស់ក្រុមហេបូឡាហ៍ ភាគខាងជើងនៃទន្លេលីតានី។

ការវិវឌ្ឍទាំងនេះកើតមានឡើង បើទោះបីជាមានកិច្ចព្រមព្រៀងឈប់បាញ់គ្នារវាងក្រុមហេសបូឡាហ៍ និងអ៊ីស្រាអែលដែលមានតាំងពីថ្ងៃទី២៧ខែវិច្ឆិកា ឆ្នាំ២០២៤ ក៏ដោយ។ កិច្ចព្រមព្រៀងបានបញ្ចប់ជាងមួយឆ្នាំនៃការប៉ះទង្គិចគ្នាឆ្លងព្រំដែនដែលបង្កឡើងដោយសង្រ្គាមនៅក្នុងតំបន់ហ្គាហ្សាស្ទ្រីប។

យោធា​អ៊ីស្រាអែល​បាន​បន្ត​ធ្វើ​ការ​វាយ​ប្រហារ​ជា​បន្តបន្ទាប់​ក្នុង​ប្រទេស​លីបង់ ដោយ​អះអាង​ថា​ពួកគេ​មាន​គោល​បំណង​ដើម្បី​បន្សាប​ «ការ​គំរាម​កំហែង​របស់​ក្រុមហេសបូឡាហ៍»៕

ដោយ៖ មូល មិនា (ប្រភព៖ ភីបផលដេលី)